«Սամ սեբե ռեժիսոր».ՍԴ թնջուկը լուծելու ճանապարհին

ՀՀ վարչապետի մամուլի խոսնակ Վլադիմիր Կարապետյանն արձագանքել է Սահմանադրական դատարանի դատավոր Վահե Գրիգորյանի նամակին՝ ուղղված ՀՀ նախագահին, Ազգային ժողովին, կառավարությանը, դատավորների ընդհանուր ժողովին, ՍԴ անդամներին ու դատավորին: «Արմենպրես»-ի հաղորդմամբ՝ նամակի ուսումնասիրությունից հետո դրա առնչությամբ նորության մասին հարցին Վլադիմիր Կարապետյանը ապատասխանել է. «Մենք իսկապես մտահոգված ենք ստեղծված իրավիճակով և կառավարությունը քննարկում է իր մասնակցության ձևաչափը ճգնաժամի հաղթահարման հարցում»:

Հիշեցնենք, որ օրերս Վահե Գրիգորյանը նամակով դիմել է իրավասու վերը թվարկած մարմիններին՝ Սահմանադրական դատարանում ստեղծված իբր ճգնաժամի լուծման հարցով: Փաշինյանի իշխանությունը հաստատապես կրկեսի է վերածվում: Ինչպես ասում են Նիկոլ Փաշինյանը «սամ սեբե ռեժիսոր» է աշխատում: Նախ Վահե Գրիգորյանին գործուղում է ՍԴ-ն զավթելու, ապա հայտարարում ճգնաժամի առկայության մասին ու ասում, թե քննարկում են լուծումները: Փաշինյանին չհաջողվեց գրոհով վերցնել Սահմանադրական դատարանը, Լևոն Տեր–Պետրոսյանի անձնական օգտագործման փաստաբան Վահե Գրիգորյանի ՍԴ նախագահ ինքնահռչակումն անգամ չընկրկեց ՍԴ անդամներին եւ նրանք հանդես եկան հակահարվածով, վստահեցնելով, որ իրենք լեգիտիմ անդամներ են ու շարունակելու են պաշտոնավարումը։ Հիմա անցել են կոմրոմատների պատերազմի, տեղեկատվական տեռորի են ենթարկում երկրի բարձրագույն մարմինն ու նրա անդամներին, հընթացս Վահե Գրիգորյանը հակասահմանադրական լուծումներ է առաջադրել իր հայտնի նամակում «սահմանադրական ճգնաժամից» դուրս գալու համար․ «Սահմանադրությամբ Դատարանի դատավորների թեկնածուներ ներկայացնողմարմինների կողմից Ազգային ժողովին ներկայացվում են Դատարանի դատավորների 7 թափուր հաստիքների համար թեկնածուներ, որոնց ընտրությունից եւ 2015թ.-իփոփոխություններով Սահմանադրությամբ նախատեսված Դատարանի կազմըհամալրվելուց հետո վերջինս որոշում է Դատարանի դատավորների կարգավիճակը եւ 213 հոդվածի իրական սահմանադրաիրավական բովանդակության կիրառության շրջանակը»,–գրում է Վահե Գրիգորյանը։

Պարզ ասած՝ նա Սահմանադրական դատարանը գրավելու տարբերակ է առաջարկում՝ երկրորդ ՍԴ ձևավորելով և Հայաստանը կրկեսի վերածելով։ Զավեշտն այն է, որ Վահե Գրիգորյանի հետ «ճգնաժամի» հարցով առաջինը համաձայնություն է տալիս կառավարությունը, իսկ ՍԴ-ն արձագանքելով այդ նամակին հայտարարեց, թե ճգնաժամ չկա, իրենք աշխատում են բնականոն հունով եւ աշխատելու են։ Սա նշանակում է, որ կառավարությունը պատրաստ է հակասահմանադրական ճանապարհով լուծումների միայն, թե ՍԴ-ում իշխանությունը վերցնի իր ձեռքը։

Ուշագրավ է, որ անգամ Փաշինյանի գործընկեր ընդդիմադիր խմբակցության պատգամավոր Տարոն Սիմոնյանը չի ընդունում, թե ՍԴ-ում ճգնաժամ կա․ «Ճգնաժամ մեկնաբանության առումով չեմ տեսնում: Տվյալ պարագայում, եթե Սահմանադրական դատարանի մեկ դատավոր, երկու դատավոր, կամ այլ իրավաբան մեկնաբանություն է տալիս, դա դեռ չի ենթադրում, որ մենք գործ ունենք ճգնաժամի հետ»,-լրատվամիջոցների հետ զրույցում ասել է պատգամավորը, նաեւ զգուշացրել՝«Իշխանությունը զավթելը հանցագործություն է, որը սահմանված է Քրեական օրենսգրքով, եթե հանկարծ նման երևույթ տեղի ունենա, պետք է համապատասխան հետևանքներ առաջացնի, այստեղ պետք է զգույշ լինել տերմիններ օգտագործելիս: Պարզապես հայտարարություն անելը, իրավունքի նորմ մեկնաբանելը, իմ կարծիքով, դեռևս բավարար հիմք չէ ասելու, որ փաստացի իշխանությունը զավթվել է»,-ասաց նա:

Հետաքրքրական է, որ իրավասու մյուս մարմինները՝ ՀՀ նախագահը, դատավորների ընդհանուր ժողովը չեն շտապում մեկնաբանել։

Անի Սահակյան