Ռուսաստանին սթափեցնող ապտակը. զենքի մատակարարումը կարագացվի

Կառավարության ապրիլի 15-ի օրակարգում ընդգրկվել է «Հայաստանի Հանրապետության կառավարության և Ռուսաստանի Դաշնության կառավարության միջև ՀՀ կառավարությանը պետական արտահանման վարկ տրամադրելու մասին» համաձայնագրի դրույթներն իրականացնելու մասին որոշման նախագիծը: Սա դեռեւս անցած տարի հունիսին խորհրդարանի կողմից հաստատված վարկային նախագիծն է, որը պետք է նպատակաուղղվեր բանակի սպառազինությանը եւ այդ վարկի դիմաց մեր ռազմավարական դաշնակից Ռուսաստանը զենք տրամադրեր: Սակայն, առանց որեւէ հիմնավորման անցած հունիսից այս համաձայնագիրը կյանքի չի կոչվել, ու Հայաստանն էլ համապատասխան սպառազինություն չի ստացել: Հարցը սրվեց ղարաբաղա-ադրբեջանական վերջին լարվածության ֆոնին, երբ Գերմանիայում Սերժ Սարգսյանը հայտարարեց, թե Ադրբեջանն ունի ավելի ժամանակակից զինատեսակներ, իսկ մենք կռվում ենք հիմնականում 80-ական թվականների զենքով: Այս հայտարարությունն առաջին հայացքից շոկի մեջ գցեց հայ հանրությանը, տպավորություն ստեղծվեց, թե Սերժ Սարգսյանի խոսքը արտաքին լսարանին ուղղված դիվանագիտական ինչ-որ քայլ էր, սակայն հայտարարությունից օրեր անց վարչապետ Հովիկ Աբրահամյանն անուղղակիորեն վերահաստատեց նախագահ Սարգսյանի խոսքերը: Երբ Հայաստան էր ժամանել ՌԴ վարչապետ Դմիտրի Մեդվեդևը, Աբրահամյանը դժգոհեց, թե դանդաղում է Ռուսաստանի տրամադրած 200 մլն դոլարի վարկով զենքի ներկրման գործընթացը: Հատկանշական է, որ կառավարության նիստերի օրակարգում վերոնշյալ նախագիծը, որն ըստ էության արագացնելու է զենքի ներկրման գործընթացը, ներառվեց այն ժամանակ, երբ Հովիկ Աբրահամյանը Մոսկվայում ԵԱՏՄ վարչապետերի հավաքին էր մասնակցում: Նախագիծը կառավարության նիստում կներկայացնի պաշտպանության նախարար Սեյրան Օհանյանը: Նախ ֆինանսների նախարարին հանձնարարվում է հսկողություն իրականացնել նշված համաձայնագրով հայկական կողմի ստանձնած պարտավորությունների կատարման նկատմամբ: Միեւնույն ժամանակ հանձնարարվում է պաշտպանության նախարարին հստակեցնել Հայաստանին մատակարարվող ժամանակակից սպառազինության և ռազմական տեխնիկայի անվանացանկը, ՌԴ համապատասխան մարմինների հետ քննարկի ու ստորագրի տրամադրվող վարկի շրջանակներում ռազմական նշանակության արտադրանքի մատակարարման պայմանագրերը, իսկ Կենտրոնական բանկին հանձնարարվում է ապրիլի 29-ին ՌԴ «Վնեշէկոնոմբանկ»-ի հետ իրականացնել աշխատանքներ վարկի հաշվառման ու հաշվարկների վարման տեխնիկական կարգի մասին համաձայնագիր կնքելու ուղղությամբ: Ռուսաստանի գործողությունները վկայում են, որ Մոսկվան միտումնավոր է ուշացրել Հայաստանի սպառազինությունը, դա եղել է Ադրբեջանի հետ համատեղ պլանավորված հստակ ռազմարշավ, որի նպատակն է եղել տարածք խաղաղապահի դիմաց ռուսական գաղափարի կյանքի կոչումը: Մի քանի ամիս առաջ ռուսաստանյան լրատվամիջոցները հրապարակում էին Հայաստանին, իբր թե, մատակարարվելիք սպառազինության ցանկը: Դրանից հետո Ադրբեջանը հանդես է գալիս բողոքի նոտայով, ՌԴ ԱԳՆ-ից պահանջելով երաշխիք, որ այդ սպառազինությունը չի կիրառվի Ադրբեջանի դեմ: Մի խոսքով՝ ակնհայտ պլանավորած շոու: Հիմա, երբ աշխարհին հայտնի դարձավ, բացահայտվեց մեր ռազմավարական դաշնակցի ստորությունը, դրանից բացի ղարաբաղյան ճակատում մենք փաստեցինք, որ կարող ենք առանց նորագույն զինատեխնիկայի էլ ջախջախել հակառակորդի ուժերը, Մոսկվային այլ ելք չի մնում, քան կյանքի կոչել համաձայնագիրը, ինչի ապացույցը կառավարության օրակարգում հայտնված նախագիծն է: Իսկ մեր իշխանությունները, որոնք  վասալային հարաբերությունների մեջ են իրենց ռուս գործընկերների հետ, այդքան համարձակություն չեն ունեցել այս ամիսներին պարտադրել գործընթացի իրագործումը:   Անի Սահակյան