Վեթինգ Հովիկ Աբրահամյանի համար, իսկ մյուսների՞

ՀՀ հատուկ քննչական ծառայությունը հայտարարություն է տարածել նախկին վարչապետ Հովիկ Աբրահամյանի հետ կապված քրեական գործի վերաբերյալ: Ըստ ՀՔԾ-ի տարածած հաղորդագրության` նախաքնության ընթացքում բացահայտվել են Դիլիջան, Մխչյան, Նարեկ համայնքների ղեկավարների և աճուրդային հանձնաժողովների անդամների կողմից առանց աճուրդներ կազմակերպելու` կեղծ փաստաթղթեր կազմելու միջոցով, նույն համայնքների սեփականությունը հանդիսացող 15 հողատարածքներ սեփականության իրավունքով Հովիկ Աբրահամյանի ազգականներին և նրա մերձավոր անձանց վաճառելու դեպքեր:

<<Մասնավորապես, վերը նշված եղանակով որպես սեփականություն ձեռք են բերվել`
Դիլիջան քաղաքի Բաբաջանյան 26 հասցեի 15.000 քմ մակերեսով և Բաբաջանյան 24 հասցեի 57.000 քմ մակերեսով բնակավայրերի խառը կառուցապատման նշանակության հողատարածքներ, ինչպես նաև նույն քաղաքի Սարալանջ փողոցի թիվ 42, 44, 46 և 48 հասցեներում գտնվող, համապատասխանաբար՝ 731, 761, 701 և 720 քմ մակերեսով բնակելի տուն կառուցելու համար նախատեսված հողատարածքներ,
Արարատի մարզի Մխչյան գյուղում գտնվող 8.9 հա, 9.1 հա, 8 հա, 9 հա, 5.6 հա, 7.2 հա մակերեսով 4-րդ կարգի անջրդի հողամասեր և 4092 քմ մակերեսով արտադրական նշանակության հողամաս,
Արարատի մարզի Նարեկ գյուղում գտնվող 90 հա մակերեսով վարելահող և 30 հա մակերեսով արոտավայր:
Նկատի ունենալով, որ վերը նկարագրված որոշ դեպքերում անցել են քրեական պատասխանատվության ենթարկելու` օրենքով նախատեսված ժամկետները, իսկ որոշ դեպքերում կիրառելի է եղել համաներման մասին օրենքը, որի կապակցությամբ հակաօրինական արարք կատարած անձինք դիմել են վարույթն իրականացնող մարմնին` վերը նշված հիմքերով իրենց նկատմամբ քրեական հետապնդում չիրականացնելու խնդրանքով, ուստի ՀՀ հատուկ քննչական ծառայության քննիչի կողմից որոշում է կայացվել նրանց նկատմամբ քրեական հետապնդում չիրականացնելու մասին: Որոշումների օրինակներն ուղարկվել են ՀՀ տարածքային կառավարման և ենթակառուցվածքների նախարարություն` օրենքով սահմանված կարգով վարչական ակտերն առոչինչ ճանաչելու և նշված գույքային միավորները Դիլիջան, Մխչյան և Նարեկ համայնքներին վերադարձնելու գործընթաց նախաձեռնելու համար:
Քրեական գործով նախաքննությունը շարունակվում է` հնարավոր այլ չարաշահումներն ու դրանք կատարած անձանց ողջ շրջանակը բացահայտելու ուղղությամբ>>,- նշված է տարածված հաղորդագրության մեջ:
Փաստորեն, Նիկոլ Փաշինյանի ասած վիթինգը սկսվել է` Հովիկ Աբրահամյանի կուլակաթափությամբ: Անշուշտ, եթե համայնքային հողերն օտարվել են առանց աճուրդի` օրենքի խախտմամբ, պետությունը կարող է և պարտավոր է տեր կանգնել համայնքի շահերի պաշտպանությանը: Բայց ՀՔԾ-ի տարածած հաղորդագրությունն առաջացնում է մի շարք հարցեր.
1. Նախ` ինչո՞ւ ՀՔԾ-ն չի մանրամասնում, թե երբ են տեղի ունեցել ապօրինի գործարքները. խոսքը 2000-ականներին տեղի ունեցած, թե՞ ավելի վաղ` հեռավոր 90-ականներին կատարված ապօրինության մասին է:
2. Եթե տեղի է ունեցել պետական սեփականության ապօրինի օտարում, ապա կատարվածի համար չի կարող պատասխանտվություն կրել սոսկ գույք ձեռբերողը: Ինչո՞ւ ՀՔԾ-ն չի բարձրաձայնում, թե ովքեր են եղել այն պաշտոնյաները, ովքեր գնացել են այդ ապօրինի գործարքին: Եթե վաղեմության ժամկետն այս պահին փրկում է նրանց քրեական գործից, ապա այդ նույն տրամբանությամբ` ինչու վեղեմության ժամկետը չի տարածվում սեփականության իրավունքի պաշտպանության վրա:Անհասկանալի է:
3. Ընդհանրապես, առանց դատարանի որոշման` ինչպե՞ս կարելի է անձին զրկել սեփականության իրավունքից: Եթե կա պնդում, որ գույքը ձեռք է բերվել անօրինական ճանապարհով, ուրեմն պետք է լինի նաև այդ պնդումը հաստատող դատարանի որոշում, հակառակ դեպքում մենք գործ կունենանք ունեզրկման գործընթացի` կուկալաթափության հետ:
4. Արդյոք գույքի օրինական ծագման վիթինգը տարածվելու է բոլորի, այդ թվում նաև 90-ականներին տեղի ունեցած սեփականաշնորհման գործարքների վրա, թե՞ այդ ակտը կիարառվելու է միայն առանձին մարդկանց համար:
5. ՀՔԾ-ի և դատախազության քննիչները վիթինգի ենթարկվելո՞ւ են, թե՞ օրվա իշխանությանը հլու-հնազանդ ծառայող դատավորները, դատախազներն ու քննիչները ազատվում են այսպիսի մեղքերից:
6. Ինչո՞ւ են լռում Հովիկ Աբրահամյանն ու նրա մերձավորները, որոնց վերագրվում է պետական հողերին տիրանալու մեղադրանքը: Նրանք պարտավոր են հրապարակավ խոսել և պարզաբանել կատարվածը, այլապես լռությունը կդիտվի համաձայնության նշան:

Հայկ Դավթյան