Իշխանությունը նոր գրոհի է պատրաստվում

Սահամանադրական դատարանի դատավոր Վահե Գրիգորյանը նամակով դիմել է Սահմանադրական դատարանի անդամներին, Ազգային ժողովին, Հայաստանի նախագահին, Կառավարությանը, Դատավորների ընդհանուր ժողովին՝ Սահմանադրական դատարանում «ճգնաժամի» հետ կապված: Նամակի մասին դեռեւս խոսել է միայն Ազգային ժողովի նախագահ Արարատ Միրզոյանը, ով ասել է, որ չի կարող պատմել բովանդակությունը, այն ծավալուն նամակ է, բայց հաստատել է «ճգնաժամի» մասին իրողությունը ու ասել, որ իր կարծիքով էլ այն ՍԴ-ի շուրջ կա․ « Ես չեմ վարանի ասել նաեւ, որ ըստ ամենայնի, ճգնաժամի մասին կարելի է խոսել: Մենք խոսում ենք Հայաստանի իրավական անվտանգության մասին։ Փաստ է, որ ՍԴ-ի հանդեպ չկա վստահություն, այդ մարմինը տարներ շարունակ եղել է խնդիրները պարտակող, լղոզող մարմին: Սա ճգնաժամ է, անկախ նրանից, թե օրվա իշխանությունների քիմքին ով է հաճելի»։

Ասել է նաեւ, որ դատարանի կազմավորմանը մասնակից մարմինների՝ դատավորների ընդհանուր ժողովի, կառավարության,ՀՀ նախագահի եւ ԱԺ-ի շրջանում լայն քննարկում պիտի ծավալել եւ գտնել իրավիճակից դուրս գալու ելքերը։ Եւ ճգնաժամի, եւ ելքերի մասին, անշուշտ, կիմանան միայն իշխանության սիրողական իրավաբաններն ու սահմանադրագետները, որոնք այդ մասին սկսեցին խոսել Վահե Գրիգորյանի ՍԴ դատավոր ընտրվելուց եւ հայտնի հայտարարություններից հետո։ Երբ Վահե Գրիգորյանը ինքնահռչակվեց ՍԴ դատավոր եւ դա հիմնավորվեց դեմագոգգիայով, թե ՍԴ-ում երկու դատավոր կա, քանի որ մեկն արձակուրդում է, ինքն է ՍԴ նախագահը, իսկ մյուսները անդամ են ու գործող օրենքների համաձայն չեն կարող ՍԴ դատավոր դառնալ, որոշումներ կայացնել, ՍԴ նախագահը նույնպես պետք է դատավոր լինի։

Մի խոսքով՝ պարզ բառախաղ, սահմանադրության աբսուրդ մեկնաբանություն, որի մասին ահա շաբաթներ է թմբկահարում են Փաշինյանի սիրողական իրավաբանությամբ զբաղվող թիմակիցները։ Ըստ էության, եթե անգամ օրենքում կա բաց, ապա կարելի է այն շտկել ընդամենը օրենսդրական մեկ նորմով ու ՍԴ անդամին դատավորի կարգավիճակ տալ, բայց իշխանությունում քննարկվում է մի խայտառակ տարբերակ, որի մասին լրագրողները հարց տվեցին Արարատ Միրզոյանին։ Ներկայում ՍԴ դատավորի թեկնածու առաջադրելու հերթը կառավարությանն է, Նիկոլ Փաշինյանը գուցե առաջադրի թեկնածուներ, քանի որ կառավարությունը երեք թեկնածու առաջադրելու իրավունք ունի, ընտրվելու արդյունքում ՍԴ-ն կունենա հինգ դատավորը, որը կարող է նիստեր գումարել, որոշումներ ընդունել, ընտրել դատավորներից ՍԴ նախագահ։ Այսինքն ՍԴ-ում երկրորդ ՍԴ-ն ստեղծել, իսկ իրավաբանական լեզվով ասած՝ ուզուրպացնել ՍԴ-ում իշխանությունը։

Արարատ Միրզոյանն ասաց, թե այնքան էլ կողմնակից չէ այդ տարբերակին, որովհետեւ կարծում է, թե լուծումներ պետք է գտնել ընդհանուր քննարկումների արդյունքում, իսկ այդ տարբերակը կարող է ընկալվել որպես ճնշում․«Դա այդքան էլ ողջունելի տարբերակ չէ։ Այդ ճանապարհը այսպես կոչված ուժային է ու կարող է լայն ընդունելություն չգտնել»։

Բայց, ներողություն, Արարատ Միրզոյանի կարծիքը արդյոք հուզում է Նիկոլ Փաշինյանին, արդյոք նա եւս մտածում է, որ դա լավագույն լուծումը չէ ու Հայաստանը կարող է խնդիր ունենալ միջազգային հանրության կողմից։ Նիկոլ Փաշինյանի քայլերը հուշում են, որ պատրաստ է ամեն ինչ անել, միայն թե Վահե Գրիգորյանի ցանկություններն իրագործվեն, իսկ թե այդ ճանապարհին Սահմանադրություն կտորի, իշխանություն կուզուրպացնի, դա արդեն իրեն հետաքրքիր չէ։ Նշենք, որ հայտարարությամբ են հանդես եկել նաեւ ՍԴ անդամները, նշելով ․«Արված իրավական հարցադրումների առնչությամբ հարկ ենք համարում նշել, որ մասնավոր կարծիքները, Սահմանադրության յուրօրինակ մեկնաբանությունները Սահմանադրական դատարանի համար բնականաբար որևէ իրավական հետևանք առաջացնել չեն կարող։Սահմանադրական դատարանը աշխատում և աշխատելու է իր բնականոն հունով՝ ենթարկվելով բացառապես Սահմանադրությանը և ապահովելով Սահմանադրության գերակայությունը»։

Անի Սահակյան