Մինչև Պուտինի գալը գազի գինը կմնա անորոշ

Մամուլը գրել էր, որ գալիք հունվարից ռուսական կողմը մտադիր է 10 տոկոսով թանկացնել Հայաստանին վաճառվող գազը:

Կառավարության նիստից հետո լրագրողների հետ զրույցում ՀԾԿՀ նախագահ Գարեգին Բաղրամյանը, խոսելով գազի թանկացման վերաբերյալ լուրերի մասին, հայտարարել է, որ ինքը նման տեղեկատվություն չունի. «Ես չունեմ նման տեղեկատվություն: Բանակցությունները դեռևս ընթանում են, նորություններ դեռ չկան»,- ասել էր Բաղրամյանը:
Ինչ վերաբերում է հարցին, ինչպես է փոխհատուցվում արդեն տեղի ունեցած գազի թանկացումը, ՀԾԿՀ ղեկավարը նշել է՝ «Գազպրոմ Արմենիա» ընկերության ներքին խնայողությունների հաշվին: Նա վստահեցրել է, որ պետությունը պարտք չի կուտակում:
Բաղրամյանը չի կարողացել հստակ ժամկետներ ասել, թե երբ վերջնական պարզություն կլինի գազի գնի հարցում: «Քննարկվող թեման մինչև 2030թ.–ը սպասվող ներդրումային ծրագրերն են և ինչ զարգացում պետք է ունենա մեր գազամատակարարման համակարգը։ Ինչպես նաև քննարկվել են որոշակի մոտեցումներ գազի ներքին գնի ձևավորման շուրջ»,– ասել է Բաղրամյանը` հավելելով, որ գազի գնի շուրջ որոշակի համաձայնության ձեռքբերման դեպքում այն կներկայացվի նաև հանրությանը։
«Քանի դեռ չկա վերջնական սակագնային հայտ, և սպառողների համար գները չեն փոխվել, բնականաբար, այդ բարձրացման փոխհատուցումը գնում է ընկերության հաշվին»,– ասաց Բաղրամյանը:
Հիշեցնենք` հունիսի 6-ին` ՌԴ նախագահ Վլադիմիր Պուտինի հետ հանդիպումից հետո, ՀՀ վարչապետ Նիկոլ Փաշինյանն ասել էր, որ հույս ունի, որ Երևանն ու Մոսկվան գազի գնի հարցում լեզու կգտնեն։ «Կարևոր է, որպեսզի համաձայնեցված գինը չխոչընդոտի Հայաստանի աճի տեմպերին»,– ասել էր Փաշինյանը և հավելել, որ Պուտինը հոկտեմբերի 1–ին կայցելի Երևան, և այդ ժամանակ էլ գազի գինը կհամաձայնեցվի։
«Մենք պայմանավորվել ենք որ շատ ինտենսիվ քննարկելու ենք այդ հարցն առաջիկա ամիսներին»,– ասել էր նա։
Ինչպես հայտնի է, 2019 թվականի հունվարի 1–ից սահմանին Հայաստանը Ռուսաստանից գազը ստանում է հազար խորանարդ մետրի դիմաց 165 դոլար գնով՝ նախկին 150-ի փոխարեն։ Իսկ բնակչության համար սակագինը նույնն է մնացել «Գազպրոմ Արմենիան» ընկերության ծախսերի կրճատման հաշվին։ Այս կապակցությամբ «Գազպրոմ Արմենիան», որը 100%–ով պատկանում է ռուսական «Գազպրոմին», հիմա անձնակազմի կրճատման ու ծախսերի օպտիմալացման հարցեր է քննարկում։ Հակառակ դեպքում սպառողների համար սակագնի պահպանումը կարող է հսկայական պարտքերի հասցնել ընկերությանը։ Բայց ինչքան կարող է այս վիճակը շարունակվել` ոչ ոք հստակ չգիտի:

Հայկ Դավթյան