Սամվել Ալեքսանյանին, Մանվել Բադեյանին, հիմա էլ Մելիք Մանուկյանին. փնտրվում է հաջորդը

«Բարգավաճ Հայաստան» խմբակցության նախկին պատգամավոր Մելիք Մանուկյանին պատկանող ընկերությանը: Կառավարությունը 26 միլիոն դրամի հարկային արտոնություն է տվել: Որոշումը կայացվել է կառավարության հունիսի 27-ի նիստում: Նախագիծը ներկայացրել է էկոնոմիկայի նախարար Տիգրան Խաչատրյանը: Առաջարկվում է «Մանուկյան կոնյակի գործարան»-ին տալ հարկային արտոնություն հետևյալ հիմնավորմամբ.

«Մանուկյան կոնյակի գործարան» ընկերությունը Իտալիայից Հայաստան կներմուծի սարքավորումներ՝ մաքսատուրքի վճարներից ազատվելով: ԱԺ նախկին պատգամավոր Մելիք Մանուկյանին (Շշի Մելո) պատկանող ընկերությունը հիմնվել է 2013 թվականին, իսկ արտադրություն ծրագրում է սկսել 2020 թվականից:
Ներմուծվող սարքավորումների արժեքը մոտ 277 միլիոն դրամ է: Դրանք կօգտագործվեն խաղողի և մրգային գինիների, կոնյակի և մրգային օղիների արտադրությունում:
Կառավարության հաղորդմամբ՝ ընկերությունը արդեն իսկ իրականացրել է 1 մլրդ 540 մլն դրամի ներդրում: Նախատեսում է ծրագրի շրջանակում իրականացնել ևս 1.3 մլրդ դրամի ներդրում` սարքավորումների ձեռքբերման և շինարարական աշխատանքների համար: Հետաքրքիր է, որ ընկերությունն այժմ ունի 4 աշխատատեղ, սակայն խոստացել է ներդրումային ծրագրի շրջանակում ստեղծել 42 նոր աշխատատեղ՝ 260 հազար դրամ միջին աշխատավարձով։ Թե ինչպես կարող է ընդամենը 4 աշխատող ունեցող ընկերությունը նման խոշոր ներդրումային ծրագրի հայտ ներկայացնել, թերևս պետք է գուշակել: Հավանական է, որ ընկերության աշխատողների մեծ մասը կա'մ գրանցված չեն, կա'մ էլ գործարանը վիրտուալ է և գոյություն չունի, որովհետև եթե գործարանը ֆիզիկապես կա, ապա միայն պահակների թիվն արդեն իսկ առնվազն 4-ը կլիներ: Իսկ ուր են մնացած աշխատողները, պետք է որ բացահայտած լինեին հարկային արտոնություն տալուց առաջ:
Հատկանշական է, որ մինչ այդ էլ Նիկոլ Փաշինյանի կառավարությունը մի քանի անգամ հարկային արտոնություն էր տվել նաև նախկին պատգամավոր Սամվել Ալեքսանյանի դստերը պատկանող ընկերությանը: Կառավարության այս տարվա մայիսի 2-ի նիստում հերթական հարկային արտոնությունը տրվեց Սամվել Ալեքսանյանի բիզնեսին` բավարարելով «ԱԼԵՔՍ ՏԵՔՍՏԻԼ» սահմանափակ պատասխանատվությամբ ընկերության կողմից ներկայացված հայտը` ներմուծման մաքսատուրքից ազատվելու վերաբերյալ:
Իսկ այս տարվա մարտի 23-ի նստում էլ ներմուծման մաքստուրքից ազատվել նախկին ՀՀԿ-ական պատգամավոր Մանվել Բադեյանին պատկանող «Եվրոստան-ույուտ» սահմանափակ պատասխանատվությամբ ընկերությանը՝ ջերմա և ձայնամեկուսիչ կոնստրուկցիաների արտադրության մեջ ներմուծվող ապրանքների համար:
Ստացվում է, որ նախկին իշխանությունների օրոք աճած ու բարգավաճած գործարարները հերթով հաջողեցնում են լեզու գտնել իշխանությունների հետ և իրենց գործերն առաջ տանել:
Ամեն դեպքում, հետաքրքիր է` ինչու, օրինակ, կառավարությունը հարկային արտոնություն չի տալիս 10 աշխատող ունեցող փոքր ու միջին ընկերություններին:

Հայկ Դավթյան