Նիկոլ Փաշինյանը Արցախի հարցում գերազանցում է անգամ Տեր-Պետրոսյանին

ՀՀ երկրորդ նախագահ Ռոբերտ Քոչարյանը 5-րդ ալիք հեռուստաընկերությանը տված հարցազրույցում թերեւս ամենաուշագրավ դրվագը Լեռնային Ղարաբաղի խնդրի վերաբերյալ նոր իշխանությունների եւ առհասարակ՝ նախորդների վարած քաղաքակաության վերլուծությունն էր: Երկրորդ նախագահը, ըստ ամենայնի զուգահեռներ է անցկացրել Նիկոլ Փաշինյանի եւ առաջին նախագահ՝ Լեւոն Տեր-Պետրոսյանի ձեռագրերի միջեւ, ավելին, իր մեկնաբանությամբ Փաշինյանը անգամ գերազանցում է առաջին նախագահին, որի գլխավոր թեզն այն էր, որ քանի Արցախի հարցը կա, ապա Սերգոն լավ չի ապրի:

Պատահական չէ, որ հայաստանցի-արցախցի բաժանումն էլ քաղաքական-հասարակական օրակարգ բարձրացավ Լեւոն Տեր-Պետրոսյանի թեթեւ ձեռամբ՝ 2008 թվականին, երբ առաջին նախագահը վերադառնում էր ակտիվ քաղաքականություն: Ռոբերտ Քոչարյանը հիշեցնում է տերպետրոսյանական քաղաքականությունը ու արձանագրում, որ նորերը դրա շարունակողն են. « Ղարաբաղը բե՞ռ է, թե՞ հնարավորություն։ ««Սերգո ջան, լավ չես ապրելու» թեզը կա՞, թե՞ չկա։ Ես տեսնում եմ, որ այդպես են մտածում, մտածում են, որ բեռ է, իսկ երբ մտածում ես, որ ինչ-որ բան բեռ է, ոչ թե արժեք, ենթագիտակցաբար մտածում ես՝ ոնց այդ բեռից ազատվել»: Նա տալիս է Արցախի հարցի վերաբերյալ գործող իշխանությունների դիագնոզը՝ ընդ որում ՝ ոսկերչական ճշգրտությամբ. «Պատերազմ հաղթանակած մարդկանց տեսակն իրենց հասկանալի չէ, փորձում են իրենց հեռու պահել, չեն սիրում, դա դասական դասալիքների բարդույթի արտահայտությունն է։ Դու այդ հերոսական էջերի կողքով անցար , չնկատեցիր, քեզ հետ առնչություն չունեցավ, իհարկե, մարդիկ բարդույթ ունեն, և փորձում են նվաստացնել յուրաքանչյու մարդու, ով զենքը ձեռքին՝ պայքարել է Արցախի անկախության համար։ Սա չափազանց վտանգավոր երևույթ է։ Արցախից բնազդող վտանգ են զգում, որովհետև հասկանում են, որ այդ տեսակի մարդիկ են իշխանության, իրենց հետ չեն համընկնում, և պետք է նրանցից ազատվել, բայց այդ տեսակից ազատվել նշանակում է քաքայել ԼՂ անվտանգությունը»;

Նկատի ունենալով Արցախի գեներալիտետի նկատմամբ Նիկոլ Փաշինյանի վերաբերմունքը՝ երկրորդ նախագահը ախտորոշում է, որ դա ոչ միայն դրսի ուժերի ազդեցության գործոնն է, այլեւ տեսակի հարց է.<< Ոնց որ թե ալերգիա ունեն խիզախ, ոչ անտարբեր, իրենց կարծիքին ամուր կպած մարդկանցից»,-ասում է նա ու հավելում.<< ՀՀ-ն Ղարաբաղի հետ լուրջ խաղացող է տարածաշրջանում։ Առանց Ղարաբաղի լուրջ դերակատար չես ունենալու, մոռանալու են, որ դու ընդհանրապես կաս։ Ղարաբաղն արժեք է, եթե դուխով ոչ թե գլխարկիդ, այլ ճակատիդ է գրված, դա արժեք է, որը պետք է հասնես լուրջ նպատակների»։

Արցախի հարցում Լեւոն Տեր-Պետրոսյանի հետ տրամագծորեն հակադիր դիրքորոշում ունեցող երկրորդ  նախագահը հանուն արդարության փաստում է նաեւ, որ երբեք 1-ին նախագահը չի միջամտել Ղարաբաղի ներքին գործերին, ինքը, Սերժ Սարգսյանը՝ նույնպես.<< Միջամտությունը կնշանակեր, որ մենք իջեցնում ենք ԼՂ կարգավիճակը, ցույց ենք տալիս կախվածությունը>>։ Իսկ Նիկոլ Փաշինյանը ի հեճուկս անգամ սեփական հայտարարությունների՝ բացահայտ միջամտություն է դրսեւորում Արցախի ներքին կյանքին՝ ըստ էությա գերազանցելով անգամ առաջին նախագահին.«Երբ դու նշում ես, որ այն անկախ պետություն է, ինքդ չպետք է կասկածի տակ դնես այդ կարգավիճակը։ Այն ինչ անում է այս իշխանությունը ԼՂ նկատմամբ, ուղղակի կասկածի տակ է դնում ԼՂ ինքնությունը։ Ի՞նչ է նշանակում ՀՀ-ից պարտադրել ԼՂ-ում մարդկանց ազատել ինչ-որ պաշտոններից միայն ինչ-որ հայտարարության համար։ Ի լուր աշխարհի՝ ՀՀ-ն ցույց է տալիս, որ այդ կարգի ազդեցություն ունի ԼՂ վրա։ Վտանգը նրանում է, որ վաղը մի առաջարկ են տալու, ասեն՝ դու ունես այդ ազդեցությունը, գնա՛ և պարտադրի՛ր, որ դա ընդունեն։ 25-30 տարվա ընթացքում ձևավորված ֆորմատը կասկածի տակ ես դնում, մեծ պետությունների մոտ նոր մոտիվացիա ես առաջացնում ԼՂ հարցը լուծել՝ քեզ ճնշելով>>:

Անի Սահակյան