«Ռազբորկա» իշխանական ձեւով, մի կաթիլ մեղրի պատմություն

Ազգային ժողովում բառի բուն իմաստով երեկ աղջկա բազառ էր: Իմ Քայլի պատգամավորները <<ատչոտ>> էին պահանջում «Լուսավոր Հայաստան» կուսակցության ղեկավար Էդմոն Մարուքյանից իր մի արտահայտության համար: Մեկ օր առաջ ֆեյսբուքյան ուղիղ եթերում Մարուքյանն անդրադարձել էր Վրաստանում ստեղծված իրավիճակին ու կառավարությանն առաջարկել էր ավելացնել Գյումրիից դեպի Ռուսաստան և հակառակ ուղղությամբ չվերթների քանակը։
«Կոչ եմ անում Քաղաքացիական ավիացիայի վարչության պետ շատ գեղեցիկ աղջկան և մեր փայլուն աշխատող կառավարությանը, որ այս օրերի ընթացքում շատ արագ միջոցներ ձեռնարկեն և այս խնդիրը կարգավորեն։ Մենք ուղղակի այս հնարավորությունը չպետք է բաց թողենք»,- նշել էր Մարուքյանը։Մարուքյանի խոսքերում դժվար է վիրավորական որեւէ արտահայտություն գտնել,ինչ է ասել որ, ճիշտ հակառակը՝ հաճոյախոսություն է շռայլել, բայց իմքայլականներ այնպես էին խոցվել, որ դժվար էր նրանց դեմն առնել: Նախ «Իմ քայլը» խմբակցության անդամ Արեն Մկրտչյանը, անդրադառնալով Մարուքյանի՝ «գեղեցիկ աղջիկ» արտահայտությանը, հիշեցրեց, որ Մարուքյանը պատգամավոր է և խոսում է Քաղավիացիայի կոմիտեի նախագահի մասին ու հորդորեց «բակի բեսեդկայում պպզած ռեպլիկներ չթողնի»։
«Կոչ եմ անում հարգել պատգամավորի մանդատը և իրեն դրսևորել «կլասիկ», այլ ոչ «ռաբիս» պատգամավորի պես>>: Նույն խմբակցության պատգամավոր Գևորգ Պապոյանը հաջորդ հարձակվողն էր. «Ես կարծում եմ, որ ԱԺ-ի պատգամավորները պետք է պատգամավորին հարիր վարքագիծ դրսևորեն հատկապես հանրային ելույթներում և հանրային վայրերում: Եվ ուզում եմ տեղեկացնել, որ ոչ քաղաքական, անհիմն, գռեհիկ ձևակերպումներն ԱԺ-ում կստանան արժանի պատասխան»,- ասաց նա:
ԼՀԿ պատգամավոր Անի Սամսոնյանը փորձեց հասկացնել,որ ընդամենը կառուցողական առաջարկ է արվել և ասվել.
«Հիմա փոխանակ կենտրոնանաք առաջարկի վրա, կենտրոնացել եք արտահայտության վրա։ Նախ` չեմ հասականում, թե ինչու եք մտահոգվել «փայլուն կառավարություն» արտահայտությունից, որովհետև դա ձեր արտահայտությունն է, և պարոն Մարուքյանն ասել է փայլուն, միգուցե, ձեր կառավարությունն այդքան էլ փայլուն չի, որ այդ բառը ձեզ անհանգստացրել է այդպես։ Հետո չեմ հասկանում, թե ինչու եք մտահոգվել «սիրուն աղջիկ» արտահայտությունից, որը ընդամենը կոմպլիմենտ էր, և եկեք օբյեկտիվ լինենք, և հասկանաք, որ մինչև այժմ այդ սիրուն աղջիկը որևէ գործ, արդյունք չի տվել և սա կոչ էր, որ դուք ակտիվացնեք փայլուն կառավարությանը և սիրուն աղջկան, որպեսզի աշխատեն և Գյումրիի օդանավակայանն ակտիվացնենք։ Ի վերջո, եթե ձեր անգործությունը պետք է արդարացնեք այսպես և տրանզիտային օդանավակայան դառնա Բաքուն, Անկարան, ես խոսքեր չունեմ, դուք կարող եք այստեղ ժամանակ ծախսել, բամբասկոտ տղամարդու նման արտահայտություններ անելու վրա, որից, իհարկե, կշահեն Բաքուն և Անկարան։ Շարունակեք այդ գործելաոճը, և կենտրոնացեք ոճաբանությունների վրա և ոչ առաջարկի և այդպես էլ անգործությամբ զբաղվեք»,-ասաց Սամսոնյանը։ «Իմ քայլից» Սուրեն Գրիգորյանն էլ իրեն չզրկեց Մարուքյանին դաստիարակելու հնարավորությունից. «Ձեզ ո՞նց է թվում, մեր քաղաքացիները չե՞ն տարբերում մի իրավիճակ, որ մենք ասում ենք՝ մեզ քննադատեք, բայց արեք կոռեկտ, կա՞ տարբերություն սրանց մեջ, թե՞ չկա»։ Նա հարցադրում արեց, թե ինչու է ԼՀԿ-ն ենթադրում, որ ինքը կարող է խոսել քաղավիացիայի պետի մասին, բայց իրենց մասին չեն կարող։ ԼՀԿ պատգամավոր Անի Սամսոնյանը տեղից հակադարձեց, թե ինչո՞ւ են «նեղվում սովորական կոմպլիմենտից»։ «Դե եթե նեղվելու չի, մենք էլ այսուհետ կասենք՝ փայլուն ընդդիմություն և սիրուն աղջիկ տիկին Սամսոնյան, խնդրում եմ դրանից չնեղվեք»,-ասաց նա։ Մի խոսքով՝ իսկական մի կաթիլ մեղր, եւ այս բազառին խառնվեցի եւս մի քանի պատգամավոր: Աժ-ում ապահովեցին ֆոն, սակայն չտրվեց հարցի բուն պատասխանը: Թե ով է իրականում Քաղավիացիայի պետ, սիրուն աղջիկ Տաթեւիկ Ռեւազյանը, մամուլը բազմիսց է անդրադարձել: Պետական պաշտոնյան նույնիսկ հայերեն էլ լավ չգիտի, կիլոմետրերով հեռու է ոլորտից եւ պետության հաշվին շրջագայում է տարբեր երկրներ: Պատահական չէ, որ փայտը վերցնելիս, գող կենդանին իմանում է իր անելիքը: Իսկ իրականում այս քննարկումը անչափ խորհրդանշական էր, քանի որ Նիկոլ Փաշինյանի իշխանությունը բոլոր հարցերում է հիմնված տեսարանների վրա, որոնցով փորձ է անում հանրային ուշադրությունը շեղել բուն խնդրներից: Իհարկե, սա որոշակի ժամաակ աշխատող տեխնոլոգիա է, բայց ներկայումս քաղաքական այս տեխնոլոգիան այլեւս արդյունավետ չէ եւ մարդիկ քայլ են ուզում տեսնել:

Անի Սահակյան