Զգուշացեք.հրեշտակը նորից սատանա է դառնում

Ոստիկանության կազմավորման 27 –ամյակի կապակցությամբ կազմակերպված միջոցառման ժամանակ ՀՀ ոստիկանապետ Վալերի Օսիպյանը հետաքրքրական հայտարարություն է արել: Նա ասել է, որ ստիկանությունն այլեւս հանդուրժող չի լինելու: Եթե նախկինում ոստիկանությունը հանդուրժող էր, ապա մոտ 1 ամիս է՝ վերաբերմունքը փոխվել է օրինազանցների նկատամբ։«Վստահեցնում եմ՝ այսօր արդեն և շուրջ մեկ ամիս տևական կլինի և ոստիկանությունը այլևս հանդուրժող չի», - ընդգծել է ոստիկանապետը։

Իհարկե, Նիկոլ Փաշինյանի հայտարարություններից հետո, Օսիպյանը դժվար թե կարողանար ուրիշ բան ասել, բայց մի քիչ ինքնավստահ տոնով է ասել՝ մոռանալով անցյալի իր հայտարարությունը: Նույն օրը Նիկոլ Փաշինյանը հայտարարել է, որ
«Հայաստանի Հանրապետությունում սիրո և համերաշխության մթնոլորտ ձևավորելու մեր անմնացորդ ձգտումը ոմանք կարծես փորձ են անում մեկնաբանել որպես թուլություն», -ապա թեթեւակի սպառնացել.«Մեր կամքը չի սասանվի, և մեր ձեռքը չի դողա բոլոր նրանց հետ հարաբերություններում, ովքեր կփորձեն Հայաստանի Հանրապետությունում վերածնել բռնության քարոզչությունը և բռնության գործելակերպը»:
Հունիսի 6-ին էլ վարչապետը կառավարության նիստի ընթացքում էր հայտարարել՝ ոչ թե թավշյա, այլ երկաթյա հակահարված է տրվելու բռնության քարոզ հնչեցնող ուժերին, նրանց վարչապետը բնորոշել էր որպես «սևազգեստ խմբեր»: Թվում էր, թե
աչքներիս առաջ պատմության գիրկն էր անցնում տասնամյակներ շարունակ ամենապրոֆեսիոնալ ցույց ցրողի տիտղոսակիր Վալերի Օսիպյանը եւ մեր առջեւ հառնում է թավշյա հեղափոխության օրերին սիրո եւ հանդուրժողականության մթնոլորտի մաս դարձած բոլորովին ուրիշ Օսիպյան: 1990-ականներից ոստիկանական համակարգում Վալերի Օսիպյանի բռնարարքների ու նրա հրահանգը կատարող ոստիկանական հրոսակախմբերի մասին հատորյակներ կարելի է գրել, բայց , ահա, ոստիկանապետ նշանակվելուն պես պարոն Օսիպյանը կարծես անցել էր ինքնամաքրման գործի, նա դարձել էր լրատվականներ աստղը եւ ամենուր արդարանում էր, որ անցյալում ինքը ստիպված է եղել նման գործունեության հարցում: Ոչ վաղ անցյալում ցուցարար կանանց անգութորեն բռնության ենթարկած Օսիպյանը ընդամենն ամիսներ առաջ ասում էր, թե մեկ երազանք ունի՝ ոստիկանության ներքին օղակներում իրականություն դարձնել նոր ոստիկանության իր իդեան եւ որ թավշյա հեղափոխության օրերին ցուցարարների եւ ոստիկանության միջեւ գցված փշալարերը ժանգոտեն պահեստներում, որ այլեւս Հայաստանում դրանց կարիքը չզգացվի: «Մենք անելու ենք ամեն ինչ՝ արատավոր երևույթները ոչնչացնելու համար»:

Եւ ինչ պատահեց ամիսներ հետո, որ Օսիպյանը նորից վերադառնում է նախկին բիրտ, բռնի, ոչ թավշյա կերպարին: Պարզից էլ պարզ է, որքան ժամանակը գնում է, այնքան բողոքի օջախներն ավելանում են, իսկ թավիշով հնարավոր չի լինելու իշխանություն պահել:
Այսօր լրագրողները նրան հարցրեցին նաեւ, թե ինչու նա չի թույլատրում Նարեկ Մալյանին խաղաղ ցույցեր անել ու թեկուզև շրջափակել Սորոսի գրասենյակը Երևանում: Օսիպյանն էլ պատասխանում է, թե, իբր, Հայաստանում բոլորը հավասար են, Հայաստանում ոչ ոք իրավուք չունի ինչ-որ մեկի ելքն ու մուտքը փակել, իբր նրանք պաշտպանում են բոլորին:
Թե ինչու դատարանների շրջափակումը չկանխվեց, Օսիպյանը կրկին լղոզեց, թե իրենք անօրինական գործողությունների ցանկացած դեպքի արձագանքել են: Այսինքն պարզից էլ պարզ է, թե ինչու այլեւս հանդուրժող չի լինելու, քանզի ժողովուրդը նույնպես էլ չի հանդուրժում այս իշխանություններին:

Անի Սահակյան