Ազատամարտիկները կոչ են անում չթուլացնել այս օրերի համախմբվածությունը
«Ապրիլի 2-ին, լսելով սահմանային լարվածության մասին, որոշում ենք կայացրել անմիջապես մեկնել առաջնագիծ :Ապրիլի 2-ին մենք Պռոշյանի պանթեոնում էինք: Այդ օրը Հրաչ Մուրադյանի սպանության օրն է: Լուրն իմանալուն պես՝ Շուշիի առանձնակի գումարտակի հանձնաժողովը նիստ գումարեց, եւ որոշվեց ջոկատ ուղարկել առաջնագիծ: Մոտ 170 ազատամարտիկ այս պահին այնտեղ է: Մյուսները սպասում են իրենց հերթին»,- Հայելի ակումբում հրավիրված ասուլիսի ընթացքում հայտարարեց Շուշիի առանձնակի գումարտակի անդամ Խաչիկ Զաքարյանը: Մեկ այլ անդամ Օֆելյա Գրիգորյանն էլ նշեց, որ իր ամուսինը նույնպես մեկնել է Արցախ: «Երբ ամուսնուս հետ խոսում եմ՝ կարծես ռոբոտի հետ խոսեմ: Միշտ ասում է՝ մենք շատ լավ ենք, եղանակը լավ է, ամեն ինչ լավ է լինելու: Ձայնի որեւէ փոփոխություն չկա, որից կարող ես ենթադրել, թե տագնապ կա»,պատմեց նա: Ազատամարտիկները կոչ են անում չթուլացնել այս օրերի համախմբվածությունը. «Մեր ազատամարտիկները, որոնք 40-50 տարեկան տղամարդիկ են, հաշվի չառան իրենց սոցիալական խնդիրները, որոնցից շատերն ունեն, եւ մեկնեցին սահման: Ում հետ որ խոսում եմ՝ բոլորը միահամուռ ասում են, որ մեր 18-20 տարեկան տղաները գերազանցել են իրենց»,-ասաց տիկին Գրիգորյանը:
Հետևեք մեզ Viber-ում
