Սթափվե'ք գժուկներ
2018 թվականի ապրիլյան հեղափոխության թունդ օրերին, երբ ՀՀԿ-ն պնդաճակատորեն չէր ուզում հրաժարական տալ, այն ժամանակ դեռ պատգամավոր Արարատ Միրզոյանը ՀՀԿ-ական պատգամավոր Սամվել Ֆարմանյանի գրառմանն ի պատասխան ՖԲ-ում պատասխան էր հրապարակել, որտեղ նշում էր. <<Իզուր ես գրառմանդ մեջ նշում Ռուսաստանը։ Մեռանք ասելով՝ այս շարժումը աշխարհաքաղաքական ենթատեքստ չունի, այլ երկրի աջակցություն եւ միջամտություն չունի։ Չունի եւ վերջ։ Դադարացրեք նման երանգավորումը։
Եվ վերջում. Մի քիչ շփվեք ընտրողների հետ, ՀՀ քաղաքացիների հետ։ Մի վախեցեք եւ նրանց ահաբեկիչներ մի անվանեք։ Առերեսվեք իրականությանը։ Սթափվեք, ինչպես կասեր դասականը, գժուկներ»:
Այն ժամանակվա գժուկներն այսօր հակահեղափոխական սև ուժերն են, իսկ դասականի կոչն այս պահին խիստ արդիական է ԱԺ նախագահի պաշտոնում գտնվող Արարատ Միրզոյանի համար:
«Մենք կոշտ դիրքորոշում ունենք աշխարհի բոլոր երկրների կողմից մեր երկրի ներքին գործերին միջամտելու փորձի տեսական հնարավորություն դիտարկելու հետ կապված»,- խորհրդարանում լրագրողների հետ զրույցում հայտարարել է ԱԺ նախագահ Արարատ Միրզոյանն՝ անդրադառնալով ՌԴ դեսպանին ԱԳՆ հրավիրելու հանգամանքին:
«Խոսքը ոչ թե նրա մասին է, որ որևէ երկրի դեսպան չպետք է հանդիպի ՀՀ քաղաքական ներկապնակի որևէ առանձին ներկայացուցչի հետ, ո՛չ, քավ լիցի, ամենևին, բոլորը բոլորին կարող են հանդիպել, խոսքն այն մասին է, որ հանդիպում է մի մարդու, որին շատ լուրջ մեղադրանք է առաջադրված, կա դատական գործընթաց, որի շրջանակներում որևէ այսպիսի հանդիպում, ակնարկ կարող է դիտվել որպես միջամտություն: Ոչ թե դասական քաղաքական գործչի մասին ենք խոսում, այլ մի քիչ այլ, քան դասական քաղաքական գործիչ է, որովհետև շատ լուրջ մեղադրանք կա»,- ասել է Միրզոյանը:
Եվ այս մասին ասում է, ոչ ավել, ոչ պակաս երկրի թիվ մեկ քաղաքական մարմնի ղեկավարը` նույն ինքը ԱԺ նախագահը: Ներողություն, պարոն Միրզոյան, իսկ ո՞ւր մնաց անմեղության կանխավարկածը, չէ որ օրինական ուժի մեջ մտած դատավճիռ դեռևս չկա: Սա մեկ: Դուք ասում էիք, որ շարժումն աշխարհաքաղաքական ենթատեքստ չունի, իսկ այսօր ՌԴ դեսպանին մեղադրում եք ՀՀ ներքին գործերին միջամտելու մեջ: Սա երկու: Իսկապես, եթե հանկարծ աշնանը ՌԴ նախագահ Վլադիմիր Պուտինը Հայաստան կատարելիք այցի ժամանակ հանդիպում ունենա Ռոբերտ Քոչարյանի հետ, ի՞նչ եք անելու, նրա՞ն էլ եք մեղադրելու ՀՀ ներքին գործերին միջամտելու մեջ, թե՞ հրաժարական եք տալու: Դուք կմեղադրեք, իսկ Փաշինյանը կգնա ու կասի` Վլադիմիր Վլադիմիրիչ, մեր հարաբերություններն աննախադեպ ջերմ են, ավելի ջերմ չի լինում: Սա չափազանցություն չէ, կարելի է ընդամնեը նայել Պուտին-Փաշինյան հանդիպումների վերջին տեսագրությունները:
Ներքին գործերին միջամտելու առումով փոքրիկ նկատառում. երբ հարևան երկրի նախկին նախագահ Միխեիլ Սահակաշվիլին իր երկրում հետախուզման մեջ էր, նրան Ուկարինայում ապաստան տվեցին և նա այդ ընթացքում տարբեր դեսպանների հետ հանդիպումներ էր ունենում: Ձեր կարծիքով` նրանք բոլորը միջամտու՞մ էին Վրաստանի ներիքն գործերին: Առաջին նախագահ Լևոն Տեր-Պետրոսյանը բազմիցս հանդիպել է տարբեր դեսպանների և նրանց մոտ դժգոհել ՀՀ իշխանությունից: Դա միջամտությո՞ւն էր մեր երկրի ներքին գործերին:
Ինչ վերաբերում է դասական քաղաքական գործիչ լինել-չլինելուն. քաղաքագիտական տարրական կանոններով` նախկին նախագահները ողջ կյանքում / ողջ կյանք` նշանակում է նախագահ դառնալու օրվանից մինչև մահ/, ամենադասական քաղաքական գործիչներն են: Նրանք այդպիսին կմնան, եթե անգամ դատապարտվեն սահմանադրական կարգի տապալման հոդվածով: Այնպես որ հանգստացեք, սթափվեք և խելքի եկեք գժուկներ. Դուք ներկայացնում եք պետություն, ոչ թե մասնավոր մանկապարտեզ:
Հայկ Դավթյան
Հետևեք մեզ Viber-ում
