Փաշինյանը պետք է շնորհակալություն հայտնի նախկիններին

Եվրասիական տնտեսական հանձնաժողովը հրապարակել է ԵԱՏՄ անդամ երկրների ընթացիկ տարվա հունվար-ապրիլ ամիսների հիմնական սոցիալ-տնտեսական ցուցանիշները: Ըստ այդմ` ներդրումների և տնտեսական աճի մակարդակով՝ Հայաստանը ԵԱՏՄ անդամ երկրների շարքում առաջինն է:

Առաջին եռամսյակի տվյալներով Հայաստանը գրանցել է 7,1 տոկոս տնտեսական աճ: Երկրորդ տեղում Ղրղզըստանն է, որտեղ արձանագրվել է 5,3 տոկոս տնտեսական աճ: Երրորդ տեղում Ղազախստանն է` 3,8 տոկոս աճի ցուցանիշով, հաջորդաբար գալիս են Բելառուսը` 1,1 տոկոս աճով և Ռուսաստանի Դաշնությունը` ընդամենը 0,5 տոկոս աճի ցուցանիշով: Նշված ժամանակահատվածում ներդրումներն աճել են 1,4 տոկոսով: Ընդ որում, այստեղ ևս ամենաբարձր աճն արձանագրվել է Հայաստանում. ԵԱՏՄ հրապարակած տվյալների համաձայն` Հայաստանում ներդրումների աճը կազմել է 10,8 տոկոս:
Պաշտոնական լրահոսով թբկահարվող այս տվյալները լսելուց հետո հեռավոր գյուղերի միամիտ բնակիչները գուցե մի պահ տպավորվեն: Սակյան այն մարդիկ, ովքեր թերթել են ՀՀ ազգային վիճակագրական ծառայության առաջին եռամսյակի սոցիալ-տնտեսական ցուցանիշները, անմիջապես կհասկանան, որ տվյալների ակնհայտ անհամապատասխանություն կա: ԵԱՏՄ հրապարակած վիճակագրությունն իրականում բլեֆ է, որովհետև առաջին եռամսյակի տվյալներով, համաձայն ՀՀ ազգային վիճակագրական ծառայության տվյալների, տնտեսության իրական հատվածում կատարված օտարերկրյա ուղիղ ներդրումների զուտ հոսքերը նվազել են 37 մլրդ դրամով: Այդ դեպքում հարց է առաջանում` ինչպես են աճել տնեսությունն ու ներդրումները, եթե օտարերկրյա ուղղակի ներդրումները նվազել են:

Խոսքն ըստ երևույթին տնտեսության մեջ առկա ստվերի կրճատման մասին է, որն ապահովել է տնտեսության աճ և ներդրումային աճ միաժամանակ: Որպես ասվածի լրացուցիչ վկայություն` բավական է նշել փասը, որ ՀՆԱ-ի ծավալը մեր երկրում չի աճել: Ավելին` նվազել են գյուղատնտեսության և շինարարության ծավալները, իսկ արդյունաբերական արտադրանքի ծավալը աճել է ընդամենը 0,3 տոկոսով: Հետևաբար ԵԱՏՄ ներկայացրած վիճակագրությունը բլեֆ է, որից մեծագույն հրճվանքով ոգևորվել են Հայաստանի իշխանությունները:
Ինչ վերչաբերում է երկրի սոցիալ-տնտեսական վիճակին ընդհանրապես` Հայաստանում աղքատության ցուցանիշը 30 տոկոս է, այն դեպքում, երբ ընդամենը 0,5 տոկոս աճ ունեցող Ռուսաստանն ունի 13 տոկոս աղքատություն: Այսինքն` կարևորը ոչ թե լոկ թվերն են, այլ այն թվերը, որոնք արտացոլում են կյանքի որակը: Իսկ այդ առումով Հայաստանն ուրախանալու բան չունի, որովհետև աղքատության նվազում գոնե մեկ տոկոսով չկա:
Ինչ վերաբերում է ստվերի կրճատման հաշվին արձանագրված տնտեսական աճին, նախ դա մեկանգամյա էֆեկտ արտահայտող գործողություն է: երկրորդ` ստվերային տնտեսության բացահայտումը, որն այսօր ներկայացվում է որպես աճ, իրականում նախորդ իշխանությունների աշխատանքի արդյունքն է: Այսինքն` այս նկարված թվերի համար Նիկոլ Փաշինյանը պետք է գոնե ազնվություն ունենա և շնորհակալություն հայտնի նախկիններին, այլապես երկիրն ընդհանրապես ցույց տալու բան չէր ունենա:

Հայկ Դավթյան