Նիկոլ Փաշինյանն արագացնում է իր դեմ ստեղծվող մոբիլիզացիան
Երկու օր առաջ մենք գրել էինք, որ Արցախի նախագահ Բակո Սահակյանն իր մոտ է հրավիրել Արցախի անվտանգության խորհրդի քարտուղար Վիտալի Բալասանյանին և առաջարկել ազատման դիմում գրել: Բակո Սահակյանը իր առաջարկությունը հիմնավորել է` նշելով, թե դա Հայաստանի իշխանության կողմից բարձրացված պահանջ է:
Այսօր արդեն պաշտոնապես հրապարակվեց Արցախի Հանրապետության նախագահ Բակո Սահակյանի հրամանագիրը, որով Վիտալի Բալասանյանն ազատվել է Արցախի Հանրապետության անվտանգության խորհրդի քարտուղարի պաշտոնից:
Մեզ հայտնի են դարձել նոր մանրամասներ Բալասանյանի ազատման վերաբերյալ: Բակո Սահակյանը Վիտալի Բալասանյանի հետ հանդիպման ժամանակ ասել է, որ եթե Բալասանյանն ազատման դիմում չգրի, ինքն ստիպված է լինելու ազատել նրան, հակառակ պարագայում խնդիրներ կլինեն Հայաստանի իշխանությունների հետ: Վիտալի Բալասանյանը հրաժարվել է դիմում գրել և Բակո Սահակյանին առաջարկել` վարվել այնպես, ինչպես հարմար կգտնի: Մեկ օր անց հրապարակված Արցախի նախագահի հրամանագիրը ցույց տվեց, որ Բակո Սահակյանը որոշում է կայացրել` ազատել Վիտալի Բալասանյանին: Թերևս դժվար է եղել դիմակայել պաշտոնական Երևանի ճնշումներին:
Մեկնաբանելով Բալասանյանի ազատման մասին որոշումը` Արցախի նախագահի աշխատակազմի ղեկավարի տեղակալ Դավիթ Բաբայանն ասել է, որ որևէ քաղաքական ենթատեքստ չկա կատարվածի մեջ. <<Պպարզապես փոփոխություներ են տեղի ունեցել, կադրային տեղաշարժ>>: Բաբայանի խոսքերով` կադրային համակարգը դինամիկ համակարգ է և պարբերաբար փոփոխությունների է ենթարկվում: Մասնավորապես Վիտալի Բալասանյանի պաշտոնանկությունը Բաբայանը պայմանավորել է այն հանգամանքով, որ նա մտադիր է մասնակցել Արցախի նախագահական ընտրություններին, դրանով պայմանավորված էլ որշում է կայացրել հրաժարական տալ: <<Դա եղել է հենց Բալասանյանի որոշումը: Նա որոշել է մտնել քաղաքական դաշտ, ավելի ակտիվորեն ներգրավվել քաղաքական գործընթացներում>>,- մեկնաբանել է Արցախի նախագահի ներկայացուցիչը:
Վիտալի Բալասանյանը պատրաստվում է մասնակցել 2020 թվականին Արցախում կայանալիք նախագահական ընտրություններին, և օրենքը թույլ չի տալիս Անվտանգության խորհրդի քարտուղարին զբաղվել քաղաքական գործընթացներով: Սակայն նախագահական ընտրություններին բավական ժամանակ կա, և քարոզարշավն էլ պաշտոնապես դեռևս չի մեկնարկել: Ուստի Վիտալի Բալասանյանը կարող էր առնվազն մինչև քարոզարշավը պաշտոնավարել:
Արցախում կատարվող պաշտոնանկությունները արմատական թելերով կապված են հայաստանյան քաղաքական գործընթացների հետ: Ակնհայտ է, որ Նիկոլ Փաշինյանը քայլեր է ձեռնարկում` սինխրոնացնելու Արցախի իշխանության գործելաոճն ու մոտեցումները սեփական գործելաոճին: Վերջին շրջանում առավել քան ակնհայտ էին պաշտոնական Երևանի և Ստեփանակերտի հակասությունները տարբեր հարցերի շուրջ: Դա դրսևորվեց երկրորդ նախագահ Ռոբերտ Քոչարյանի` կալանքից ազատման միջնորդության ժամանակ ևս: Կոնկրետ Վիտալի Բալասանյանի և Նիկոլ Փաշինյանի միջև անգամ հեռակա բանավեճ ծավալվեց: Ընդ որում, Բալասանյանը հրապարակավ քննադատեց Փաշինյանի վարած քաղաքականությունն Արցախի հարցում: Թերևս սպասելի էր, ինչու չէ, նաև բնական, որ Հայաստանի կողմից Արցախում տեղի ունեցող քաղաքական գործընթացները վերահսկելու քայլեր անպայման ձեռնարկվելու են: Ավելի շրջահայաց լինելու դեպքում, սակայն, Նիկոլ Փաշինյանը կհրաժարվեր կտրուկ քայլերից, փոխարենը գործի կարելի էր դնել թավշյա մոտեցումները: Պաշտոնանկությունների գնալով` Նիկոլ Փաշինյանը ի ցույց դրեց, որ ինքն ամենևին էլ չի պատրաստվում հանդուրժել քաղաքական բազմակարծությունն ու այլախոհությունը իշխող համակարգում: Այս առումով նա շատ նման է ՀՀ նախկին իշխանություններին: Բայց այստեղ մի շատ կարևոր ռիսկ կա, որը Փաշինյանը թերևս հաշվի չի առել: Արցախի իշխանությունները, ի տարբերություն Հայաստանի նախկին իշխանությունների, վարկաբեկված չեն. նույն Վիտալի Բալասանյանը հարգված գեներալ է, ազատամարտի հերոս, ում անունը երբեք չի կապվել կոռուպցիայի ու թալանի հետ: Վիտալի Բալասանյանը և Արցախի` իշխանությունից հեռացված մնացած ուժերը հազիվ թե հանգիստ նստեն տեղները: Իշխանության մեջ գտնվելով` նրանք ինչ-որ իմաստով վերահսկելի են, մինչդեռ իշխանությունից հեռացվելուց հետո նրանք կարող են մոբիլիզացնել ուժերը` Նիկոլ Փաշինյանի դեմ ճակատ ձևավորելու հարցում:
Հայկ Դավթյան
Հետևեք մեզ Viber-ում
