Մտավախություն ունի` գազի գնի հետ կապված

«Ես չեմ կարող ասել, որ մենք ունենք վերջնական պայմանավորվածություններ և այդ պայմանավորվածություններն այս փուլում չէին էլ կարող ամփոփվել»,- այսօր ԱԺ-ում լրագրողների հետ զրույցում հայտարարել է փոխվարչապետ Մհեր Գրիգորյանը՝ խոսելով գազի գնի մասին:
Նա հույս է հայտնել, որ գնի բարձրացում չի լինի. «Կան բազմաթիվ ծախսեր, որոնց շուրջ նախնական պայմանավորվածություն կա, որ դրանք պետք է նվազեցվեն օպտիմիզացիայի հաշվին»:
Մինչ այդ` Պետերբերուրգ կատարած այցի շրջանակում Նիկոլ Փաշինյանը Ռուսաստանի նախագահի Պուտինի հետ էր քննարկել է Հայաստանին մատակարարվող գազի գինը: Այդ մասին վարչապետ Փաշինյանն ասել էր «ՌԻԱ Նովոստիին» տված հարցազրույցում:
«Դա, իսկապես, շատ կարևոր հարց է մեր հարաբերություններում, և այդ պատճառով այն քննարկում ենք նաև Եվրասիական տնտեսական միության շրջանակներում: Կարծում եմ՝ պետք է հաշվի առնել այս հարցի բոլոր նրբությունները», - ասել է Փաշինյանը, ընդգծելով՝ անհրաժեշտ է գազի այնպիսի գին որոշել, որը չի կոտրի Հայաստանում արձանագրված տնտեսական աճի դրական դինամիկան:
«Կարծում եմ՝ կկարողանանք ընդհանուր լեզու գտնել, չէ՞ որ մենք Ռուսաստանի հետ առանձնահատուկ հարաբերություններ ունենք, և կարծում եմ, որ պետք է լուծենք նաև գազի ռազմավարական հարցը», - ասել էր Հայաստանի վարչապետը:
Փոխվարչապետի` ԱԺ-ում արած հայտարարության մեջ որոշակիորեն կարծես թե բացվում են Պուտին-Փաշինյան բանակցության գազային հատվածի փակագծերը:Եթե գազի ներքին գնի չբարձրացնելը պայմանավորված է լինելու համակարգի օպտիմիզացիայի հաշվին արված տնտեսումներով, ուրեմն ոչ մի պայմանավորվածություն էլ  ձեռք չի բերվել: Միակ պայմանավորվածությունը, որն այս պահին շատ հստակ է, այն մասին է, որ 2019 թվականի հունվարի 1-ից Հայաստանն ավելի բարձր գին է վճարում գազի դիմաց` սահմանագլխին:
Հիշեցնենք, որ 2018 թվականի վերջին օրը Փաշինյանը հայտնել էր, որ ռուսական գազի գինը սահմանին կփոխվի, սակայն բնակչության համար ներքին սակագները նույնը կմնան։ Ավելի ուշ «Գազպրոմը» տեղեկացրել էր, որ «Գազպրոմ Արմենիա» դուստր ձեռնարկությունը կապույտ վառելիք է գնելու հազար խմ–ի դիմաց 165 դոլարով` նախկին 150 դոլարի փոխարեն։ Այնուհետև կառավարությունից պարզաբանել էին, որ սակագինը սպառողների համար կպահպանվի «Գազպրոմ Արմենիայի» ծախսերի կրճատման հաշվին։ Գազի սակագինն այսօր 1000 խմ–ի դիմաց 290 դոլար է։
Գազի գնի մասին խոսակցություններից կարելի է` ենթադրել, որ ՀՀ իշխանությունը սակագնի նոր ն բարձրացման մտավախություն ունի:

Հայկ Դավթյան