Զորավարժություն՝ զորավարժության հետևից. Ինչու է լռում Փաշինյանը

Թուրքիայի և Ադրբեջանի զինված ուժերը համատեղ զորավարժություն են սկսել Նախիջևանի Ինքնավար Հանրապետությունում:

«Անադոլու» գործակալության փոխանցմամբ, «Անսասան եղբայրություն 2019» զորավարժությանը մասնակցում է 5 հազար զինվոր, շուրջ 200 տանկ և հետևակի զրահապատ մեքենա, 180 հրթիռ և թնդանոթ, 21 ինքնաթիռ և ուղղաթիռ, ներգրավված են այլ զինատեսակներ ևս:

Պարբերաբար անցկացվող զորավարժությունները միտված են երկու երկրների զինված ուժերի փորձի փոխանակմանն ու համատեղ ռազմական գործողություններ իրականացնելու հմտությունների կատարելագործմանը: Ծրագրի ընթացքում զինվորները պայմանական հակառակորդի ուղղությամբ թիրախային հարվածներ կիրականացնեն: Զորավարժությունը կշարունակվի մինչև հունիսի 11-ը:

Սա արդեն վերջին մի քանի ամիսների ընթացքում երրորդ զորավարժություն է:
Ադրբեջանը շատ հստակ ուղերձ է հղում թե՛ միջազգային հանրությանը, թե՛ Հայաստանին: Այն է՝ Բաքվի պատկերացրած ցանկալի լուծում, կամ՝ պատերազմ:
Այդ ուղղությամբ սրացումն արդեն պատրաստ է: Եվ այս իրավիճակը սրվում է թե՛ համանախագահների տարածաշրջանային այցից հետո, թե՛ Փաշինյան-Պուտին հանդիպումից հետո: Այսինքն, Ալիևը հասկացնում է, որ ոչինչ իրեն չի անհանգստացնում, ցանկացած պահի նա կարող է դիմել պատերազմի սանձազերծման:

Հունիսի 2-ից 8-ն ընկած ժամանակահատվածում արցախա-ադրբեջանական հակամարտ զորքերի շփման գոտում հակառակորդը հրադադարի պահպանման ռեժիմը խախտել է շուրջ 250 անգամ, որի ընթացքում, տարբեր տրամաչափի հրաձգային զինատեսակներից, հայ դիրքապահների ուղղությամբ արձակել է ավելի քան 2500 կրակոց:

Արցախի ՊՆ լրատվական ծառայությունից տեղեկացրեցին շաբաթ օրը, որ բացի հրաձգային զինատեսակներից, հունիսի 4-ին ՊԲ հյուսիսային հատվածում տեղակայված մարտական դիրքերի ուղղությամբ ադրբեջանական զինուժը կիրառել է նաև 60 միլիմետրանոց ականանետ (4 արկ) և ՀԱՆ-17 տիպի նռնականետ (25 արկ): «ՊԲ առաջապահ զորամասերը հակառակորդի սադրանքը լռեցնելու համար դիմել են համապատասխան գործողությունների՝ շարունակելով վստահորեն իրականացնել իրենց առջև դրված մարտական խնդիրը», -ասված է ԱՀ ՊՆ լրատվական ծառայության հաղորդագրության մեջ:

Ադրբեջանի հերթական զորավարժություններին, վատ չէր լինի, եթե անդրադառնար Նիկոլ Փաշինյանը, ով մինչև վերջերս Ալիևի հետ բանակցությունները կառուցողական էր որակել:

Հետաքրքիր է՝ ինչո՞ւ է լռում...

Մետաքսյա Շալունց