Նիկոլ Փաշինյանի պատգամավոր բարեկամի մեքենայի թալանը օրուկեսվա մեջ բացահայտվում է, իսկ իմ հոր գերեզմանի անարգման գործը, բացահայտելու փոխարեն, փակում են. գյումրեցի Լիլիթը չի լռելու

Hayeli.am-ը բողոք է ստացել Գյումրու բնակիչ Լիլիթ Աղեկյանից` Շիրակի մարզի իրավապահ մարմինների անգործության վերաբերյալ: Լիլիթը պատմում է, որ երկու տարի առաջ տեղի է ունեցել իր և իր ընտանիքի արժանապատվությունը նսեմացնող միջադեպ` անարգվել է հոր` հայտնի բժիշկ Հրաչիկ Աղեկյանի գերեզմանը, որը գտնվում է Գյումրու թիվ 2 քաղաքային գերեզմանատանը. «Սովորականի պես այցելեցի հայրիկիս գերեզմանին և տեսա, որ գերեզմանոցն ընդհանուր տարածքից առանձնացնող պարսպի սալաքարերը քանդված, ջարդված լցված են գերեզմանի կողքը: Եթե նպատակը գողությունը լիներ, պետք է գոնե այդ քարերը կամ ինչ-որ մի ուրիշ բան տարած լինեին, բայց ոչ մի բան գողացված չէր, քարերն էլ ջարդված, գերեզմանի կողքն էին լցված: Այսինքն` իմ համար պարզ էր, որ գերեզմանի անարգում է:

Անմիջապես դիմեցի ոստիկանություն, հարուցվեց քրեական գործ: Փորձագիտական երեք եզրակացությունների համաձայն` եղել է տեխնիկական միջամտություն, այսինքն` պարսպի սալաքարերը լինգով ջարդվել, բերվել լցվել են կողքը: Չնայած այս եզրակացություններին` քրեական գործը 49 օր հետո` 2017 թվականի օգոստոսի 31-ին, Շիրակի մարզային քննչական վարչության քննիչ Արմեն Գյոզալյանի և Շիրակի մարզի դատախազի տեղակալ Արտյոմ Ավետիսյանի կողմից կասեցվեց` հանցանքը կատարող անձին չհայտնաբերելու հիմնավորմամբ: Ես, ինչպես այն ժամանակ, այնպես էլ այժմ պնդում եմ, որ իրավապահ մարմինները հանցագործությունը բացահայտելու ուղղությամբ որևէ քայլ չեն կատարել: Ընդ որում, ես տվել եմ կասկածյալների անուններ, որովհետև ժամանակին ինձ որոշ մարդիկ առաջարկել էին` հանել պարիսպը, որպեսզի իրենք այդ տարածքում նստարաններ տեղադրեն: Ես տրամաբանական հարց եմ տալիս` ո՞ւմ էր պետք քանդել այդ պարիսպը, պիտի որոշակի շահագրգռություն լիներ, չէ՞: Բայց իմ ասածներն իսպառ անտեսվեցին»,- պատմում է Լիլիթ Աղեկյանը:

Նրա խոսքով` ինքը 2 անգամ բաց նամակով դիմել է նախկին նախագահ Սերժ Սարգսյանին, նամակներ է գրել նախկին ոստիկանապետ Վլադիմիր Գասպարյանին և Քննչական կոմիտեի նախկին նախագահ Աղվան Հովսեփյանին, բայց ոչ մի քայլ չի ձեռնարկվել հանցագործությունը բացայատելու ուղղությամբ: 2018 թվականի հեղափոխությունից հետո Լիլիթ Աղեկյանը դիմում է վարչապետ Նիկոլ Փաշինյանին, և մոտ 1 տարի առաջ կասեցված գործը 2018 թվականի հուլիսի 4-ին վերաբացվում է: Սակայն վերաբացումից 10 ամիս անց` 2019 թվականի մայիսի 21-ին, Շիրակի մարզային դատախազի տեղակալ Արտյոմ Օվսյանի և քննիչ Միշա Բիշարյանի կողմից գործը կրկին փակվում է` նախկին հիմնավորմամբ, որ հնարավոր չի եղել բացահայտել հանցանքը կատարողին: Սա տուժող կողմի ներկայացուցիչ Լիլիթը համարում է հեղափոխական Հայաստանի ամենամեծ ամոթը և վստահ է, որ Շիրակի մարզի իրավապահները չունեն բավարար ունակություն և ցանկություն` բացահատելու իր հոր հիշատակն անարգող հանցագործությունը. «Երևի այս գործից քյար չունեն, դրա համար էլ շահագրգիռ չեն բացահայտել,- կարծում է Լիլիթը և շարունակում:- Ես չեմ պատրաստվում հանգիստ նստել տեղս, պայքարելու եմ մինչև վերջ: Իմ հայրը հարգված մարդ է եղել, մեր ընտանիքն այս անարգանքը չի կարող մոռանալ»:

Քաղաքացին կարծում է, որ եթե Շիրակի մարզի իրավապահները ակնհայտ անգործություն են դրսևորում, ապա իրավապահ համակարգի պատասխանատուները և կոնկրետ վարչապետ Նիկոլ Փաշինյանը, ում ինքը դիմել է, պարտավոր են քննչական խումբ ուղարկել Երևանից, որպեսզի իր և իր ընտանիքի իրավունքները պաշտպանվեն. «Այդ ոն՞ց է ստացվում, որ ոստիկանությունը Նիկոլ Փաշինյանի պատգամավոր բարեկամի մեքենայի թալանի գործը օրուկեսվա մեջ է բացահայտում, իսկ այս գործը չի կարող 2 տարվա ընթացքում բացահայտել, կամ էդ ո՞նց է՝ մեր իրավապահները հաջողությամբ պահում-պահպանում են սորոսի գրասենյակը, իսկ մեր իրավունքները` ոչ: Չեղանք չեղանք՝ մի սորոսի գրասենյակի չափ էլ հա՞ չեղանք: Սա է Ձեր պահած իրավապահ համակարգի պատկերը: Իմ հայրը այս քաղաքում ճանաչված մարդ է եղել, ավանդ ու անուն ունի, մենք պատահական ընտանիք չենք: Ես թույլ չեմ տալու` տրորել իմ ընտանիքի պատիվը` դա չի լինելու»,- գյումրեցու պատվախնդրությամբ նշում է Լիլիթը և ասում, որ իր պահանջը հետևյալն է. «Փոխել քննիչին ու հսկող դատախազին, ծառայողական քննություն սկսել նրանց նկատմամբ՝ ճշտելու ինչո՞ւ նախաքննության ընթացքում չեն ձեռնարկել բավարար միջոցներ հանցագործին բացահայտելու համար: Ինչո՞ւ են հենց այս փուլում կասեցրել գործը, ո՞րն է իրենց առաջ քաշած վարկածը կատարվածի վերաբերյալ, միջոցներ ձեռնարկել ոստիկանության «Կումայրի» բաժնի ոստիկանների նկատմամբ և, իհարկե, գործը կասեցումից հանել ու արագ բացահայտել այն»:

Նշենք, որ հուլիսին լրանում է քրեական գործի հարուցման 2-րդ տարին: