Արտակ Զեյնալյանի պաշտոնանկության իրական պատճառները
Արդարադատության նախարար Արտակ Զեյնալյանը պաշտոնից հրաժարականի դիմում է ներկայացրել: Այդ մասին նա տեղեկացրել է իր ֆեյսբուքյան էջում: «․․․Արդարադատության նախարարի պաշտոնից հրաժարականի դիմում եմ ներկայացրել: Մեր ժողովրդի համար այս պատմական ժամանակահատվածում նախարարի մանդատ ստանձնելը գերպատասխանատու, բայց և իրավապաշտպանի գործունեություն ծավալելու ընթացքում ի հայտ եկած իրավական խնդիրները քայլ առ քայլ լուծելու հնարավորություն ունենալուն միտված քայլ էր: Գոհ եմ այդ քայլից, շնորհակալ եմ Հայաստանի Հանրապետության վարչապետ Նիկոլ Փաշինյանին արդարադատության նախարարի պաշտոնում իմ թեկնածությունն առաջարկելու համար, շնորհակալ եմ Նախարարության աշխատակիցներին համատեղ հետաքրքիր, արգասաբեր ու պատասխանատու աշխատանքի համար: Շնորհակալ եմ միջազգային գործընկերներին, քաղաքացիական հասարակության ներկայացուցիչներին համատեղ աշխատանքի համար: Վստահ եմ՝ լավ է լինելու, … սակայն, եթե լավ չլինի՝ լինելու է՝ շատ լավ»,- գրել է նա:
Զեյնալյանի հայտարարությունը որևէ հստակ պատկերացում չի տալիս նրա հրաժարականի պատճառների մասին, այնինչ տվյալ ժամանակահատվածում, երբ իշխանությունը նախաձեռնել է անցումնային արդարադատության գործընթաց, արդեն ուշագրավ է դառնում նախարարի հրաժարականը։ Քաղաքական շրջանակներում վարկածներ են պտտվում, թե ինչ պատճառով նախարարը հեռացավ։ Ըստ այդ վարկածների՝ Արտակ Զեյնալյանը հակադրվել է անցումնային արդարադատության Նիկոլ Փաշինյանի պատկերացումներին, ասել է, որ վեթինգ իրականացնել հնարավոր չի լինի առանց սահմանադրական փոփոխությունների, քանի որ միջազգային կառույցները սանկցիաներ կկիրառեն Հայաստանի դեմ, իսկ լավագույն դեպքում թույլ չեն տա գործընթացը կյանքի կոչել։ Բայց Փաշինյանը ասել է, որ գործընթացը չի կարող ուշ սկսվել, պետք է անել հնարավորինս արագ։ Բացի այդ Արտակ Զեյնալյանը Նիկոլ Փաշինյանին զգուշացրել է նաեւ դատարանների մուտքերն արգելափակելու ժամանակ՝ ասելով, որ դրան վատ ուղերձ է հաջորդելու արտաքին աշխարհից։ Վարկածներից մեկի համաձայն՝ Նիկոլ Փաշինյանը Զեյնալյանին «պատժել» է ընդդիմադիր պահվածքի համար եւ վեթինգի նախագիծը հանձնարարել է պատրաստել խորհրդարանում։
Ընդհանրապես Արտակ Զեյնալյանը վերջին ամիսներին իր անհամաձայնությունն է հայտնել շատ գործընթացներում , իսկ այս հրաժարականը նշանակում է, որ նույնիսկ վարչապետի կաբինետի անդամների համար ընդունելի չէ իր որոշումները։ Իմ Քայլը խմբակցության ղեկավար Լիլիթ Մակունցը նույնպես չի թաքցրել, որ Զեյնալյանի հետ կապված ֆրակցիայում մտահոգություններ են եղել։ Սակայն, Մակունցի խոսքով՝ իրենց այդ մտահոգությունները վարչապետին կամ փոխվարչապետերին չեն ներկայացրել. «Մենք հարցը քննարկել ենք խմբակցության նիստերից մեկի ժամանակ։ Ոչ թե քննարկել ենք, այլ հնչել է մտահոգություն, հատկապես այն լայնածավալ անվստահության ակցիայից հետո, որը տեղի է ունեցել ՀՀ քաղաքացիների կողմից, այս համատեքստում հնչել էին այդ մտահոգությունները»։Հիշեցնենք, որ Նիկոլ Փաշինյանի կոչով մայիսի 20–ին դատարանների մուտքերը արգելափակելուց հետո «Իմ քայլի» նիստերից մեկում, ըստ մամուլի հրապարակումների, պատգամավորները դժգոհություն էին հայտնել Արտակ Զեյնալյանից՝ պնդելով, որ ԲԴԽ–ն ու ՍԴ–ն իրենք առաջարկում են ցրել, իսկ Զեյնալյանն ասում է, որ դա հնարավոր չէ։«Հանրապետություն» կուսակցության նախագահ Արամ Սարգսյանը չի մեկնաբանել Արդարադատության նախարար Արտակ Զեյնալյանի հրաժարականը, հիշեցրել է, որ Արտակ Զեյնալյանը նախարար նշանակվելուց հետո կասեցրել է իր անդամակցությունը «Հանրապետություն» կուսակցությանը:
Անի Սահակյան
Հետևեք մեզ Viber-ում
