Մանվել Գրիգորյանը չի ներկայացել դատարան.նիստը հետաձգվեց (video)

Արդեն տեղեկացրել ենք,որ Երևանի ընդհանուր իրավասության դատարանի Կենտրոն և Նորք Մարաշի նստավայրում Մանվել Գրիգորյանի և Նազիկ Ավդալյանի գործով դատական նիստին Մանվել Գրիգորյանը չի ներկայացել դատարան: Մանվել Գրիգորյանի պաշտպան Լևոն Բաղդասարյանը նշեց, որ իր պաշտպանյալի դատարան չներկայանալու պատճառը քրեակատարողական հիմնարկում կատարված անօրինականությունն է:

«Մանվել Գրիգորյանը ստացիոնար բուժում է ստանում «Նաիրի» ԲԿ -ում, սակայն քրեակատարողական հիմնարկից տեղեկացրել են, որ դատապարտյալների հիվանդանոցում կան բոլոր անհրաժեշտ պայմանները՝ բուժումն այնտեղ շարունակելու համար: Մանվել Գրիգորյանը դուրս է գրվել «Նաիրի» ԲԿ-ից` պայմանով, որ նա պետք է ստանա ստացիոնար բուժում և գտնվի բժիշկների մշտական հսկողության ներքո: Մանվել Գրիգորյանը, օգտվելով իր սահմանադրական իրավունքից, հրաժարվել է դատապարտյալների հիվանդանոցում բուժում ստանալուց: Նա հրաժարվել էր նաև 3 ամիս առաջ, 4 ամիս առաջ: Եվ քանի որ նա հրաժարվում է, նրան տեղափոխում են Կնետրոն քրեակատարողական հիմնարկ, որտեղ նրան պահում են 2-3 ժամ: Եվ քանի որ տեսնում են, որ այնտեղ նրան պահել չեն կարող, ստանալով համաձայնությունը, գիշերը 11-ին նրան տեղափոխում են դատապարտյալների հիվանդանոց: Մինչև լուսադեմ 4-5 պաշտպանական կողմին արգելել են տեսակցել: Տեսակցել կարողացանք ժամը 6-ին, և կրկին պրն Գրիգորյանը տեղեկացրեց, որ հրաժարվում է լինել այնտեղ»:

Այս մասին տեղեկացնելու են նաև Եվրոպական դատարանին, որտեղ ևս հարուցված է գործ,-ասաց պաշտպանը: