Աչքը տեսածից է վախենում
«Իմ քայլը» խմբակցության պատգամավոր Քրիստինե Պողոսյանը պատրաստվում է նոր նախագիծ դնել շրջանառության մեջ, որով հոգեկան խնդիրներ ունեցողներին կարգելվի դառնալ պատգամավոր: Այսօր լրագրողների հետ զրույցում Պողոսյանը հարցին՝ ինչո՞ւ է նման մտահղացում առաջացել, պատասխանեց. «Ես իմ պարտքն եմ համարում, երբ վստահության քվե եմ ստացել մարդկանց կողմից այստեղ ներկայացնելու իրենց իրավունքները, առաջիկա 5 տարվա մեջ անել այնպիսի փոփոխություններ, որ հինգ տարի հետո ՀՀ-ն ունենա էլ ավելի լավ ԱԺ, եւ է՛լ ավելի լավ կառավարություն: Դրա համար անհրաժեշտ բոլոր՝ թեկուզ ցավոտ փոփոխությունները ես պատրաստ եմ ինքս նախաձեռնել եւ առաջնորդել՝ անկախ նրանից, թե դա ինչ արձագանք կունենա: Ես կարծում եմ, որ մենք մանդատ ենք ստացել այստեղ գալու՝ հենց փոփոխություններ կատարելու, երբեմն նույնիսկ հեղափոխական եւ դրանցից մեկը համարում եմ դա:
Գոյություն ունեն պաշտոններ, որոնց համար որոշակի հիվանդությունների դեպքում անգործունակ են ճանաչվում եւ թույլ չի տրվում աշխատել՝ դատավորներ, դատախազներ, ուսուցիչներ: Եթե դատավորն ու դատախազը չեն կարող աշխատել, ինչպե՞ս կարող է օրենսդիր մարմնում լինի մի մարդ, ով չի անցել այդ սահմանափակումների միջով եւ կարող է օրենքի նախագիծ բերել, քվեարկել եւ այլն: Եթե վարորդական իրավունք ստանալու համար դա պարտադիր է, ինչպե՞ս կարող է պատգամավոր դառնալու համար չլինել»,-հանգամանալից բացատրել է նա տեղեկացնելով, որ հիմա գործընկերների հետ աշխատում է նախագծի վրա, որոշ փոփոխություններ է արել: Առանցքում լինելու է հոգեկան խնդիրներ ունենալու սահմանափակումը, բայց նաեւ ավելացվել է, որ պարտադիր բարձրագույն կրթություն ունենալն է անհրաժեշտ՝ պատգամավորի համար. «Եթե կա մարդ, ով դրա հետ համաձայն չի, ես կուզեմ հիմնավորումները լսել»:
Քրիստինեն այն պատգամավորն է, որը Նիկոլ Փաշինյանի նկատմամբ անասելի
զգացումով է լցված, ով կառավարության ծրագրի ներկայացման ժամանակ հրապարակավ խոստովանեց, որ եթե Փաշինյանը մեկ բառ էլ գրեր, միեւնույն է, ինքը անվերապահ հավատալու էր նրան:
Ահա, հոգեկան այսպիսի հավասարակշիռ էակը այսօր եկել է այն համոզման, որ պետք է փսիխո-թեստ անցկացնել այն թեկնածուների մոտ, որոնք պատրաստվում են պատգամավոր դառնալ: Ինչպես ասում են՝ աչքը տեսածից է վախենում, մի իշխանության մեջ, երբ Մշակույթի ոլորտի պատասխանատու կարող է նշանակվել մշակույթից կիլոմետրերով հեռու մի աղջնակ ու հայտարարի, թե մշակույթն իր մեջ, մի իշխանությունում, որտեղ ԱԺ նախագահ աշխատի մեկը, որը հրապարակավ հայտարարի, թե օդում կախված լուրերով մանկական օրգաններ են մանկատներից վաճառում, մի իշխանություն, որի վարչապետը կարող է լայվիից ամբողջ կկորդով ճչալ, թե ասֆալտին կփռի, պատերին կծեփի, կհայտարարի օտարերկրյա գործակալների մասին ու ոչ մի քալ չի անի, երբ փոխթաղապետը սկանդալային գրառում կանի ու կասի, թե հեռախոսը գողացել էին, ինքը տեղյակ չէ գրառումից ու կշարունակի մնալ նույն պաշտոնում…
Սրանք այս իշխանության գժության փոքրիկ դրսեւորումներն են, տեսնել այս ամենը ու չմտածել օրենքի տեսք տալու մասին, համաձայնեք անհնար է: Ավելին, եթե կուզեք այս պահանջը պետք է տարածվի ոչ միայն պատգամավորների, այլ պետական պաշտոն զբաղեցնող ցանկացած քաղաքացու վրա: Այնպես որ ի գործ, ժամանակն է իշխանությունը մաքրել խելագառության կանխավարկածով առաջնորդողներից:
Անի Սահակյան
Հետևեք մեզ Viber-ում
