Վեթինգը հետաձգվում է. Փաշինյանի թիմում չեն հաշվարկել
Անցած շաբաթ Իմ Քայլը խմբակցության ղեկավար Լիլիթ Մակունցը հայտարարեց, թե վեթինգի նախագիծը պատրաստման փուլում է:
Գրազ կգանք, որ տիկին Մակունցը կամ ինչ որ բան լավ չի տիրապետում, կամ ճիշտ չի խոսում: Քանզի դատական իշխանությունը վեթինգի ենթարկելուց առաջ պետք է նախ Սահմանադրություն փոխել:
Ռոբերտ Քոչարյանի կալանքը փոխելուց հետո Նիկոլ Փաշինյանը ազդարարեց դատական իշխանությունը բարեփոխելու մասին, ասաց, որ վեթինգ են իրականացնելու:Միջազգային պրակտիկայում վեթինգը համարվում և կիրառվում է որպես անցումային արդարադատության իրականացման տեսակ, որի միջոցով իրականացում է պետական համակարգի պաշտոնատար անձանց գնահատում: Հատկանշական է, որ հիմնականում այն կիրառվում է այն երկրներում որոնք գտնվում են պատերազմական, հետպատերազմական կամ ավտորիտար համակարգերից ձերբազատման անցումային շրջանում:
Հաճախ վեթինգը նույնականացնում եմ լյուստրացիայի հետ: Ներկայումս վեթինգի ներդրման գործընթացը շարունակվում է Ալբանիայում, ընդ որում՝ այդ գործընթացը մեկնարկել է 2014 թ-ից, որի հիմնական պատճառ է հանդիսացել Եվրոինտեգրման գործընթացի խթանումը:
Բանն այն է, որ Ալբանիայի արդարադատության իրականացման համակարգը բացասաբար էր գնահատվել Եվրոպական Միության համապատասխան զեկույցներում: Վեթինգի ներդրման երկարատև գործընթացի արդյունքում տեղի են ունեցել՝ սահմանադրական փոփոխություններ, փոփոխվել են մի շարք օրենքներ և ընդունվել է «Դատավորների և դատախազների անցումային վերագնահատման մասին» օրենքը:
Հայաստանում եւս վեթինգը կյանքի կոչելու համար անհրաժեշտ կլինեն՝ սահմանադրական փոփոխություններ, քանզի ՀՀ Սահմանադրության 7-րդ գլուխը՝ «Դատարանները և Բարձրագույն դատական խորհուրդը» կարող է փոփոխել միայն հանրաքվեի արդյունքում, փոփոխություններ «Դատական օրենսգիրք» սահմանադրական օրենքում և մի շարք այլ օրենքներում, հնարավոր է նաև նոր օրենքի ընդունման անհրաժեշտություն , փոխկապակցված շղթայով նաև նախագծերի վերաբերյալ եզրակացություն պետք է ներկայացնի Վենետիկի հանձնաժողովը, ինչը նույնիսկ մեծ ցանկության պարագայում անընդունելի է իրականացնել կարճաժամկետ կտրվածքում:
Իսկ եթե այդ գլուխը չի փոխվում, ապա գործող կարգավորումներով դատավորներին վեթթինգի կարող է ենթարկել միայն մեկ մարմին՝ ԲԴԽ-ն: ԲԴԽ-ին է վերաահված դատավորներին կարգապահական տույժերի ենթարկելու, ազատելու եւ այլ լիազորություններ, այլ մարմին չի կարող նման գործառույթ ստանձնել, ցանկացած որոշում կդառնա հակասահմանադրական: Իսկ սահմանադրական փոփոխությունները հեշտ բան չեն, դրանք մեկ ամսում, անգամ մեկ տարում դժվար է կազմակերպել:
Անի Սահակյան