Զանգ ընկերոջը. Պուտինի ու Ալիևի «նվերը» Փաշինյանին

Ռուսաստանի նախագահ Վլադիմիր Պուտինը հեռախոսազրույց է ունեցել Ադրբեջանի իր գործընկեր Իլհամ Ալիևի հետ, հաղորդում են ռուսաստանյան գործակալությունները՝ հղում անելով Կրեմլի հաղորդագրությանը:

Կրեմլի տարածած հաղորդագրության մեջ նշվում է, որ կողմերը քննարկել են ռուս-ադրբեջանական գործակցությանը և սպասվող պայմանագրերին վերաբերող հարցեր: «Քննարկել են հարցեր՝ ռուս-ադրբեջանական ակտիվ զարգացող գործակցության և տարբեր մակարդակներում սպասվող պայմանագրերի վերաբերյալ»,- ասվում է հաղորդագրության մեջ: Նշվում է, որ հեռախոսազրույցը տեղի է ունեցել ադրբեջանական կողմի նախաձեռնությամբ:

Իսկ Ադրբեջանի նախագահի մամուլի ծառայության տարածած հաղորդագրության մեջ նշվում է, որ կողմերը մատնանշել են երկկողմ հաջող համագործակցությունը տարբեր ոլորտներում, գոհունակություն հայտնել նվաճած ձեռքբերումներից: Նախագահները նաև մտքեր են փոխանակել տարբեր հարցերի, այդ թվում երկկողմ կապերի և գործակցության հեռանկարների շուրջ:

Ադրբեջանի նախագահ Իլհամ Ալիևը իր երախտագիտությունն է հայտնել Ռուսաստանի նախագահ Վլադիմիր Պուտինին` Սուրգուտ քաղաքի օդանավակայանը ազգությամբ ադրբեջանցի երկրաբան, Սիբիրում նավթի պաշարների հայտնաբերման գլխավոր հեղինակներից մեկը համարվող Ֆարման Սալմանովի անունով վերանվանելու առթիվ: «Սուրգուտի օդանավակայանի վերանվանման մասին որոշումը ադրբեջանական հանրությունը ընդունել է մեծ երախտագիտությամբ», - Պուտինի հետ հեռախոսազրույցում նշել է Ալիևը:

Ռուսաստանում գործող չորս տասնյակ օդանավակայանների վերանվանման մասին հրամանագիրը Ռուսաստանի նախագահը ստորագրեց անցած շաբաթ: Պուտինի հրամանագրով Ղրիմի խոշորագույն Սիմֆերոպոլի օդանավակայանը վերանվանվեց ծովանկարիչ Հովհաննես Այվազովսկու անունով:

Կարծես, ամեն ինչ գնում է ընդդեմ հայ-ռուսական հարաբերությունների...
Մինչ Փաշինյանը չի կարողանում կարգավորել Պուտինի հետ գործընկերային հարաբերությունները՝ Ալիևը, կարծես, փորձում է ցույց տալ Փաշինյանին, որ ցանկացած պահի, ցանկացած հարցով կարող է խոսել Պուտինի հետ, այսինքն՝ այնպեսին չեն նրա հարաբերությունները, ինչպես Փաշինյանի պարագայում է:

Սակայն կա նաև այլ կարևոր հանգամանք ևս: Ալիևը զանգահարել է Պուտինին՝ արցախա-ադրբեջանական սահմանին լարվածության, հայ զինծառայողի մահվան պայմաններում:

Ի՞նչ է նա ցանկանում ապացուցել...

Տրամաբանությունը շատ պարզ է՝ ռուս-ադրբեջանական հարաբերությունները հրաշալի մակարդակի վրա են, ավելին՝ նույնիսկ քննարկվում են նոր պայմանագրերի ստորագրում: Գումարած այս ամենին՝ այս ամենը Կրեմլն ու պաշտոնական Բաքուն արձանագրում են Արցախում էլ սրվող պայմաններում և Ադրբեջանի դիրքորոշման կոշտացման առկայությամբ:

Ահա, թե որն է Ալիևի հեռախոսազանգի աշխարհաքաղաքական, իսկ ավելի ճիշտ՝ ռազմաքաղաքական նպատակը: Նա յուրօրինակ «նվեր» է մատուցում Փաշինյանին այդ հեռախոսազանգով:

Թամար Բագրատունի