Պուտինը պահեց սոլիդարնոստը. զանգ Կրեմլից

Ռուսաստանի Դաշնության նախագահ Վլադիմիր Պուտինը հունիսի 1-ին զանգահարել է վարչապետ Նիկոլ Փաշինյանին՝ շնորհավորել և բարեմաղթանքներ հղել ՀՀ վարչապետին` տարեդարձի կապակցությամբ:

Հեռախոսազրույցի ընթացքում զրուցակիցները քննարկել են նաև երկկողմ և բազմակողմ ձևաչափերում համագործակցության ուղղությամբ առաջիկա անելիքները: Այս մասին հայտնել են ՀՀ վարչապետի աշխատակազմի տեղեկատվության և հասարակայնության հետ կապերի վարչությունից: Տեղեկատվությունը հրապարակված է նաև Կրեմլի պաշտոնական կայքում, որտեղ նշվում է նաև, որ Կրեմլի ղեկավարը նաև շնորհավորական հեռագիր է ուղարկել Փաշինյանի տարեդարձի կապակցությամբ:
Պուտինի ուղերձում մասնավորապես ասված է.
«Հարգելի' Նիկոլ Վովայի,
Ընդունեք անկեղծ շնորհավորանքներս Ձեր ծննդյան օրվա առթիվ:
Սրտանց մաղթում եմ Ձեզ քաջառողջություն, երջանկություն, բարեկեցություն և հաջողություններ պետական գործունեության մեջ:
Կցանկանայի վերահաստատել պատրաստակամությունը՝ շարունակելու Ռուսաստանի և Հայաստանի միջև դաշնակցային հարաբերությունների զարգացման ուղղությամբ կառուցողական երկխոսությունը և համատեղ սերտ աշխատանքը, ինչպես նաև եվրասիական ինտեգրացիոն գործընթացների շրջանակում գործընկերային փոխգործակցությունը»:

Վարչապետ Նիկոլ Փաշինյանին ծննդյան օրվա առթիվ շնորհավորական ուղերձ է հղել նաև Ռուսաստանի Դաշնության կառավարության նախագահ Դմիտրի Մեդվեդևը:
«Հարգելի' Նիկոլ Վովայի,
Ռուսաստանի Դաշնության կառավարության և անձամբ իմ անունից շնորհավորում եմ Ձեզ՝ ծննդյան օրվա առթիվ:
Կցանկանայի ընդգծել Ձեր մշտական ուշադրությունը` Ռուսաստանը և Հայաստանը կապող բարեկամության, գործընկերության և դաշնակցային հարաբերությունների զարգացման հարցերին: Ամրապնդվում է առևտրատնտեսական և ներդրումային համագործակցությունը, հաջող իրագործվում են համատեղ նախագծեր էներգետիկայի, արդյունաբերության, ենթակառուցվածքների, գիտության և մշակույթի ոլորտներում: Խորանում է ինտեգրացիոն փոխգործակցությունը Եվրասիական տնտեսական միության շրջանակում:
Համոզված եմ, որ միջկառավարական ակտիվ աշխատանքը կնպաստի գործնական համագործակցության հետագա ընդլայնմանը, տարբեր բնագավառներում նոր փոխշահավետ նախաձեռնությունների առաջմղմանը: Դա լիովին համապատասխանում է մեր երկրների երկարաժամկետ շահերին:
Մաղթում եմ Ձեզ քաջառողջություն, բարեկեցություն և հաջողություններր Ձեր պատասխանատու գործունեության մեջ»,- ասված է Մեդվեդևի ուղերձում:
Այսպիսով պետք է արձանագրել, որ Կրեմլը պահեց սոլիդարնոստը` շնորհավորելով Հայաստանի վարչապետի տարեդարձը: Ինչպես հայտնի է, անցյալ տարի Պուտինը խիստ անսպասելի կերպով օգոստոսի 31-ին զանգահարել էր Մարտի 1-ի գործով մեղադրյալ ՀՀ երկրորդ նմախագահ ՌԵոբերտ Քոչարյանին և շնորհավորել նրան ծննդյան օրվա կապակցությամբ: Պետք է նկատել, որ մինչ այդ Հայասաատնի և Ռուսաստանի ղեկավարների փոխհարաբերություններում ծննդյան շնորհավորանքները երբեք օրակարգային հարց չեն դիտարկվել, ու պաշտոնական լրատվություն այդ մասին չի տրվել: Քոչարյանին շնորհավորելուց հետո Փաշինյանին շնորհավորելը խորհրդանշական էր Փաշինյան-Պուտին փոխհարաբերությունների լարվածության համատեքստում: Հայտնի է, որ Հայաստանի նախկին ղեկավարները, հատկապես Ռոբերտ Քոչարյանը ընկերական հարաբերություններ է ունեցել Պուտինի հետ, ինչը դիտարկվել է նաև քաղաքական գործոն:

Նիկոլ Փաշինյանը Պուտինի հետ ընկերական հարաբերություններ չունի, և դա ինչ-որ իմաստով երևում է նաև պաշտոնական հարաբերություններում, ընդունելությունների ժամանակ: Վերջին ամենաթարմ օրինակը Նոր Սուլթանում Պուտինի և Փաշինյանի չկայացած հանդիպումն էր: Պուտինն ու Փաշինյանը քաղաքական տարբեր սերունդների ներկայացուցիչներ են, տարբեր է նաև քաղաքական և պետական աշխատաոճը, հետևաբար նրանք ընկերներ հազիվ թե կդառնան: Բայց միջպետական հարաբերություններում կա որոշակի արարողակարգային էտիկետ, որն ավելին է, քան տվյալ պետության ղեկավարի անձնական հարաբերությունները գործընկեր պետության ղեկավարի հանդեպ: Կրեմլից ստացված զանգերը հենց այդ մասին են վկայում. ի վերջո հայ-ռուսական ռազմավարական հարաբերությունները ավելին են, քան Պուտին-Քոչարյան կամ Պուտին-Փաշինյան հարաբերությունները:

Հայկ Դավթյան