Սորոսը վերջնականապես «լափեց» երկիրը

Այսօր նախագահ Արմեն Սարգսյանը, տեղի տալով Նիկոլ Փաշինյանի քմահաճություններին, Սահմանադրական դատարանի դատավոր առաջադրեց փաստաբան Վահե Գրիգորյանին, ով լևոնանիկոլական տանդեմին կից իրավաբան է, և իշխանության մեկ տարվա ընթացքում դարձել է Նիկոլ Փաշինյանի ոչ պաշտոնական խորհրդատուն եւ նրա ցուցումով է երկրում իրականացվում արդարադատություն, որը շատերի քննադատության թեման է դարձել։

Շինծու քրեական գործեր` քաղաքական հաշվեհարդարի արդյունքում կարված. ահա այն ամենը, ինչ տեղի է ունենում վերջին մեկ տարվա ընթացքում:

Հայտնի գաղտնալսման ձայնագրությունից պարզ է դառնում, որ այդ ամենը տեղի է ունենում Վահե Գրիգորյանի թեթեւ ձեռամբ։ Վահե Գրիգորյանի անցյալի գործունեությունն էլ պակաս անփառունակ չէ, սորոսական գրանտակերությամբ զբաղված փաստաբանի խայտառակ գործարքները հայտնվել են մամուլի էջերում, հիշենք միայն հօգուտ ադրբեջանցիների նրա արարքը հայտնի գործով, որի դիմաց նա ըստ տեղեկությունների՝ միլիոնավոր դոլարներ է ստացել մեր հակառակորդ պետության կողմից, հիշենք նաեւ, որ ՄԻԵԴ-ում նա պատրվել է Լեւոն Տեր-Պետրոսյանի հետ կապված հայտնի գործը։ Մասնավորապես, 2012 թվականի մայիսին Մարդու իրավունքների եվրոպական դատարանը կայացրել է որոշում` Լևոն Տեր-Պետրոսյանի գանգատը Մարտի-1-ի գործով մերժելու վերաբերյալ: Մարդու իրավունքների եվրոպական դատարանը, քննելով մարտի 1-ի իրադարձությունները, արձանագրել է, որ ՀՀ Նախագահը 2008 թվականի փետրվարի 23-ին հանդիպումներ է ունեցել ուժային կառույցների հետ` հայտարարելով, որ ինքը թույլ չի տա որևէ մեկին ապակայունացնել իրավիճակը Հանրապետությունում, և տվել է համապատասխան հանձնարարականներ:

Այսինքն` Նախագահը, լինելով պետության գլուխը, ուներ սահմանադրական պարտականություն` երաշխավորելու Հանրապետության ներքին անվտանգությունը (2005 թվականի Սահմանադրության 49-րդ հոդված):
Ավելին, հաշվի առնելով, որ այդ օրերին Պաշտպանության նախարարության մի շարք բարձրաստիճան պաշտոնյաներ ներգրավվում էին հետընտրական գործընթացներին, Նախագահը պարտավոր էր պահպանել զինված ուժերի չեզոքությունը քաղաքական հարցերում (2005 թվականի Սահմանադրության 8.2-րդ հոդված)։Եւ ահա, նույն տրամաբանությամբ էլ նա հիմա «ձեւում-կարում» է նոր իշխանությունների քաղաքական հետապնդումները, դրանց քրեական գործի տեսք տալիս՝ մտավախություն չունենալով, որ ոչ հեռավոր ապագայում միջազգային ատյաններում կրկին ձախողում է ունենալու՝ պետությանը լուրջ վնասներ պատճառելով։ Բայց սրանից առավել նողկալի է Արմեն Սարգսյանի քայլը։ Չես հասկանում՝ մարդը պետության գլուխ է ինչպես Սահմանադրությունն է իրեն լիզորել, թե իշխանության խամաճիկ, թյուրիմացություն, կամակատար։

Ստացվում է, որ այս մարդը զրկված է դիմադրելու կարողությունից, պատասխանատու որոշում ընդունելու կամքից, նա ամեն ինչ անում է իշխանություններին հաճոյանալու համար, հոկտեմբերի 2-ին ԱԺ-ում ընդունված հայտնի նախագիծը համարձակություն չունեցավ ստորագրելու, չգտավ կամք քննադատելու դատարանները շրջափակելու Փաշինյանի կոչը, նա ընդհանրապես անարձագանք է թողնում իշխանության ցանկացած քայլ, հայտարարություն, որը հանրության շրջանում ոչ միարժեք է ընդունվում։ Հարց է առաջանում՝ ինչու պետք է այս մարդը զբաղեցնի նախագահի բարձր պաշտոնը։ Մեր հարկատուների հաշվին պաղպաղակ ուտի, շրջագայություններ անի։ Բայց սա դեռ ամենը չէ, մարդը ինքնասիրություն էլ չունի եւ առաջադրում է մի մարդու, ով հրապարակավ Արմեն Սարգսյանին համարել է ոչ լեգիտիմ։ Ստացվում է, որ մեկ տարի շարունակ նա կապիկություն էր անում, երբ մրցութային հանձնաժողով էր ձեւավորել ու թեկնածուների հայտեր էր ընդունում, եթե վերջում պետք է ընկրկեր Նիկոլ Փաշինյանին, ում էր պետք այդ ձեւականությունը։ Ունենք մի վիճակ, երբ Սերժ Սարգսյանի եփած կեղտոտ ճաշը՝ Արմեն Սարգսյանին նախագահ կարգելը, պետք է համտեսի մի ողջ ազգ։
Իսկ մեծ հաշվով Նիկոլ Փաշինյանն ու Սորոսը սահուն կերպով Հայաստանում խժռում են անառիկ մնացած վերջին ինստիտուտները՝ նախագահի եւ Սահմանադրական դատարանի, որպեսզի այնտեղ-վարեն ցանեն իրենց ուզածը։
Հ․Գ․-Ընդամենը մեկ տարի առաջ Նիկոլ Փաշինյանն ամենադիպուկն է գնահատել Արմեն Սարգսյանին՝«Արմեն Սարգսյան՝ царь не настоящий»։

Անի Սահակյան