Որոշում` «պտիչկայի» համար

ՀՀ հանրային ծառայությունները կարգավորող հանձնաժողովի մայիսի 24-ի նիստում ընդունվեց որոշում, որով համապատասխան փոփոխություններ են կատարվում բնական գազի մատակարարման և օգտագործման կանոններում, մասնավորապես.
Ավելացվեցին մատակարարի կողմից բաժանորդին վճարվող տույժերը: Բնական գազի մատակարարման և օգտագործման կանոններով սահմանված պահանջների խախտման դեպքում բաժանորդին կվճարվի տույժ վերջինիս ծախսած բնական գազի միջին արժեքի 30 տոկոսի (ներկայիս 20 տոկոսի) չափով, բայց ոչ ավելի քան 2500 (ներկայիս 2000) դրամը.
Սպասարկման որակի հետագա բարելավման նպատակով մատակարարին պարտավորեցվեց վթարային ընդհատման օրվա, սկզբի ժամի և գազամատակարարման վերականգնման կանխատեսվող ժամի մասին (եթե այն դեռ չի վերացվել) հնարավորինս սեղմ ժամկետում հեռուստատեսությամբ կամ ծանուցման այլ եղանակով իրազեկել բաժանորդին գազամատակարարման վթարային ընդհատման և վերականգնման կանխատեսվող ժամկետի մասին.
Երկարաձգվեց առևտրային հաշվառքի սարքերի ցուցմունքների գրանցման ժամկետը՝ գործող 3-օրյա ժամկետը փոխարինելով 6-օրյա ժամկետով, ինչը հնարավորություն կտա օպտիմալացնել մատակարար ընկերության ծախսերը.
Բարելավվեց գազիֆիկացված բնակավայրում գտնվող և մինչև 100 խմ ժամային սպառում ունեցող սպառողների գազասպառման համակարգը գազամատակարարման ցանցին միացման դեպքում բաժանորդների կողմից վճարված միացման վճարի փոխհատուցման կարգը: Նախկինում բաժանորդների կողմից վճարված միացման վճարի փոխհատուցման գումարը, որոշ դեպքերում կազմում էր բացասական մեծություն և չէր նվազեցվում բաժանորդների կողմից սպառված բնական գազի ծախսից: Փոփոխությունների արդյունքում յուրաքանչյուր սպառողական խմբի համար մատակարարված բնական գազի արժեքից նվազեցվող գումարի տոկոսային մեծության 5 տոկոսից ցածր լինելու դեպքում կընդունվի հավասար 5 տոկոսի:
Փոփոխություններն ուժի մեջ կմտնեն սույն թվականի հուլիսի 1-ից: Այս մասին նշվում է ՀԾԿՀ տարարածած հաղորդագրության մեջ:

Եթե  հանձնաժողովը վերջապես որոշել է բացի սակագներ բարձրացնելու անպատվաբեր գործից,  զբաղվել նաև սպառողների իրավունքների պաշտպանությամբ,  թերևս դրական է: Վերոհիշյալ որոշումը առաջին հայացքից հենց այդ նպատակին է միտված: Բայց սա միայն առաջին հայացքից, որովհետև նման որոշումների կիրառական նշանակությունը իրական կայնքում հավասար է զրոյի: Օրինակ նույն Հանրային ծառայությունները կարգավորող հանձնաժողովը կարո՞ղ  է մատնանշել  գոնե մի դեպք, երբ, օրինակ, «Գազպրոմ Արմենիա» ընկերությունը որևէ քաղաքացու տույժ է վճարել`  բնական գազի մատակարարման և օգտագործման կանոններով սահմանված պահանջների խախտման համար: Հանձնաժողովի կայքում նման դեպքի մասին փաստող տեղեկատվություն չհաջողվեց գտնել: Թերևս նման նախադեպ չկա: Այս փաստը շատ հստակ ցույց է տալիս, որ հանձնաժոցովը, որը նախկինում գլխավորում էր Ռոբերտ Նազարյանը, իսկ այժմ կառույցի ղեկավարը ԱԱԾ պետի քենակալ Գարեգին Բաղրամյանն է, նշված որոշումն ընդունել է «պտիչկայի»  համար: Սպառողների կյանքում հազիվ թե դրանից ինչ-որ բան փոխվի:

Հայկ Դավթյան