Արմեն Գրիգորյանին պատին են դեմ տվել, բայց, նահանջ չի եղել

Ինչպես հայտնի է, վերջերս Անվտանգության խորհրդի քարտուղար Արմեն Գրիգորյանն աշխատանքային այցով մեկնել էր Ամերիկայի Միացյալ Նահանգներ։ ԱԽ քարտուղար Արմեն Գրիգորյանը մի շարք հանդիպումներ էր ունեցել, որոնց ընթացքում քննարկվել էին հայ-ամերիկյան հարաբերությունների օրակարգային հարցեր, ներդրումների և ֆինանսական աջակցության հնարավորությունները։ Ըստ պաշտոնական հաղորդագրության` ՀՀ ԱԽ քարտուղարը մասնավորապես Սպիտակ տանը հանդիպել էր ԱՄՆ նախագահ Դոնալդ Թրամփի հատուկ օգնական ու ԱՄՆ Ազգային անվտանգության խորհրդի Եվրոպայի ու Ռուսաստանի հարցերով ավագ տնօրեն Ֆիոնա Հիլլի հետ։

Hayeli.am-ի տեղեկություններով` հանդիպումների ժամանակ կրկին շոշափվել է հայ-իրանական սահմանի հարցը: Ամերիկյան կողմը կրկին շեշտել է, որ իրենք շահագրգիռ են սահմանի փակման հարցում, որը կարող է դիտարկվել ամերիկյան ներդրումներին ընդառաջ արված քայլ: ԱԽ քարտուղար Արմեն Գրիգորյանը սակայն շատ հստակ ներկայացրել է, որ հայկական կողմը չի կարող հարևան Իրանի հետ հարաբերություններում նման քայլի գնալ, քանի որ դա չի բխում ՀՀ պետական շահերից:
Հիշեցնենք, որ անցյալ տարվա նոյեմբերին ԱՄՆ նախագահի ազգային անվտանգության հարցերով խորհրդական Ջոն Բոլտոնը Երևան կատարած այցի ընթացքում հայտարարել է, որ ԱՄՆ–ը մտադիր է առավելագույն ճնշում գործադրել Իրանի վրա։ Հայ-իրանական սահմանի փակումը դիտվում էր այդ ճնշումների համատեքստում:
Վարչապետ Նիկոլ Փաշինյանը, մեկնաբանելով Բոլտոնի հայտարարությունը, նշել էր, որ Հայաստանն ունի իր պետական և ազգային շահերը, որոնք միշտ չէ, որ կարող են համընկնել այլ երկրների շահերի հետ։ «Հայաստանի աշխարհագրական հարևանների շարքում հատուկ տեղ է զբաղեցնում Իրանի Իսլամիստական Հանրապետությունը։ Չպետք է բացատրել այն, ինչ հասկանալի է առանց խոսքերի. հարավային հարևանի հետ ցանկացած տեսակի և մակարդակի հարաբերություններ մեր երկրի համար ունեն չափազանց կարևոր նշանակություն։ Նշանակում է` պահանջում են հավասարակշիռ և զգուշավոր մոտեցումներ: Հայաստանի կառավարությունը հիմա և հետագայում ղեկավարվելու է սեփական շահերով»,- այս առիթով ասել էր Փաշինյանը։