Քաոս Հայաստանում.վտանգն անխուսափելի է
Երկրորդ նախագահ Ռոբերտ Քոչարյանի խափանման միջոցի վերաբերյալ դատարանի որոշումից հետո իշխանությունը ցուգցվանգի մեջ է հայտնվել: Նախօրեից հայտարարություններով, գրառումներով մեկը մյուսին հերթ չէին տալիս, հետո այդ անշառ գործիքը դարձավ ավելի ագրեսիվ, քայլարածները նորից դուրս եկան փողոց, ի վերջո, Ազատության հրապարակում տեղի ունեցավ Հրանտ Մարգարյանի վրա հարձակում: Այս ամենը Նիկոլ Փաշինյանի հորդորով տեղի է ունենում Քոչարյանի խափանման միջոցը փոխելու դեմ եւ ովքեր ինչ-ինչ առումներով առնչվում են նրա հետ դառնում են իշխանությունների աչքի փուշը:
Թվում էր, թե իշխանությունում կհամակերպվեն այս իրավիճակին՝ հասկանալով, որ իրավական պետությունում երաշխավորության ինստիտուտը պիտի գործի եւ Քոչարյանի ազատության մեջ հայտնվելը դեռ ոչինչ չի նշանակում: Բայց ահա, երեկ Նիկոլ Փաշինյանը անսպասելի իր էջում կոչ արեց, որ 8:30-ից շրջափակել Հայաստանի բոլոր դատարաննները, թույլ չտալ որեւէ մեկին ներս մտնել, դրան հաջորդեց իշխող պատգամավորների գրառումները, որոնք մեկը մյուսի ետեւից նույն կոչով դիմեցին արդեն յուրաքանչյուրը իր մարզի բնակիչներին:
Նիկոլ Փաշինյանի կոչը շոկ է առաջացրել բոլոր բանական մարդկանց ուղեղներում, մեկը մյուսի հետեւից հայտարարություններ են տարածում քաղաքական, հասարակական կառույցները,հիշեցնելով, որ Նիկոլ Փաշինյանը վտանգավոր խաղ է խաղում, գործադիր մարմինը այսպիսով ցանկանում է ճնշել դատական իշխանությանը, ինչի իրավունքը սահմանադրությամբ չունի: Սահմանադրությամբ երաշխավորվում է իշխանությունների բաժանումը և իշխանության թևերի անկախությունը, զսպումների և հակակշիռների համակարգը։ ՀՀ գործադիր իշխանության ղեկավարն իր այսօրվա կոչով առերևույթ խախտում է Սահմանադրությամբ ամրագրված իշխանությունների բաժանման սկզբունքը, կոպտագույն ձևով միջամտելով դատական իշխանության գործունեությանը։
<<Բոլոր այն անձանցից, ովքեր զբաղեցնում են պետական կամ հանրային այլ պաշտոն, խստորեն պահանջում եմ անհապաղ դադարեցնել դատարանների մուտքերն ու ելքերը արգելափակելու կոչերը կամ պահանջները: Դուք պարտավոր եք կատարել բացառապես այն գործառույթները, որոնք ձեզ վերապահված են Սահմանադրությամբ, օրենքով կամ այլ իրավական ակտով: Դուք ունեք իրավական կոնկրետ կարգավիճակ ու սահմանափակված եք այդ կարգավիճակով: Ցանկացած շեղում կարող է հանգեցնել պատասխանատվության>>,- հորդորեց ՄԻՊ –ը:
Փաստաբանների պալատն էլ հիշեցրեց, որ դատական մարմինների անկախությունը երաշխավորվում է պետության կողմից և հաստատվում է Սահմանադրությունում կամ երկրի օրենքներում: Բոլոր պետական և այլ հիմնարկները պարտավոր են հարգել և պահպանել դատական մարմինների անկախությունը․: Իսկ գործուղման մեջ գտնվող պետության գլուխը՝ ՀՀ նախագահ Արմեն Սարգսյանը, որը հանդիսանում է Սահմանադրության երաշխավորը մի երկչոտ հայտարարություն էտարածել.<<Հայաստանի Հանրապետության Սահմանադրությամբ իշխանությունը պատկանում է ժողովրդին։ Հետևաբար, ՀՀ իշխանության ճյուղերը՝ օրենսդիր, գործադիր և դատական, պետք է արտացոլեն Հայաստանի ժողովրդի հավաքական կամքը և ծառայեն իրենց Սահմանադրական նպատակներին։
Ուստի կոչ եմ անում Հայաստանի բոլոր քաղաքացիներին, անկախ զբաղեցրած հասարակական ու քաղաքական դիրքից և պաշտոնից՝ պահպանել հանգստություն և հանդարտություն, պահպանել Սահմանադրությունն ու օրենքները։
Այս պահին աշխատանքային այցով գտնվելով արտերկրում՝ անընդհատ կապի մեջ եմ համապատասխան պետական մարմինների հետ>> ,-իր ուղերձում նշում է նա:
Ակնհայտ է, որ Փաշինյանը պետությունը, ՀՀ քաղաքացիներին տանում է արկածախնդրության , այս ամենի ելքը քաղաքացիական պատերազմն է լինելու, որի արդյունքում կարող են կորցնել ինչպես փխրուն այս խաղաղությունը , այնպես էլ երկիրը:
Անի Սահակյան
Հետևեք մեզ Viber-ում
