Արամ Օրբելյանը Քոչարյանի մեղադրանքը համեմատեց Թումանյանի հեքիաթների հետ (video)

Երևանի ընդհանուր իրավասության դատարանում պաշտպանական խմբի անդամ, փաստաբան Արամ Օրբելյանը ներկայացրեց  խափանման միջոցի վերաբերյալ իր դիրքորոշումը։

«Երբ ամենասկզբում առաջադրվում էր մեղադրանք, պաշտպանական խմբի համար դժվար էր հասկանալ մեղադրանքի էությունը։Մենք հայտարարում էինք՝ չգիտենք, թե ինչից ենք պաշտպանվում։ Որևէ փորձ չէր կատարվում պարզաբանել մեղադրանքը։ Ինչո՞ւ։ Շատ պարզ պատճառով՝ դա պարզ դատավարական հնարք է՝ երբ գործը թույլ է, ոչ հստակ ձևակերպումներ են տրվում, իսկ երբ գործը ուժեղ է, հստակ է, ապա շատ պարզ ձևակերպումներ են տրվում, ապացույցներ ներկայացվում։ Այստեղ գործ չկա, ինչպես ասում է գործիչներից մեկը՝ գործը օդ է, դրա համար խուճուճ ձևակերպումներ են տրվել։ Մեղադրական կողմը կարող է գրել ինչ կամենա, կարող է վերցնել Հովհաննես Թումանյանի պատմվածքների ժողովածուն և ասի սա մեղադրական եզրակացություն է...», - դատարանում հայտարարեց Արամ Օրբելյանը։

Մեղադրանքը պաշտպանող Երևան քաղաքի դատախազ Գևորգ Բաղդասարյանը ընդհատեց և ներկայացրեց առարկություն. «Խնդրում եմ դադարեցնել այդ ձևակերպումները։ Եթե կվկայակոչեք պատբմվածքներից մեջբերումներ, որի մասին խոսում եք, նույն ձև պատասխանեք նաև դուք»։

Դատավոր Դավիթ Գրիգորյանը ընդունեց առարկությունը և հորդորեց որակումներ չանել։ Արամ Օրբելյանն ընդունեց առարկությունը. «Ես չասացի՝ պատմվածքներ կան, էդպես կարող է ավելի հետաքրքիր լիներ»։

 Օրբելյանը հայտարարեց, որ մեղադրանքի տեքստը պարզ չէ և պաշտպանական խմբի մոտ ամեն տողից ենթադրություններ են ծագում։ Մասնավորապես, ըստ փաստաբանի, մեղադրանքում նախաքննական մարմինը չի վերլուծել՝ 300 և 300.1 հոդվածի էությունները, դրանց տարբերությունները.«Եթե անձին մեղադրում են մի հոդվածով, որը ուժի մեջ է մտել այդ արարքը կատարելուց 1 տարի հետո, անձը պետք է ունենա նկարագրություն, թե 2008-ի փետրվար-մարտ ամիսներին գործած ո՞ր հոդվածով է նախատեսված եղել այդ արարքը և դրանք համընկնո՞ւմ են, թե ոչ»: