Արցախում սադրանքի դիմելու նոր պատճառ

Ադրբեջանի նախագահը քննադատել է ընդդիմադիրներին ու զգուշացրել` նրանց չի հաջողվի սասանել իր իշխանությունը: «Եվս մեկ անգամ ուզում եմ կրկնել` Ադրբեջանում կայունությունը հուսալիորեն պաշտպանվում է», - հայտարարել է Իլհամ Ալիևը հոր` Հեյդար Ալիևի ծննդյան 96 ամյակին նվիրված հանդիսավոր արարողությունների ժամանակ:

Ալիև֊որդին միաժամանակ պնդել է, թե 1990-ականներին «երկիրը փլուզման հասցրած որոշ ուժեր այժմ փորձում են ինչ֊ինչ արդյունքների հասնել: «Նրանք պայքարում են ստի, կեղծիքի ու ենթադրությունների միջոցով, և օգտագործելով տարբեր լրատվամիջոցներ` սևացնում են մեր երկիրը ու աղավաղված պատկեր ստեղծում թե՛ երկրի ներսում, թե՛ դրսում», ֊ հայտարարել է Ադրբեջանի նախագահը` հավելելով․ - «Ադրբեջանի ժողովուրդը խոհեմ է, և երբեք թույլ չի տա, որ ապազգային, դավաճան տարրերը ինչ֊որ բանի հասնեն Ադրբեջանում»:

Ընդդիմությունը պնդում է, որ միայն այս ամսվա ընթացքում Բաքվի քաղաքային իշխանությունը ութ անգամ մերժել է իրենց հանրահավաք անցկացնելու դիմումը. ակտիվիստները հայտարարել էին, որ պատրաստվում են փողոց դուրս գալ «ոչ թալանին», «ազատություն քաղբանտարկյալներին» կարգախոսով:

Ադրբեջանում ձևավորված ներքաղաքական այս անորոշության ֆոնին ամենևին էլ չի կարելի բացառել, որ Ալիևը հակված լինի «մեղմել» իրավիճակը՝ շեշտը դնելով Արցախի վրա: Դա նշանակում է, որ Ալիևը հանուն իշխանություն պահելու՝ կարող է դիմել սադրանքների, որպեսզի զսպի ներքաղաքական ճգնաժամի մեծացումը:

Ի դեպ, մայիսի 12-ին պաշտոնական Բաքուն կոչ է արել Երևանին կառուցողական բանակցություններ սկսել ղարաբաղյան հակամարտության շուտափույթ կարգավորման համար: «Հայաստանը պետք է հրաժարվի իր ժողովրդին և միջազգային հանրությանը խաբելու փորձերից, դադարեցնի ագրեսիայի և էթնիկ զտումների քաղաքականությունը, հետևի իր միջազգային պարտավորություններին և կառուցողական ձևով մասնակցի բանակցային գործընթացին հակամարտության արագ կարգավորման համար», ֊ հայտարարել է Ադրբեջանի ԱԳՆ-ն՝ անդրադառնալով 25 տարի առաջ կնքված հրադադարի համաձայնագրին:

Խոսելով խնդրի կարգավորման մասին՝ պաշտոնական Բաքուն կրկին ընդգծել է Ադրբեջանի տարածքային ամբողջականությունը պահպանելու, բռնի տեղահանվածներին սեփական բնակավայրեր վերադարձնելու, ինչպես նաև Ղարաբաղում հայկական ու ադրբեջանական համայնքների խաղաղ գոյակցությունը ապահովելու անհրաժեշտությունը: «Դա կդառնա հիմք՝ Հայաստանի հետ բարիրդրացիական հարաբերությունների վերականգնման և տարածաշրջանի տևական խաղաղության, անվտանգության ու զարգացման համար», ֊ հայտարարել է Ադրբեջանի արտաքին քաղաքական գերատեսչությունը:

Ադրբեջանական կողմը միաժամանակ ընդգծում է, որ հրադադարի ռեժիմը նշանակում է ցանկացած տեսակի ռազմական գործողության դադարեցում։ «Այսինքն, դա ոչ միայն զինադադարն է, այլև ռազմական ուժերի դուրսբերումը հակամարտության գոտուց», նշել է Ադրբեջանի արտգործնախարարությունը՝ ափսոսանք հայտնելով, որ Երևանը հրաժարվում է բովանդակային բանակցություններից։
Վստահաբար, պաշտոնական Բաքուն պատասխանել է Հայաստանի իշխանությունների՝ մայիսի 12-ի տարածած հայտարարությանը, որում նրանք կարևորել էին հրադադարի պահպանումը:

Մետաքսյա Շալունց