Մոսկվան շտապեցնում է Փաշինյանին ու Ալիևին

Մոսկվան Ադրբեջանի և Հայաստանի կողմից պատրաստակամություն է տեսնում՝ Լեռնային Ղարաբաղի հակամարտության կարգավորման շուրջ աշխատանքները շարունակելու հարցում: Այս մասին ասվում է Ռուսաստանի ԱԳՆ պաշտոնական կայքում տեղադրված հայտարարության մեջ:

«Կպահանջվի ժամանակ և մասնակիցների կողմից քաղաքական կամք՝ կարգավորման առանցքային ասպեկտներում համաձայնության հասնելու համար: Մենք տեսնում ենք կողմերը պատրաստակամությունը՝ շարունակելու համատեղ աշխատանքը՝ ուղղված կայուն խաղաղության: Այդ մասին, մասնավորապես, վկայում են Վիեննայում Հայաստանի և Ադրբեջանի առաջնորդների միջև վերջին հանդիպումը և արտգործնախարարների բանակցությունները Մոսկվայում», ասվում է Ռուսաստանի արտգործնախարարության տարածած մամլո հաղորդագրության մեջ:

Այնուհետև, հաղորդագրությունն այսպես է ամփոփվում. «Մեր կողմից մենք կցուցաբերենք ակտիվ աջակցություն Բաքվին ու Երևանին փոխզիջումային լուծում գտնելու հարցում: Ինչպես և նախկինում, կշարունակենք ձեռնարկել շարունակական միջնորդական ջանքեր ԱՄՆ-ի և Ֆրանսիայի հետ՝ ԵԱՀԿ Մինսկի խմբի համանախագահության շրջանակում»:
Մոսկվան, ինչպես երևում է, բավական շտապում է արցախյան հարցում: Փաստորեն, ռուսական կողմը ոչ միայն կարգավորման գործընթացն է ղեկավարում, այլև ակտիվորեն հիշեցնում է կողմերին, թե ինչ ակնկալիքներ ունի կողմերից: Պուտինը քաղաքական կամք է ակնկալում՝ առանցքային ասպեկտներում համաձայնության հասնելու համար:
Ի դեպ, նախօրեին ՌԴ ԱԳՆ պաշտոնական ներկայացուցիչ Մարիա Զախարովան ճեպազրույցի ընթացքում հայտնել է, որ ռուսական կողմը, հաշվի առնելով ՌԴ համանախագահությունը ԵԱՀԿ Մինսկի խմբում, ԵԱՀԿ գլխավոր քարտուղար Թոմաս Գրեմինգերին ամբողջովին տեղեկացրել է ապրիլին Մոսկվայում Ռուսաստանի, Հայաստանի և Ադրբեջանի արտգործնախարարների հանդիպման արդյունքների և համատեղ հայտարարության մասին, նշում է ТАСС-ը։

«Մոսկվայում կայացած հանդիպման արդյունքում Հայաստանի և Ադրբեջանի մոտ հետաքրքրվածություն է արձանագրվել հումանիտար ոլորտում համագործակցության հաստատման ուղղությամբ: Խոսքը վերաբերում է կոնֆլիկտի գոտում իրավիճակի կայունացմանն ուղղված քայլերին, մասնավորապես՝ գյուղատնտեսական աշխատանքների ժամանակ, կողմերում ազատազրկված անձանց հարազատների այցելության և մարդկանց կապերի հաստատմանն ուղղված գործնական աշխատանքին, այդ թվում՝ լրատվամիջոցների փոխադարձ ուղևորությունները», - ասել է Զախարովան՝ հավելելով, որ ԵԱՀԿ գլխավոր քարտուղարը հաստատել է կառույցի մտադրությունը՝ ԼՂ կոնֆլիկտի կարգավորմանն ուղղված աջակցությունը շարունակելու վերաբերյալ։
Իսկ թե ինչու է սահմաններում վերջին շրջանում լարված և ինչպես ստացվեց, որ կողմերը սկսեցին չբացառել պատերազմի բռնկումը՝ ոչ ոք այդ մասին հարկ չի համարում խոսել ու կողմերին, ավելի ճիշտ Ադրբեջանին կարգի հրավիրել:

Թամար Բագրատունի