Գլխավոր դատախազի մարտահրավերը Նիկոլ Փաշինյանին

Դատախազության 2018 թվականի հաղորդման քննարկումը ԱԺ-ում հեչ սիրուն չստացվեց, ոչ միայն ընդդիմադիր պատգամավորներից ոմանք փորձեցին «փչացնել» Արթուր Դավթյանի օրը՝ հիշեցնելով նրան, որ Սերժ Սարգսյանի կողմից նշանակված կադրը չի կարող պարծենալ կոռուպցիայի դեմ իր պայքարով, անաչառ գործունեությամբ, իր շքեղ առանձնասենյակով, 14 միլիոնանոց անձնական վերելակով եւ այլնով, այլեւ իշխանության պատգամավորները նրան ցույց տվեցին, թե որտեղ են գիշերում խեձգետինները։

Էդգար Առաքելյանը կարելի է ասել «ղժժաց» դատախազի այն պատասխանի վրա, թե իբր դատախազությունում այլեւս կոռուպցիա չկան․ «Սրբեր են դատախազությունում»,- հեգնեց պատգամավորը, մեկ ուրիշն էլ՝ Թագուհի Թովմասյանը, նրան մեղադրեց «մարդասպանության» մեջ, ասելով, որ իր խղճի վրա է ծանրացած Հաց բերողի մահը։ Հասկանալի է, որ հեղափոխական իշխանությունները, Արթուր Դավթյանին պահելով, իրենց պաշտոնում փորձում են եւ կույս մնալ եւ հաճույք ստանալ, քանի որ այդպիսով կարողանում են երկրում տեղի ունեցող բոլոր ապօրինությունները, չբացահայտված հանցագործությունները, կոռուպցիայի դեմ պայքարի դանդաղումը, նախկիններին պատասխանատվության չենթարկելու ամբողջ բեռը դնել Արթուր Դավթյանի խոցելի ուսերին, իսկ իրենք պարզերես դուրս գալ՝ արդարանալով, թե Դավթյանը յուրային չէ եւ նրա թերացումներն էլ իշխանությանը չեն։

Բայց սա պրիմիտիվ մոտեցում է , քանի որ ցանկության դեպքում Դավթյանին այդ պաշտոնից հեռացնելը կդառնա ժամերի հարց։ Իր հերթին Արթուր Դավթյանը այս վերաբերմունքից, որը ինքը նոր Հայաստանում գլխավոր դատախազ է աշխատում, լրիվ առիթավորվել է։ Քննարկումից հետո նա լրագրողների հետ ճեպազրույցում ի պատասխան պատգամավորների քննադատությունների չհերքեց, որ համակարգում կան մարդիկ, որոնց հետ սանիկ-քավոր հարաբերություններում է, մինչդեռ պնդեց՝ նրանք պաշտոնների են նշանակվել բացառապես բարձր մասնագիտական որակների շնորհիվ. «Ես մեր համակարգում ունեմ բազում ընկերներ՝ սկսած ուսանողական տարիներից, և մարդիկ, որոնց հետ նախկինում՝ դեռ ուսանող ժամանակներից, կարող էինք քավոր-սանիկ հարաբերություններ ձևավորել: Դա ինձ համար շատ պատվաբեր է, սուրբ հարաբերություններ են՝ մեր ավանդույթներով ձևավորված։ Այստեղ ինձ համար էականն այն է, որ այդ մարդկանց ո՛չ պաշտոնական առաջխաղացման, ո՛չ էլ պարտականությունների կատարման ծավալի վրա դա ազդեցություն չի ունեցել»,- ասաց Արթուր Դավթյանը:

Դիտարկմանը, թե Շիրակի մարզի և Արարատի մարզի դատախազները նրա հետ բարեկամական կապ ունեն ու նշանակվեցին այդ պաշտոններին այն բանից հետո, երբ ինքը գլխավոր դատախազ դարձավ՝ Դավթյանն ասաց.«Նրանք չեն նշանակվել այդ գործոնով, բայց վստահորեն ասում եմ՝ այդ մարդիկ մյուսներից ավելի շատ են պարտավոր բարեխիղճ աշխատել»: Իհարկե, ինչով է պակաս Արթուր Դավթյանը մյուսներից, եթե նույնիսկ նոր Հայաստանում է գործում ԽԾԲ՝ խնամի-ծանոթ-բարեկամ սկզբունքը, ապա ով կարող է դատախազին մեղադրել այդ հարցում։ Երբ ՊԵԿ-ը ոտքից գլուխ Աննա Հակոբյանի ազգուտակն է, խորհրդարանում՝ Փաշինյանի ընկեր-բարեկամները, ընդհանրապես բոլոր համակարգերում մեկը մյուսի բարեկամն է, ինչու Դավթյանին չի կարելի ունենալ քավոր-սանիկներ,զարմիկներ, ընկերներ ու մի հատ էլ բարձրաձայնել ու պարծենալ այդ փաստով։ Դավթյանը կարելի է ասել նույնիսկ մարտահրավեր է նետում Նիկոլ Փաշինյանին, լինելով նախկին իշխանության «հարազատ զավակը», նա այսօր պարծենում ու չի թաքցնում այդ կապերի մասին, կարծես ասելով՝ կա՞ այդպիսի դուխով մեկը, ով ինձ կարող է նախատել դրա համար, եթե կա, ապա թող նայի, թե որտեղ է իր ազգուտակը։

Անի Սահակյան