Արայիկ Հարությունյանը դատապարտե՞լ է Նիկոլ Փաշինյանին

Իր մեկ տարվա ասուլիսում Նիկոլ Փաշինյանը խստաշունչ տոնով նախատում էր նախկին իշխանավորներին, հատկապես նրանց, ովքեր իրեն մեղադրում են «հողերը» հանձնելու մեջ։ Փաշինյանն ասում էր, որ երկիրը թալանածները բարոյական իրավունք չունեն իրեն մեղադրելու․«Էդ ո՞վ ա դրանց էդ իրավունքը տվել: Ո՞վ են դրանք ընդհանրապես: Էդ սերմացու գողացող մկները, բանակ թալանածները, զինվորի հաշվին վզները հաստացրածները, փեսեքին ու տղերքին միլիոնատեր դարձրածները, նրանք էլ պիտի Ղարաբաղի հարց որոշե՞ն: Նրանք չունեն բարոյական իրավունք, ինչ մեդալ ուզում ա դոշներից կախած լինի, ինչ պագոնի տակ եղած լինեն: Բանակ թալանածը իրավունք չունի ընդհանրապես Ղարաբաղի հարցի մասին խոսել»,- ասաց նա։

Հետաքրքիր է, իսկ ովքեր ունեն այդ իրավունքը, այս իշխանությո՞ւնը, որը Ղարաբաղը եւ այնտեղի իշխանություններին դիտարկում է ոչ անգամ օտարի, այլ թշնամու հայացքով, որին հրապարակավ կարելի է նախատել, մատ թափ տալ, սպառնալ, թե չխառնվես մեր գործերին, բայց դու ինքդ միջամտես ու հասնեն պաշտպանության բանակի հրամանատարի պաշտոնանկությանը միայն այն բանի համար, որ հանդգնել են հակադրվել քո թիմակիցներին։Ով ունի այդ իրավունքը, այս կառավարությո՞ւնը, որտեղ շատերը կամ պատկերացում չունեն Արցախի հարցի հետ կապված, կամ ունեն ուրույն պատկերացումներ։ Օրինակ «սուպերնախարար» Արայիկ Հարությունյանի մասին են այս օրերին տեղին հիշել, 2015 թվականին, երբ «Քաղաքացիական պայմանագիր» կուսակցության վարչության նախագահն էր, իրավապաշտպան Միքայել Դանիելյանի «Այլախոհանոց» հաղորդման ժամանակ խոսել է Արցախում ծառայող ՀՀ քաղաքացիների մասին։ Հաղորդման ժամանակ նա, հանդես գալով որպես ՔՊ կուսակցության վարչության նախագահ, հայտարարում է, որ Արցախում ծառայող ՀՀ քաղաքացիների մասով համաձայն է «Հելսինկյան ասոցիացիայի» կարծիքի հետ, որ ինքը տարիներ շարունակ զբաղվել է այդ հարցով, եւ այո, գտնում է խնդիր կա, որը հստակեցումների կարիք կա։ Իսկ «Հելսինկյան ասոցացիան» բազմաթիվ անգամներ հայտարարել է, որ ՀՀ քաղաքացիները չպետք է ծառայեն Արցախում, դա օրինական չէ, նրանք որպես կամավոր են մեկնում։

Հիմա, երբ Արայիկ Հարությունյանը բարձր պետական պաշտոն է զբաղեցնում, կառավարության արդյոք շարունակում է նույնը պնդել։ Արդյոք նա նախատել է Նիկոլ Փաշինյանին,կամ դատապարտել կուսակցի այդ քայլը, որը, փաստորեն, Արայիկ Հարությունյանի տրամաբանությամբ որդուն անօրինական է ուղարկել Արցախ ծառայության, դեռ մի բան էլ տեղն ընկած տեղը հաղթաթուղթ է դարձնում այդ փաստը։

Ի դեպ, նոր իշխանության այս սուպերնախարարի մտքի փայլատակումները անգերազանցելի են։ Նախօրեին էլ լուր տարածվեց, որ նա հրապարակել է բոլոր դպրոցի տնօրեններին հրաժարական տալ, քանի որ իշխանություններն իրենց համախոհների բանակն են հավաքում եւ գտնում են, որ նախկիններին ծառայած տնօրենների էպոխան ավարտվել է։ Արայիկ Հարությունյանի խոսնակը հերքել այդ լուրը։ Բայց ծուխն առանց կրակ չի լինում և Հարությունյանն հավանաբար թքած ունի իր եւ կուսակիցներին ոչ վաղ անցյալում տված հավաստիացումների վրա, թե իրենց իշխանության ժամանակ ոչ դպրոցները, ոչ բուհերը չեն քաղաքականացվելու։ Ասելը մի բան է, անելը մեկ ուրիշ։

Անի Սահակյան