«Սպասում էիք, որ ես Ռոբերտ Քոչարյանի ասուլիսի տապալումը պետք է դատապարտե՞մ». Զարուհի Բաթոյան
ՀՀ աշխատանքի և սոցիալական հարցերի նախարար Զարուհի Բաթոյանը, մամուլի ասուլիս ժամանակ, պատասխանելով լրագրողի այն հարցին, թե ինչու վերջինս դատապարտեց մայիսի 4-ին «Բուկինիստ» սրճարանում «Իմ մարմինը անձնական է» գրքի շնորհանդեսի տապալումը, սակայն նման վերաբերմունք չդրսևորեց Ռոբերտ Քոչարյանի մամուլի ասուլիսի տապալման ժամանակ, նշեց. «Դուք սպասում էիք, որ ես պիտի դատապարտե՞մ Ռոբերտ Քոչարյանի մամուլի ասուլիսի տապալումը... Ես երկակի ստանդարտ չեմ տեսնում, որովհետև խոսքը հասարակական կազմակերպության քննարկման մասին է և խոսքը ասուլիսի մասին չի եղել, ազատ խոսքի որևէ սահմանափակում չի եղել, այլ ազատ գործելու հնարավորության մասին է խոսքը: Իսկ ձեր նշած ասուլիսը, եթե հիշում եք, բոլորովին այլ պայմաններում էր, բոլորովին այլ իրավիճակում: Այս իմաստով որևէ ընդհանուր բան չեմ տեսնում ասուլիսի և գրքի քննարկամ միջև»:
Նախարարն իր խոսքում նշեց նաև, որ «Իմ մարմինն անձնական է» գրքում այլասերվածության որևէ նշույլ չկա, իսկ ինքն իր հայտարարությամբ դատապարտել է հասարակական կազմակերպության կողմից կազմակերպված միջոցառումը խափանելու փորձն ու կարևորել մարդու իրավունքների ոլորտում աշխատող հ/կ-ների համար անհրաժեշտ ապահով միջավայրի ստեղծումը, որպեսզի բարենպաստ պայմաններում կարողանան աշխատել:
Հետևեք մեզ Viber-ում
