Հայկ Մարությանը սևերի ու սպիտակների աշխատավարձ է սահմանել

Երևանի քաղաքապետ Հայկ Մարությանը որոշել է կարգին բարձրացնել իր և քաղաքապետարանի մնացած ղեկավարների աշխատավարձերը։

Երևանի ավագանու մայիսի 8-ի օրակարգում ընդգրկված է աշխատավարձերի բարձրացման հարցը։ Երևան քաղաքի ավագանու 2018 թվականի հոկտեմբերի 29-ի որոշման համաձայն՝ Երևանի քաղաքապետ Հայկ Մարությանի աշխատավարձը կազմում է 575 հազար դրամ, սակայն նոր փոփոխություններով նախատեսվում է դարձնել 1 մլն 200 հազար ՀՀ դրամ, այսինքն՝ այնքան, որքան վարչապետի աշխատավարձն է։
Երևանի քաղաքապետարանի բոլոր վարչությունների պետերի աշխատավարձերը կլինեն 641 հազար ՀՀ դրամ՝ ներկայիս 346 հազար դրամի փոխարեն, վարչական շրջանների ղեկավարների աշխատավարձերը կդառնան 773 հազար ՀՀ դրամ: Վերջիններս ներկայում ստանում են 400 հազար ՀՀ դրամ:
Քաղաքապետի առաջին տեղակալի աշխատավարձը կդառնա 947 հազար դրամ, մյուս երկու տեղակալներինը՝ 912 հազար դրամ:
Երևանի գլխավոր ճարտարապետ Արթուր Մեսչյանի աշխատավարձը, որոշման համաձայն, կլինի 912 հազար ՀՀ դրամ՝ 443 հազարի փոխարեն:
Քաղաքապետի խորհրդականները կստանան 667 հազարական դրամ:
Ինչ վերաբերում է սովորական աշխատողներին, ապա նրանց աշխատավարձը կբարձրացվի 28-30 տոկոսով։ Ի դեպ, քաղաքապետարանի հաստիքացուցակը, նախկին 1998 հաստիքի փոխարեն, այժմ 2124 հաստիքի է հասել։
Երևանի քաղաքապետարանը՝ որպես համայնք, իրավունք ունի ինքնուրույն տնօրինել իր բյուջեն և ավագանու որոշմամբ սահմանել աշխատավարձեր։ Փաստորեն, մայրաքաղաքի իշխանավորները կունենան առանձնահատուկ կարգավիճակ, որովհետև եթե ավագանին հաստատի այդ որոշումը, ապա քաղաքապետն ու նրա տեղակալները մի քանի անգամ ավելի բարձր կվարձատրվեն, քան նախարարները։ Անգամ վարչական շրջանի ղեկավարները ավելի բարձր կստանան, քան նախարարները։ Քաղաքապետարանի վարչության պետերի աշխատավարձերը համարժեք կլինեն նախարարների և պատգամավորների աշխատավարձերին։ Եվ սա այն դեպքում, երբ այդ նույն Երևանի քաղաքային բյուջեում համապատասխան միջոցներ այդպես էլ չեն գտնվում համայնքային հիմնարկ համարվող մանկապարտեզների, երաժշտական և սպորտի դպրոցների տնօրենների  աշխատավարձերը բարձրացնելու համար։  Իսկ Երևանի մանկապարտեզների աշխատակիցների աշխատավարձերը բարձրացվեցին ընդամենը 20 տոկոսով։ Ընդ որում, բարձրացումը նախատեսվում էր իրագործել գարնանը՝ մարտ կամ ապրիլ ամսին, և, հիշեցնենք՝ չի տարածվում մանկապարտեզների ղեկավար կազմի՝ տնօրենների և փոխտնօրնների վրա։ 

Հատկանշական է, որ Երևանի քաղաքապետարանի աշխատավարձերի բարձրացումից հետո համայնքային բյուջեից աշիատավարձի ֆոնդին շուրջ 1 մլրդ 800 մլն ավելի շատ գումար է հատկացվելու, քան հիմա։Համեմատության համար նշենք, որ Հայկ Մարությանը ժամանակին հայտարարել էր, որ մանկապարտեզների աշխատողների վարձատրության բարձրացման արդյունքում Երևանի  բյուջեից տարեկան կտրվածքով մանկապարտեզներին կտրվի 1 մլրդ դրամով ավելի շատ գումար։ Նա նաև ասել է, որ այժմ մանկապարտեզներում տարբեր աշխատավարձեր են ստանում՝ 70-100 հազար դրամ: Փաստորեն, բարձրացումից հետո մանկապարտեզների աշխատողները լավագույն դեպքում 120 հազար դրամ աշխատավարձ են ստանալու, որից եթե հանեք հարկային պահումները, կստացվի մտ 90 հազար դրամ՝ լավագույն դեպքում։ Իսկ տնօրենները, որոնց վրա դրված է կրթության բովանդակության և հիմնարկի ֆինանսական պատասխանատվությունը, միջինը 110 հազար դրամ աշխատավարձ են ստանում՝ առանց պահումների։ Երաժշտական դպրոցներում աշխատավարձն ավելի ցածր է։ Ի դեպ, դպրոցի տնօրենի աշխատավարձը ևս շատ ցածր է՝ 120-150 հազար դրամի միջակայքում է տատանվում՝ կախված աշակերտների թվից։

Հետաքրքիր է՝ այդ ինչպե՞ս է լինում, որ Հայկ Մարությանի ու նրա նեղ թիմի աշխատավարձը բարձրանում է կրկնակի, իսկ երբ խոսքը մանկավարժների մասին է, մի կերպ 20 տոկոս է բարձրանում։ Ի՞նչ տրամաբանությամբ են քաղաքապետարանի 600 հազարից մինչև 1,2 մլն դրամ աշխատավարձ ստացող ղեկավարները 110 հազար աշխատավարձ ստացող տնօրենից պահանջում անկաշառ և նվիրված աշխատանք։ Ի դեպ, մայրաքաղաքի մանկապարտեզների թիվը այդքան էլ շատ չէ՝ խոսքը մոտ 150 ՀՈԱԿ-ի մասին է, ղեկավար անձնակազմի դեպքում՝ մոտ 500-600 հոգու մասին ։ Ընդհանրապես որքանո՞վ է նորմալ, որ քաղաքապետարանի սովորական մասնագետը ավելի բարձր վարձատրվի, քան դպրոցի կամ մանկապարտեզի տնօրենները, որոնց վրա բովանդակային և ֆինանսական մեծ պատասխանատվություն է դրված։ Քաղաքապետի ապրիլի 29-ի որոշմամբ, ի դեպ, կրճատել է Երևանի մանկապարտեզների շենքերի վերանորոգման և հիմնանորոգման բյուջեն՝ 243 մլն դրամով։

Հավանաբար Հայկ Մարությանը առաջնորդվում է  սևերի և սպիտակների հայտնի տրամաբանությունը՝ Երևանում սպիտակները բարձր են վարձատրվում։

Հայկ Դավթյան