Մնացված 6 մլրդի համար պատասխան է տալու Նիկոլ Փաշինյա՞նը

Հաշվի առնելով այն հանգամանքը, որ վերացել են «Սպայկա» ՍՊ ընկերության գլխավոր տնօրեն Դավիթ Ղազարյանին կալանքի տակ պահելու հիմքերը, ինչպես նաև այն, որ քրեական գործի շրջանակներում վերջինս միասնական հաշվեհամարին վճարել է 1.000.000.000 ՀՀ դրամ գումար, ուստի նախաքննության նկատմամբ դատավարական հսկողություն իրականացնող դատախազի կողմից որոշում է կայացվել խափանման միջոցը՝ կալանավորումը փոփոխելու մասին:

Այսօր առավոտյան նման բովանդակությամբ հաղորդագրություն էր տարածել Պետական եկամուտների կոմիտեն։ Եվ սա այն դեպքում, երբ նույն ՊԵԿ-ը ավելի վաղ տարածված պաշտոնական հաղորդագրության մեջ հավաստիացնում էր, թե «Սպայկա» ընկերությունը պետական բյուջե չի վճարել ընկերության կողմից իրականացված ձեռնարկատիրական գործունեության արդյունքում առաջացած 7.036.666.312 ՀՀ դրամ մաքսատուրք և հարկ: Այսինքն՝ խոսվում էր ավելի քան 7 մլրդ դրամ չվճարված մաքսային վճարի մասին, հարցը լուծվեց 1 մլրդ դրամով։ Հետաքրքիր է ՝ ո՞վ է պատասխան տալու անհայտ մնացած 6 մլրդ դրամի համար՝ կոռուպցիայի և պետական մսխումների դեմ անհաշտ պայքար սկսած Նիկոլ Փաշինյան՞ը, թե բարձր «պրեմիաների» սիրահար Դավիթ Անանյանը։

Առաջացել է մի շատ պարզ տրամաբանական հարց՝ ինչպե՞ս է լինում, որ ընկերությունը նախ մեղադրվում է պետությանը ավելի քան 7 մլրդ դրամ վնաս հասցնելու համար, ընկերության գույքն ու հաշիվները վերցվում են կալանքի տակ, տնօրենը ձերբակալվում է, բայց հետո 1 մլրդ-ի դիմաց նույն մարդն ազատ է արձակվում, գույքի և հաշիվների կալանքն էլ վերացվում է։ Խնդիրն ամենևին էլ «Սպայկա» ՍՊ ընկերությունը փակելու կամ ամեն գնով ընկերության տնօրենին բանտ նստեցնելու մեջ չէ։ Ընդհակառակը՝ շատ ավելի լավ, որ ընկերությունը շարունակել է աշխատել, ընկերության աշխատողները չեն դառնալու գործազուրկ, իսկ նրա հետ պայմանագիր կնքած հազարավոր քաղաքացիները չեն կորցնելու իրենց եկամուտները։ Այս ամբողջ պատմության մեջ անհասկանալի է իրավական գործընթացը։ Ի սկզբանե ինչպե՞ս և ո՞վ է որոշել, որ պետությանը պատճառվել է այսքան կամ այնքան գումար, ի՞նչ մեթոդով են գնահատական տվել, թե «Սպայկան» ապօրինի ճանապարհով բեռնափոխադրումներ և ներմուծումներ է իրականացրել։

Առայժմ անհասկանալի է՝ 1 մլրդ դրամը «Սպայկա» ՍՊ ընկերության կողմից վճարվել է որպես գրա՞վ, թե՞ որպես պետությանը պատճառած վնասի հատուցում։ Դատելով այն բանից, որ 1 մլրդ դրամի վճարման մասին հաղորդագրությունը տարածել է ՊԵԿ-ը և ոչ թե իրավապահ մարմիններից որևէ մեկը՝ դատախազությունը կամ ՀՔԾ-ն, պետք է ենթադրել, որ կատարվածը չվճարված մաքսատուրքի բռնագանձում է։ Բայց այդ դեպքում հարց է առաջանում՝ այդ ի՞նչ հրաշք կատարվեց, որ 7 մլրդը դարձավ 1 մլրդ։ Անհասկանալի է նաև, թե ««Սպայկա» ՍՊ ընկերության գլխավոր տնօրեն Դավիթ Ղազարյանը բացի, 1 մլրդ վճարելուց, արդյոք ընդունե՞լ է մեղքը և իրեն մեղավոր ճանաչել։
Եթե այս հարցերին հրապարակավ հստակ իրավական պատասխաններ չտրվեցին, կնշանակի, որ դատական համակարգում բարդակ է սկսվել, և մենք գործ ունենք պետական ռեկետի հետ, որն աշխատում է մարդկանց վզին թվեր դնելու և հետո ինչ-որ թվի շուրջ բարիշելով հարցը փակելու մեխանիզմով։ Եվ դժվար է հավատալ, որ այն մարդիկ, ում Նիկոլ Փաշինյանը վստահել է պետական ռեկետի պատասխանատու գործը, սրբի պես մաքուր են և աշխատում են անկաշառ ու անշահախնդիր։

Հայկ Դավթյան