Թիմին փչացնելու նուրբ արվեստը
Հայաստանի և ՌԴ վարչապետների մասնակցությամբ աղմուկ հանած դրվագը կարծես թե մարելու միտում չունի: Հիմա էլ տեղեկություններ կան, որ այդ դրվագով պայմանավորված Ալեն Սիմոնյանի արձագանքը կարող է հայ-ռուսական հարաբերությունների հերթական լարումն առաջացնել: Սիմոնյանը <<անտակտ>> էր որակել ՌԴ վարչապետի արարքը: Հիշեցնենք, որ փոքրիկ այդ բառախաղը տարբեր ընկալումների առիթ տվեց, ոմանք համարեցին, թե ՌԴ վարչապետը ծաղրել էր Հայաստանի վարչապետին: ՌԴ վարչապետը ի պատասխան Հայաստանի վարչապետի հարցադրման՝ թե, եթե հարցեր չկան, ապա անցնենք… փորձել էր կատակել՝ ո՞ւր անցնենք: Այդ ամենը, անշուշտ, ռուսերենով: Մեդվեդևն ըստ երևույթին նկատի ուներ անցնենք ընդմիջման սրահ, որը, սակայն, շարունակություն չունեցավ Հայաստանի վարչապետի խոսքում:
Մեդվեդևի` Փաշինյանին ուղղված «Перейти куда?» կեսկատակ-կեսլուրջ հարցադրումն ու դրան հաջորդած ծիծաղը մի չհանդարտվող փոթորիկ բարձրացրեց: Խորհրդարանական մեծամասնության պատգամավորները, գործադիրի ներկայացուցիչները մեկը մյուսին հերթ չտալով նետվեցին շեֆի պատիվը պաշտպանելու եւ անարգանքի սյունին գամեցին ՌԴ վարչապետին` շեշտելով Նիկոլ Փաշինյանի մեծահոգաբար լռելու ու «դուխով» լինելու հատկանիշը:
Որոշներն էլ այնքան դուխով գտնվեցին, որ ոչ թե ֆեյքերի, այլ սեփական դեմքով վիրավորեցին մեր ռազմավարական դաշնակից երկրի վարչապետին: ԱԺ փոխնախագահ Ալեն Սիմոնյանը ՌԴ Մեդվեդևի պահվածքն «անտակտ» որակեց, ասում են, թե ռուսական վերնախավում չափազանց մեծ դժգոհության տեղիք է տվել: Խնդիրն այն է, որ Ալեն Սիմոնյանը ՀՀ ԱԺ և ՌԴ Դաշնային ժողովի միջխորհրդարանական հանձնաժողովի նախագահն է: Հիմա ռուսական կողմը ոչ պաշտոնական խողովակներով հարց է բարձրացնում, թե ինչպես կարող է ՌԴ վարչապետին «անտակտ» որակող մարդը նման պաշտոն զբաղեցնել:
Դիմա, Դիմոչկա, մի խոսքով՝ մի կաթիլ մեղրի պատմություն: Սակայն ամենազավեշտալին այս ամենում Նիկոլ Փաշինյանի ֆեյսբուքյան արձագանքն էր միջադեպին եւ դրա արձագանքներին. <<Նոր մի պահ մտնում եմ ֆեյսբուք ու աչքերիս չեմ հավատում, որ կոռուպցիոն համակարգի մնացորդները այսքան հեշտությամբ կարող են փոթորիկ առաջացնել սոցիալական ցանցերում։
ԵԱՏՄ միջկառավարական խորհրդի նիստին ոչ միայն ՌԴ վարչապետ Դմիտրի Մեդվեդեւը, այլեւ մենք բոլորս հույս ունեինք, որ րոպե առաջ перейдем սուրճի սենյակ, որովհետեւ բոլորս ահավոր հոգնել էինք ու սուրճ էինք ուզում։ Աշխատանքները նախատեսվածից երկուսուկես ժամ ավել տեւեցին։
Իսկ նախորդ օրվա մեր շփումը բոլոր հիմքերը տվել էր ոչ աշխատանքային հատվածին անհամբեր սպասելու։ Էս ամենը պիտի ասվի՞, չեմ հասկանում>>,- գրել է նա։
Ինչ խոսք առաջին հերթին տարակուսելի էր, որ ՀՀ վարչապետը հարկ էր համարել անդրադառնալ դրան: Երկրի թիվ մեկ դեմքը գերզբաղված օրակարգից ժամանակ տրամադրեց այս հարցին ու նախ փուռը տվեց իր թիմակիսներին, որովհետեւ նախեւառաջ նրանք էին համացանցում փոթորիկ բարձրացրել ու նետվել շեֆի պատիվը պաշտպանելու: Սա նշանակում է, որ անկախ բոլոր կարգի ստորացումներից նա պատրաստ է անմնացորդ նվիրվել մեծ եղբորը եւ ինչպես ինքն է ասում անհամբեր սպասել ոչ աշխատանքային հատվածներին:
Անի Սահակյան
Հետևեք մեզ Viber-ում
