Ներիշխանական հակամարտություն․ մարտը չի ավարտվում

Հեմոդիալիզի սարքավորումների գնումների գործընթացի հնարավոր խախտման դեպքով Պետական վերահսկողական ծառայության ղեկավար (լիազորությունները ժամանակավորապես դադարեցված են) Դավիթ Սանասարյանի դեմ առաջադրված մեղադրանքը իշխանության համար լրջագույն փորձաքար է դառնում։

Սանասարյանին առաջադրված մեղադրանքներին հաջորդած գործընթացներից պարզ է դառնում, որ իշխանությունում, ի հեճուկս հերքումների , խորը անջրպետ կա տարբեր բեւեռների ու թեւերի միջեւ եւ այստեղ միատար չեն միմյանց նկատմամբ փոխադարձ հարաբերությունները։ Հատկապես վերջին շրջանում շատ է խոսվում «սորոսական» թեւի մասին, որի ներկայացուցիչն էր նաեւ Դավիթ Սանասարյանը, ով Նիկոլ Փաշինյանի կուսակցության անդամ չէ եւ իշխանության է եկել Մերժին-Սերժին նախաձեռնությունից, մյուս թեւը՝ բնականաբար՝ ՔՊ-ականներն են։ Սանասարյանին առաջադրված մեղադրանքից հետո բացահայտ պատերազմ է ընթանում այս երկու թեւերի միջեւ, մինչեւ անգամ նոր իշխանություններին մեղադրեցին «գործ կարելու» մեջ, սորոսականները թեպետ իշխանությունում փոքրամասնություն են կազմում, սակայն քաղաքացիական հասարակությունն ու ՀԿ-ներն են, որ հանդես են գալիս Սանասարյանին պաշտպանելու գործով։ Ակնհայտ է, որ ներքին այս հակամարտությունը զուտ անձնային հարաբերություններով պայմանավորված չէ եւ Նիկոլ Փաշինյանն ու իր թիմը Սանասարյանին «զոհաբերելով» մի քանի թիրախի են խփում, առաջինն այն ուղերձն է, որ նոր իշխանությունն այնքան դեմոկրատ է, որ պատրաստ է նաեւ իր «մեծ ձկների» գլխից բռնել, միայն թե տվյալ պարագայում յուրային ասվածը հարաբերական է, Սանասարյանը «դրսից» եկած է եւ ՔՊ հնաբնակ չէ, երկրորդը՝ Նիկոլ Փաշինյանը միգուցե Ռուսաստանին այս պահին «ապացուցելու» ինչ-որ բան ունի ու «զոհաբերում» է Սանասարյանին։ Սյն , որ իշխանությունը միատար չէ ու այս երկու բեւեռների միջեւ հակասությունը խորացել է, ակնհայտ է դառնում երկու կողմերի հայտարարություններից։

Այսօր էլ առողջապահության նախարար Արսեն Թորոսյանի պատասխաններից էր դա երեւում։ Նշենք, որ ըստ տեղեկությունների՝ Սանասարյանին մեղադրանք է առաջադրվել Թորոսյանի ցուցմունքի հիման վրա․«Պլատոնն իմ ընկերն է, բայց ճշմարտությունն ավելի թանկ է»: Որպես նախարար՝ ես չունեմ հարազատ, բարեկամ և ընկեր» ասաց Թորոսյանը ի պատասխան իր հասցեին մեղադրական-հարցերին։ Սակայն նա այդպես էլ հստակ պատասխան չտվեց՝ իր ցուցմունքի հիման վրա է Սանասարյանի վիճակը «բարդացել», թե ոչ․«Ես դատախազ չեմ, քննիչ չեմ, առավել ևս՝ դատավոր չեմ, որ ասեմ, թե Դավիթ Սանասարյանի վիճակն ինչի հետևանքով է վատացել կամ թեթևացել»:
«Ես ուզում եմ ևս մեկ անգամ վերջնական շեշտել, որ որևէ մեկի դեմ ցուցմունք չեմ տվել: Ես ներգրավված եմ իրավական գործընթացում և ինձ տրվող հարցերին ի պատասխան տեղեկատվություն եմ տվել: Դա չի նշանակում ինչ-որ մեկին դեմ կամ կողմ ցուցմունք»։ Փորձեց մանեւրել, թե ցանկացած բան, ինչ ինքը գիտի՝ հասանելի է լինելու իրավապահ մարմիններին. «Դավիթ Սանասարյանի գործին ես ամբողջությամբ չեմ տիրապետում և չպիտի տիրապետեմ, բացի այդ, կա նախաքննական գաղտնիք, որը չպիտի հրապարակվի»

Հարցին, թե որպես նույն թիմի անդամ հավատո՞ւմ է արդյոք Դավիթ Սանասարյանին, և ինչպիսի՞ն են իր զգացողություններն այն առումով, որ գուցե իր ցուցմունքը վնասել է Դավիթ Սանասարյանին, Արսեն Թորոսյանը ընդգծեց. «Ես ենթադրություններով չեմ առաջնորդվում, այլ առաջնորդվում եմ հետևյալ սկզբունքով` «Պլատոնն իմ ընկերն է, բայց ճշմարտությունն ավելի թանկ է»:

Իհարկե, լավ է, որ նախարարն առաջնորդվում է այդ սկզբունքով, բայց ավելի լավ կլինի, որ դա գործի բոլորի նկատմամբ, այլ ոչ թե հատվածաբար, օրինակ, երբ Սամվել Ալեքսանյանին պատկանող հիվանդանոցին են ամենամեծ պետպատվերն իջեցնում, կամ սեփական կնոջ հիվանդանոցին, այդ ժամանակ ինչպես հասկանալ՝ նախարարն իսկապես այդ սկզբունքով է առաջնորդվում, թե ծանոթ-բարեկամի։

Անի Սահակյան