Մոսկվայի ու Վաշինգտոնի լուռ «դաբրոն» ու «OK»-ը՝ Արցախի հարցում
ԱՄՆ-ը, որպես ԵԱՀԿ Մինսկի խմբի համանախագահ, լրջորեն է վերաբերում ղարաբաղյան հակամարտության կարգավորման մեջ իր պատասխանատվությանը և հավատարիմ է խնդիրը խաղաղ ճանապարհով լուծելու հարցում կողմերին օգնելու ջանքերին։ Այս մասին լրագրողներին հայտարարել է պետքարտուղարի Եվրոպայի և Եվրասիայի հարցերով օգնականի տեղակալ Ջորջ Քենթը։
«ԱՄՆ-ը լրջորեն է վերաբերում իր պատասխանատվությանը՝ որպես ԵԱՀԿ Մինսկի խմբի համանախագահող։ Մենք ուրախ ենք, որ կողմերի միջև առաջնորդների և ԱԳՆ ղեկավարների մակարդակով հանդիպումներ են տեղի ունեցել։ Կողմերը շփման գծում լարվածությունը թուլացնելու պայմանավորվածություն են ձեռք բերել։ Վերջերս Մոսկվայում Ադրբեջանի, Հայաստանի և Ռուսաստանի ԱԳՆ ղեկավարների հանդիպմանը բավարար համաձայնություններ են ձեռք բերվել»,- ասել է Քենթը։
Խոսելով Հայաստանի և Ադրբեջանի արտգործնախարարների հաջորդ հանդիպումը Միացյալ Նահանգներում անցկացնելու հնարավորության մասին՝ Պետդեպի պաշտոնական ներկայացուցիչն ասել է․ «Ինչ վերաբերում է հաջորդ հանդիպմանը, ես չեմ կարող ասել, որ մենք որոշել ենք տեղը։ Սակայն վստահ եղեք, որ ԱՄՆ-ը լրջորեն է վերաբերում իր պարտավորություններին։ Մենք ուզում ենք աջակցել գործընթացին, որը կհանգեցնի հակամարտության խաղաղ լուծմանը։ Մենք հավատարիմ ենք մնում խաղաղ ճանապարհով հակամարտությունը լուծելու համար կողմերին օգնելու ձգտմանը»,- նշել է նա։
Այսպես, ԱՄՆ-ն արձանագրում է, որ հավատարիմ է բանակցային գործընթացի շարունակմանը, և պատրաստվում է կողմերին աջակցել:
Ուշագրավ է, որ ամերիկացի պաշտոնյան շեշտում է, որ պայմանավորվածություն է ձեռք բերել շփման գծում լարվածության թուլացման մասին: ԱՄՆ-ն կարծես կարևորելով Հայաստանի և Ադրբեջանի ԱԳ նախարարների վերջին հանդիպումը Մոսկվայում և դրա արդյունքները, այժմ էլ ամերիկյան հովանու ներքո հանդիպման մասին է ակնարկում՝ հստակ ընդգծելով, որ Վաշինգտոնը ևս ցանկանում է աջակցել կարգավորման գործընթացին:
Հիշեցնենք, որ նախօրեին Ադրբեջանում ԱՄՆ դեսպանի տեղակալ Ուիլյամ Գիլը հայտնել էր, որ ԱՄՆ-ն կարող է ապագայում ընդունել Հայաստանի և Ադրբեջանի արտգործնախարարների հանդիպումը Վաշինգտոնում:
Ըստ ամենայնի, Մոսկվա-Վաշինգտոն ճակատում առկա է համաձայնություն՝ ղարաբաղյան կարգավորումը տանել համաձայնեցված ուղով, թեկուզ՝ «Լավրովի պլանի» ներքո:
Հնարավոր է լինեն հարցեր՝ որոնց շուրջ ԱՄՆ-ն ու ՌԴ-ն չունեն ընդհանուր պատկերացումներ, սակայն, նկատվում է, որ գոնե այս պահին Վաշինգտոնն ու Մոսկվան միասին են գործում: Այսպես ասած՝ պրոցեսը միասնական առաջ են տանում, մնացածը ժամանակի ու տեխնիկայի հարց է:
Թամար Բագրատունի
Հետևեք մեզ Viber-ում
