Ի՞նչ է առաջարկում Պուտինը Հայաստանին

Լեռնային Ղարաբաղի հակամարտության կարգավորման գործընթացը լուրջ մարտահրավերի է բախվել, հայտարարել է Ռուսաստանի արտգործնախարար Սերգեյ Լավրովը երեկ ուշ երեկոյան Բաքվում Ադրբեջանի նախագահ Իլհամ Ալիևի հետ հանդիպման ժամանակ: «Մենք, իրոք, թե՛ նախագահի մակարդակով, թե՛ վարչապետի մակարդակով, մեր նախարարության մակարդակով, թե՛, իհարկե, պաշտպանության նախարարության և գլխավոր շտաբի մակարդակով ձեռնարկել ենք անհրաժեշտ ամեն ինչ՝ օգնելու կողմերին կրակի դադարեցման պայմանավորվածություն ձեռք բերել: Պատրաստ կլինենք նպաստել նրան, որ այդ պայմանավորվածությունը չխախտվի»: «Կարևոր է, հանդարտեցնելով իրավիճակը այդ կոնկրետ հարցում, ավելի ակտիվորեն, հուսով եմ՝ մեզ դրան կմղեն վերջին օրերի իրադարձությունները, զբաղվել քաղաքական կարգավորմամբ: Մենք առաջարկներ ունենք, որոնք համանախագահների հետ համատեղ ձգտում ենք ավելի ակտիվորեն գործարկել՝ ի շահ Ադրբեջանի և Հայաստանի միջև համաձայնության ձեռքբերման», ասել է ՌԴ արտաքին քաղաքական գերատեսչության ղեկավարը: Լավ է, որ իրավիճակը հանդարտեցնելու ջանքեր են գործադրվում: Պարզ չէ, թե որքանով է Հայաստանի շահերից հանդես գալիս Ռուսաստանը, որովհետև վերջին օրերին ռուսական կողմի հայտարարությունները` մեղմ ասած, Հայաստանի օգտին չեն: Ինչպես հայտնի է, ԵԱՀԿ Մինսկի խմբի համանախագահները տարածաշրջանում են, նրանք երեկ Բաքվում էին: Նրանք այսօր կմեկնեն Լեռնային Ղարաբաղ: Հայաստանում միջազգային միջնորդները կլինեն ապրիլի 9-ին: Ահա թե ինչ է ասել ռուս համանախագահը: «Ընդհանուր կարծիքն այն է, որ չի կարելի թույլ տալ նման միջադեպերի կրկնություն», - Բաքվում նախագահ Իլհամ Ալիևի հետ հանդիպումից հետո հայտարարել է ԵԱՀԿ Մինսկի խմբի ռուսաստանցի համանախագահ Իգոր Պոպովը: Հանդիպման ավարտին լրագրողների հետ զրույցում դեսպան Պոպովը նշել է, որ առայժմ է վաղ է գնահատական տալ կատարվածին: Այսինքն` ինչ՞ գնահատական հնարավոր չէ տալ: Ռուսաստանը չի՞ հավատում ռազմավարական դաշնակից Հայաստանից տարածվող տեղեկատվության ճշմարտացիությանը և լրացուցիչ հստակեցումների կարիք ունի՞... Առհասարակ, եթե ուշադիր հետևենք այսօր պաշտոնական Երևանից հնչող գնահատականներին, կտեսնենք, որ բացի ադրբեջանական ագրեսիայից առավել ակտիվ քննարկվում է ռուսական գործոնը: Սերժ Սարգսյանը Գերմանիայում դժգոհում է այն փաստից, որ Ռուսաստանը և ՀԱՊԿ-ի անդամ պետությունները զենք են վաճառում Ադրբեջանին: Ռուսաստանի կողմից Ադրբեջանին վաճառվող զենքի հարցը միշտ եղել է և կա Հայաստանի արտգործնախարարության օրակարգում, լրագրողներին ասել է փոխարտգործնախարար Շավարշ Քոչարյանը։ Փոխարտգործնախարարը չմանրամասնեց՝ այդ հարցը պաշտոնական Երևանն ինչպես է ձևակերպում և ինչ պահանջ է դնում։ Բայց Քոչարյանը, միաժամանակ, նկատեց, թե՝ վերջին օրերի արյունալի բախումներին արձագանքելիս Ռուսաստանը երկակի կարգավիճակում էր․ - «Մի կողմից՝ որպես միջնորդ Մինսկի խմբում, մյուս կողմից՝ քանի որ գործողությունները ծավալվել են ոչ Հայաստանի դեմ, այլ Լեռնային Ղարաբաղի Հանրապետության, ապա կարելի է ասել, որ ինքը իրեն պարտավորեցված չի զգացել։ Այդ տեսակետից Ռուսաստանի արձագանքը եղել է՝ որպես միջնորդի։ Համենայնդեպս, ինքն էլ է շատ լուրջ դերակատարում ունեցել այն հարցում, որպեսզի դադարեցվի կրակը»։ Հայաստանը չի կարող վստահել կամ հույս դնել ռազմավարական դաշնակիցների՝ ՀԱՊԿ անդամների վրա, սա պարզ է: Բայց հիմա մենք ինչպես ենք՞ վստահելու ռուսական ջանքերին, եթե չենք վստահում նաև Ռուսաստանին... Հետևաբար հարցը, թե ինչ է առաջարկում Պուտինը կողմերին` առավել հետաքրքրական է հենց հայկական կողմերի շահերի դիտանկյունից: Հայկական կողմը չպետք է ընկրկի որևէ միջնորդի առջև: Ադրբեջանական ագրեսիայի համար պետք է պատժվի հակառակորդը և հայկական կողմը պետք է մնա հաղթական դիրքում` պարտադրելով խաղաղություն: Մետաքսյա Շալունց