Մոսկվան «ազատում» է գերիներին․ Պուտինն անցել է գործի

Ռուսաստանը գերիների փոխանակման հարցում «բոլորը բոլորի դիմաց» սկզբունքի կողմնակից է, որը նպաստում է հակամարտության գոտիներում վստահության հաստատմանը, այս մասին մամուլի ասուլիսում հայտնել է ՌԴ արտգործնախարար Սերգեյ Լավրովը:

«Մենք միշտ և ամեն պարագայում նման իրավիճակների՝ աճյունների, ռազմական գերիների հարցում մարդասիրական սպառիչ լոււծման կողմնակից ենք և առաջնորդվում ենք «բոլորը բոլորի դիմաց» սկզբունքով: Մենք կարծում ենք, որ դա կնպաստի հակամարտության գոտիներում վստահության մթնոլորտի հաստատմանը՝ լինի դա Մերձավոր Արևելքում, Լեռնային Ղարաբաղում, թե Ուկրաինայի հարավ-արևելքում»,- ասել է Լավրովը:

Լավրովը հավելել է, որ հենց այդ սկզբունքն է ընկած Ուկրաինայի հարավ-արևելքում հակամարտության կարգավորման վերաբերյալ մինսկյան համաձայնությունների հիմքում:
Այսպիսով, Մոսկվան, կարելի է ասել, անցել է գործի։ Առաջին քայլերը՝ վստահության մթնոլորտի ձեւավորման հարցում իրագործվում են, կամ իրագործման ճանապարհին են։ Ավելին՝ այդ մասին, ոչ ավել, ոչ պակաս, հայտարարում է Ռուսաստանի արտգործնախարարի մակարդակով։

Սա վկայում է այն մասին, որ երեք երկրների արտգործնախարարների մակարդակով ավելի վաղ ձեռք բերված՝ պատանդների հարազատների փոխայցելությունների կազմակերպման մասին պայմանավորվածությունը կարող է ըստ ամենայնի պսակվել կոնկրետ արդյունքներով, ինչի արդյունքում հնարավոր է գերիներ փոխանակվեն:
Մինչդեռ հարկ է նկատել, որ նախկինում հայկական կողմը, հատկապես՝ Արցախը հստակ դեմ է արտահայտվել այդպիսի քայլերի հնարավորությանը հստակ հիմնավորելով, որ ադրբեջանցի դիվերսանտները, այսինքն՝ կոնկրետ հանցագործություններ իրականացրած մարդիկ հավասարապես չեն կարող փոխանակվել գերիների հետ։

Կարելի է ասել, Մոսկվան, հող է նախապատրաստում՝ Լավրով-Մնացականյան-Մամեդյարով եռակողմ բանակցությունների արդյունքները ի ցույց դնելու ուղղությամբ։
Ի դեպ, այս օրերին ռուսաստանցի մի շարք փորձագետներ ակտիվորեն ռուսական ակտիվ ջանքերի լոբբինգով են զբաղված՝ շեշտելով, որ ԵԱՀԿ Մինսկի խմբում հենց Ռուսաստանն է միակ «գործ անող» պետությունը, մյուս երկուսը՝ Միացյալ Նահանգներն ու Ֆրանսիան «թքած ունեն» ղարաբաղյան հակամարտության կարգավորման վրա։

Թամար Բագրատունի