Սթափվեք գժուկներ

Նիկոլ Փաշինյանի ընտանեկան լրատվամիջոցը տեղեկացնում է, որ «ասֆալտափռման» օպերացիայի շրջանակում ոստիկանության աշխատակիցները Ծովակալ Իսակովի պողոտայից բերման են ենթարկել ՀՀ ԱԺ ՀՀԿ խմբակցության նախկին պատգամավոր Արկադի Համբարձումյանի (Դերժավայի Արկադի) թիկնազորի անդամներին: Կայքի տեղեկություններով, Արկադի Համբարձումյանը ամենագնաց «Մերսեդեսով» է եղել, որի հետեւից մեկ այլ մեքենայով եղել է նրա թիկնազորը: Ըստ մեր տեղեկությունների՝ «ասֆալտին» պառկեցնելու պատճառը թիկնազորով երթեւեկելն է եղել:
Մեր տեղեկություններով իրականում Դերժավայի Արկադին սերտ շփումներ ունի Սերժ Սարգսյանի հետ, ինչն էլ պատճառ է դարձել այս օպերացիան իրականացնելու համար: Նիկոլ Փաշինյանը շարունակում է հակահեղափոխական օջախներ գտնել իր համար ու հերթով գնալ այդ օջախները չեզոքացնելու:
Անշուշտ, տարակուսելի է ում կամ ինչի համար են այսպիսի լուրեր տարածում: Միթե իշխանությունները մտածում են, որ այսպիսի էժանագին բեմադրություններով դեռեւս հնարավոր է սնել հանրությանը: Նոր հայաստանյան իրողություններում ամենամեծ հակահեղափոխականը վարչապետի գլխավորած քաղաքական թիմի՝ երկրին հարվածող արտաքին ու ներքին օրակարգային խնդիրներին դիմագրավելուն անպատրաստ լինելն է, հասարակությանը «սև ու սպիտակի» բաժանելը, պետության ղեկավարի «ասֆալտին փռելու», «ծնոտը ջարդելու» ցուցումներն ու գործողությունները: Այս գործողություններից հետո միթե կարելի է ակնկալել, որ որեւէ ներդրող կգա Հայաստան կամ ցանկություն ու համարձակություն կունենա ներդրումներ կատարել: Հենց այս պատճառով է, որ իշխանության հռչակած տնտեսական հեղափոխությունն անընդմեջ բախվում է ներքին և արտաք լրջագույն դիմադրության, խոշոր բիզնեսի ներկայացուցիչների և ներդրողների հետ վարվող քաղաքականությունը իրականացվում է հին վարչակարգի պատժիչ գործիքներով:
Դատական համակարգում ևս վստահության ճգնաժամ է, ամիսներ են անցել, հասարական ուշադրության առանցքում գտնվող և ոչ մի գործ իր տրամաբանական ավարտին չի հասել, քանզի գործ ունենք հեռախոսային արդարատության հետ, երբ որեւէ մեկին փակելու հարցը կայացվում է ամենաբարձր՝ վարչապետի մակարդակով, իսկ քրեական գործերը կարվում են ոչ հիմնավոր փաստերի վրա:
Այս տխուր իրավիճակում պարծենալ, թե հայրենի ոստիկանությունը մի քանի թիկնապահի փռել է ասֆալտին միայն այն բանի համար, որ նրանք ուղեկցել են ՀՀԿ-ի հետ սերտ կապեր ունեցող գործարարին, նույնիսկ մանկամտություն էլ չէ, այլ անմեղսունակություն: Եւ ինչպես ժամանակին դասականը կասեր՝ <<Սթափվեք գժուկներ>>, երկրում տեղի է ունեցել, ինչպես դուք եք ասում՝ ոչ բռնի, թավշյա հեղափոխություն ու սադոմազոխիզմ տեսարաններով հնարավոր չէ պետություն կառուցել, գործ անելու ժամանակն է:

Անի Սահակյան