Նիկոլ Փաշինյանի խորտակվող վարկանիշն ու կոռուպցիայի ուրվականը

Վարչապետ Նիկոլ Փաշինյանը, անդրադառնալով իր տված ու չկատարած խոստումներին, որի համար իրեն քննադատում են, նա հայտարարել է, որ մեկ տարում չեն կարող բոլոր խոստումները կատարել։ «Մենք, ինչ որ ասել ենք, մեր ասածների վերաբերյալ քննադատություններն էլ ենք լսում, մեր ասածների վերաբերյալ հակափաստարկներն էլ ենք լսում։
Էն դեպքերում, երբ որ մենք ինչ-որ գործողություն անում ենք հետևողական, ասում են՝ դուք քննադատություն չեք լսում, դուք երկրորդ կարծիք չեք լսում։ Էն դեպքում, երբ որ մենք փորձում ենք փաստարկները լսել, ավելի խորանալ խնդիրների մեջ, հասկանալ՝ ճիշտ տարբերակները որոնք են, ասում են՝ Դուք Ձեր ասածից հետ եք կանգնում։ Հիմա մենք սուպերվարչապետական համակա՞րգ ենք ուզում։ Հետո էլ ասում են՝ սուպերվարչապետական համակարգին դեմ ենք։ Հիմա վերցնենք, թե 91 թվից ես ինչ հոդվածներ եմ գրել, էդ հոդվածներին օրենքի ուժ տանք, ասենք՝ որ էն ժամանակ սենց գրված ա, ուրեմն դա պետք ա լինի իրականությո՞ւն»,- հայտարարել է Փաշինյանը։
Այնուհետև նա թվարկել է կատարածը՝ Հայաստանում 50 հազար աշխատատեղ մի տարվա ընթացքում ստվերից դուրս է բերվել, վարչապետը վստահ է, որ Հայաստանում 40 միլիարդ դրամով առնվազն պետականա բյուջեի եկամտային մասը գերակատարելու են, ուսուցիչների աշխատավարձը բարձրացնելու են, զինվորների աշխատավարձը հուլիսի մեկից բարձրանում է, սահմանապահ զորքերի, ԱԱԾ-ի, ոստիկանության աշխատավարձերն արդեն բարձրացել են, 205 հազար մարդու աշխատավարձը հուլիսի 1-ից բարձրացել է, բուժաշխատողների աշխատավարձը 30 տոկոսով բարձրացել է, 85 հազար մարդու նպաստը և թոշակը բարձրանում են այնքան, որ ցածր չլինի նվազագույն սպառողական զամբյուղից։ Հայաստանի Հանրապետությունում տեղի են ունեցել ժողովորդական չափանիշների աներկբայորեն համապատասխանող ընտրություններ։ Հայաստանի Հանրապետությունում մուտքի շուկայի որևէ արգելք չկա։ <<Ավելի՞ն եք ակնկալում։ Ճիշտ եք անում, որ ավելին եք ակնկալում, և ավելին կլինի>>,- ասել է Փաշինյանը։
Նա նաև հավելել, թե չի ուզում խորամուխ լինել, թե արդյոք իր վարկանիշը նվազել է։ Նա խորհուրդ է տվել՝ երբ ինքը քայլում է Երևանի փողոցներում, թող լսածներ ունեցողները հետևեն և տեսնեն՝ կա՞ նման բան, թե՞ ոչ։ Ակնհայտորեն Նիկոլ Փաշինյանը խառն է՝ նա հասկանում է, որ իր վարկանիշի անկումն անխուսափելի է, որովհետև եթե անգամ, ինչպես ինքն է ասում՝ հետևենք նրա փողոցային զբոսանքներին, ապա դրանք այլևս չունեն մեկ տարի առաջվա հանրային խանդավառությունը։ Տնտեսական ցուցանիշները, որոնց մասին խոսել է Փաշինյանը, պարզ իմիտացիա են, ոչ ավելին։ Միակ խաղաթուղթը մնացել է ստվերի և կոռուպցիայի դեմ պայքարը, որն առայժմ որպես վահան է հանդես գալիս Փաշինյանի համար, բայց դա չի կարող հավերժ լինել։
Կոռուպցիայի դեմ պայքարի առաջին լուրջ հետքայլը, ի դեմս Դավիթ Սանասարյանի սկանդալի, արդեն իսկ արված է։ Այս հարվածից լրջորեն տուժել է Փաշինյանի հակակոռուպցիոն իմունիտետը այն աստիճան, որ նա չի բացառել, որ պետական վեևրահսկողական ծառայությունն իր հանձնարարականով մի օր էլ ստուգումներ կիրականացնի պետական վերահսկողական ծառայությունում։ Այն բոլոր քայլերը, որոնք այսօր արվում են կոռուպցիյաի դեմ պայքարի անվան տակ, կարող են շատ հանգիստ կոռուպցիայի մեխանիզմներ դիտարկվել․ օրինակ՝ վարչապետի տիկնոջ կողմից գլխավորվող հիմնադրամների դրամահավաքները։ Մեկնաբանության խնդիր է։ Այս առումով Նիկոլ Փաշինյանի խորտակովող վարկանիշն ուղիղ համեմատական է կոռուպցիայի հառնող ուրվականին։

Հայկ Դավթյան