Նուրբ ակնարկներ Մոսկվայից՝ Արցախում ազդեցության մասին

Սերգեյ Լավրովը և ԵԱՀԿ գլխավոր քարտուղարը մտքեր են փոխանակել ԼՂ հակամարտության կարգավորման գործում ԵԱՀԿ դերակատարության մասին: ՌԴ ԱԳ նախարար Սերգեյ Լավրովն նախօրեին հանդիպել է ԵԱՀԿ գլխավոր քարտուղար Թոմաս Գրեմինգերի հետ, որը Մոսկվա է ժամանել` մասնակցելու Միջազգային անվտանգության VIII մոսկովյան համաժողովին:

Բանակցություններում կողմերն ընդգծել են ԵԱՀԿ դերակատարության աճող կարևորությունը եվրաատլանտյան տարածաշրջանում ռազմաքաղաքական իրավիճակում լարվածության վերացման գործում: «Կայացել է մտքերի փոխանակում ԵԱՀԿ դերակատարության մասին նաև Ուկրաինայում և Լեռնային Ղարաբաղում հակամարտությունների կարգավորմանն աջակցելու գործում: Դիտարկվել է կազմակերպության ինստիտուտների ընթացիկ աշխատանքը», - ասվում է ՌԴ ԱԳՆ հաղորդագրության մեջ:

Այս հանդիպումից հետո պաշտոնական Մոսկվան չի սահմանափակվել պաշտոնական հայտարարությամբ: Ռուսաստանի արտգործնախարարության պաշտոնական ներկայացուցիչ Մարիա Զախարովան ամենաշաբաթյա ճեպազրույցի ժամանակ անդրադարձել է ՌԴ ԱԳ նախարար Սերգեյ Լավրովի և ԵԱՀԿ գլխավոր քարտուղար Թոմաս Գրեմինգերի միջև նախօրեին կայացած բանակցություններին, որոնց ընթացքում քննարկվել է նաև ԼՂ հակամարտության կարգավորման հարցը:

«Մենք կփորձենք արդարացնել պարոն Գրեմինգերի հույսերն այդ հարցում», - լրագրողի հարցին պատասխանել է Զախարովան՝ նկատի ունենալով Գրեմինգերի այն արտահայտությունը, որ Ռուսաստանը կօգտագործի իր ազդեցությունը ԼՂ հակամարտության կարգավորման համար, որպեսզի մոտեցնի խաղաղության հաստատման օրը: Մարիա Զախարովան նշել է նաև, որ մանրամասն տեղեկություններ չունի, թե արդյոք Լավրովն ու Գրեմինգերը պայմանավորվել են աջակցել մարդասիրական միջոցառումներին, որոնց իրականացման շուրջ պայմանավորվածություն են ձեռք բերել հակամարտության կողմերը Վիեննայում կայացած հանդիպման ժամանակ:
Հիշեցնենք, որ նախօրեին Սերգեյ Լավրովը և ԵԱՀԿ գլխավոր քարտուղարը մտքեր են փոխանակել ԼՂ հակամարտության կարգավորման գործում ԵԱՀԿ դերակատարության մասին:

Իսկ ավելի վաղ հայտնի դարձավ, որ Վաշինգտոնը Հայաստանի և Ադրբեջանի արտգործնախարարներին առաջարկել է հանդիպել Վաշինգտոնում: Այս մասին Վարշավայում մամուլի ասուլիսին հայտարարել է Ադրբեջանի ԱԳ նախարար Էլմար Մամեդյարովը։ «Հայաստանի ու Ադրբեջանի ԱԳՆ ղեկավարների վերջին հանդիպումն անցել է իմ ռուսաստանցի պաշտոնակից Սերգեյ Լավրովի նախաձեռնությամբ։ Ռուսաստանի հետ համատեղ ջանքերի երկակի-եռակի ավելացման դեպքում կարելի է հակամարտության կարգավորման առաջընթացի հույս ունենալ․․․Երեկ ԱՄՆ-ից ստացվել է հրավեր այցելելու Վաշինգտոն, որտեղ պետքարտուղարը կարգավորման գործընթացում բեկման հասնելու համար սեփական ջանքերը կգործադրի»,- ասել է Մամեդյարովը։

Թամար Բագրատունի