Փաշինյանը պատրաստ է զիջման. Ծուղա՞կ, թե՞ ժամանակի երկարաձգում

Հայաստանի վարչապետ Նիկոլ Փաշինյանը հարցազրույց է տվել Независимая газета-ին, որում խոսել է նաև ԼՂ հակամարտության կարգավորումից:

Փաշինյանը շեշտում է, որ Հայաստանը Ադրբեջանին առաջարկում է խաղաղության օրակարգ, ոչ թե` պատերազմի: «Մենք պետք է միասին աշխատենք այդ խնդրի լուծման ուղղությամբ: Եթե միասին չաշխատենք, ապա երբեք չենք ունենա լուծում, անգամ` ռազմական ճանապարհով, քանի որ ռազմական ճանապարհով խնդիրը հնարավոր չէ լուծել, այլ միայն` վատթարացնել: Ինչ-որ մեկը պատկերացնո՞ւմ է , որ ԼՂ հակամարտությունը հնարավոր է լուծել առանց Լեռնային Ղարաբաղի մասնակցության: Օրակարգը, որը ես ներկայումս առաջարկում եմ, բավականաչափ անսպասելի էր ոչ միայն Ադրբեջանի, այլև ԵԱՀԿ ՄԽ համանախագահների համար: Ժամանակ է հարկավոր, որ մենք հանգամանալից քննարկենք այդ նրբությունները:

Մեր ժողովուրդներին հարկավոր է նախապատրաստել խաղաղության, ոչ թե պատերազմի: Չեմ հոգնում նաև կրկնել, որ ԼՂ հիմնախնդրի ցանկացած լուծում պետք է ընդունելի լինի հայ ժողովրդի, Լեռնային Ղարաբաղի ժողովրդի և Ադրբեջանի ժողովրդի համար: Ցավոք, մենք դեռ նույն հայտարարությունը չենք լսել ադրբեջանական կողմից:

Հարցին` որքա՞ն հեռու կարող է գնալ Հայաստանը զիջումների հարցում, քանի որ հակամարտության ցանկացած լուծում ենթադրում է փոխզիջում, Փաշինյանն ասել է, որ սխալ է այդ հարցը տալ միայն կողմերից մեկին: «Կարևոր է, որ գործընթացը կառուցողական լինի: Հարկավոր է, որպեսզի երկու կողմերը պատասխանեն այդ հարցին միաժամանակ: Ես պատրաստ եմ պատասխանել այդ հարցին Լեռնային Ղարաբաղի և Ադրբեջանի հետ համատեղ: Սակայն, երբ Ադրբեջանը հանդես է գալիս ռազմատենչ դիրքորոշմամբ, ապա հայկական կողմի` զիջումներ մասին հայտարարությունները կարող է ընկալվել որպես թուլություն»,- ասել է ՀՀ վարչապետը:

Փաստացի Փաշինյանը միջազգային հանրությանը ակնարկում է, որ ինքը պատրաստ է զիջման, միայն այն բանից հետո, եթե Ադրբեջանն ասի, թե ինչ է պատրաստ զիջել:
Խաղաղության օրակարգը, ժողովուրդներին խաղաղության նախապատրաստելու՝ Փաշինյանական կոնցեպցիան ուրույն դրսևորում է ստանում: Նա պահում է ինտրիգը, երբ ասում է, որ նույնիսկ միջնորդներն են զարմացած նրա առաջարկներից ու ժամանակ է հարկավոր...

Ի՞նչ է սա նշանակում՝ համապարփակ կարգավորման տարբերա՞կ է առաջարկել Փաշինյանը, որն անսպասելի է դարձել, թե՞ դրել է նախապայմաններ՝ այս, կամ այն քայլի դեպքում Ադրբեջանի կողմից՝ հայկական կողմն էլ իր հերթին կարող է զիջել այլ հարցերում:

Մետաքսյա Շալունց