Դավիթ Սանասարյանը կպահանջի՞ Նիկոլ Փաշինյանի հրաժարականը

«Մերժի՛ր Սերժին» քաղաքացիական նախաձեռնության առաջնորդներից մեկին՝ Դավիթ Սանասարյանին ԱԱԾ-ն մեղադրանք է ներկայացրել ՀՀ քրեական օրենսգրքի 308-րդ հոդվածի 1-ին մասով: Ըստ ԱԱԾ-ի՝ նա իր պաշտոնեական դիրքն առերևույթ օգտագործել է ծառայության շահերին հակառակ, ինչպես նաև չի կատարել իր ծառայողական պարտականությունները: Նորաձև լեզվով ասած՝ հեղափոխական Սանասարյանը մեղադրվում է կոռուպցիայի մեջ:

Ի դեպ, 308–րդ հոդվածի 1-ին մասի խախտումը կարող է առաջացնել պատիժ մինչև 4 տարի ազատազրկման ժամկետով:

Կա՛մ Նիկոլն է «գործ սարքող», կա՛մ Դավիթը՝ կոռուպցիոներ

Սանասարյանը մի ժամանակ «քաղաքացիական ակԾիվիստ» էր աշխատում ու հակառուսական քարոզով արևմտյան գրանտներ «կպցնում»: Նա հաճույքով օգտագործվում էր տարատեսակ իշխանական էժանագին նախագծերում ու զուգահեռաբար «թունդ ընդդիմադիր» խաղում:

«Թավշյա հեղափոխությունը» փոխեց վարձով ապրող Դավթի կյանքը, ու նա միանգամից հայտնվեց Պետական վերահսկողական ծառայության պետի պաշտոնում՝ մինչ այդ նույնիսկ 3-հոգանոց կոլեկտիվ ղեկավարած չլինելով:

Սանասարյանը քաղաքական դաշտում ու պետական կառավարման համակարգում լուրջ ֆիգուր չէ, բայց նրա դեմ քրեական գործը կարող է լուրջ ներիշխանական ու ներքաղաքական հետևանքներ ունենալ, քանզի տարբեր շրջանակներ կարող են հարցը շահարկել և «Մյուսներին թողած Սանասարյան Դավոյին են բռնում» թեմայով Նիկոլի հետ հակադրության մեջ մտնել ավելի թունդ հեղափոխականի դիրքերից:

«Թավշյա» իշխանությունների և հանրության համար սա ջրբաժանային գործ է դառնալու: Եթե գործը, ինչպես Սանասարյանենք են պնդում, սարքած է, ուրեմն նոր Հայաստանում գործ սարքելը խաղի կանոն է, ու բոլորի դեմ են գործ սարքում, այդ թվում՝ նախկինների: Իսկ եթե Սանասարյանի գործը սարքովի չէ, և նա իրոք կոռուպցիայով է զբաղվել, ապա Նիկոլ Փաշինյանի իշխանությունը դառնում է ոչ լեգիտիմ, քանզի հայտարարվել էր, որ Հայաստանում կոռուպցիա չկա, մինչդեռ հեղափոխական շրջանակների կարկառուն ներկայացուցիչներից մեկն է մեղադրվում կոռուպցիայի մեջ:

Նախորդ տարի տեղի ունեցածի հիմնական շարժիչը հակակոռուպցիոն կոդն էր: Հիմա պարզվում է՝ դա բլեֆ է եղել, քանզի նորերն են զբաղված կոռուպցիայով: Իսկ դա ապալեգիտիմացնում է գործող իշխանություններին:

Դավիթը կպահանջի՞ Նիկոլի հրաժարականը

Պարզ է, որ Փաշինյանին ձեռնտու չէ այս պատմությունը: Չխախտելով հանդերձ Սանասարյանի անմեղության կանխավարկածը՝ հարկ է նշել, որ հազիվ թե նրա դեմ գործ հարուցվեր առանց լուրջ հիմքերի:

Ի դեպ, Սանասարյանի գործի շրջանակներում լսվում են Նիկոլ Փաշինյանի հրաժարականի պահանջներ: Հեղափոխությունից չօգտված աբիժնիկները և «Սասնա ծռերը» գրեթե ուղիղ տեքստով չեն ասում, բայց փաստացի մեղադրում են Փաշինյանին «գործ սարքելու» մեջ ու պահանջում ԱԱԾ պետ Արթուր Վանեցյանի հրաժարականը: ԱԱԾ-ն, ինչպես հայտնի է, վարչապետին կից մարմին է: Մեղադրել ԱԱԾ-ին «գործ սարքելու» մեջ ու պահանջել Վանեցյանի հրաժարականը նույնն է, որ «գործ սարքողի» պիտակ կպցնեն Նիկոլ Փաշինյանին ու պահանջեն նրա հրաժարականը:

Վարչապետն այս ամենը շատ լավ հասկանում է, ու դա է պատճառը, որ հրապարակավ պաշտպանեց ԱԱԾ-ին՝ անուղղակիորեն հաստատելով, որ Սանասարյանն օրենք է խախտել:

Թեև Սանասարյանը պնդում է, որ ինքը մաքուր է, և որ այս թեմայով դուրս չի գա Նիկոլ Փաշինյանի դեմ, բայց ակնհայտ է, որ գործն օգտագործվելու է տարբեր շրջանակների կողմից և, ի վերջո, բերելու է Փաշինյանի մասով հստակ վերաբերմունք արտահայտելու «հեղափոխական շրջանակների» պարտադրվածությանը:

Սանասարյանի փաստաբան Ինեսսա Պետրոսյանը պնդում է, որ գործը շինծու է: «Գալային» տված հարցազրույցում Պետրոսյանը նշել է, որ ՊՎԾ ղեկավար Սանասարյանը ստուգումների էր մտել մի ոլորտ, որտեղ չպետք է մտներ: Սանասարյանն, ըստ փաստաբանի, չի հասկացել կամ էլ չի ուզել հասկանալ «մեսիջները», եւ այդ իսկ պատճառով խնդիր դրվեց նրան մեկուսացնել, հեռացնել իշխանությունից:

Նկատենք, որ Սանասարյանի փաստաբանի այդ հայտարարությունները նշանակում են, որ նա արդեն կոռուպցիայի մեջ մեղադրում է համապատասխան պետական կառույցներին: Իսկ դա նշանակում է, որ կոռուպցիոն մեղադրանքի հասցեատերը Նիկոլ Փաշինյանն է:

Պարզ է, որ Սանասարյանի փաստաբանն, առանց իր պաշտպանյալի հետ համաձայնեցման, նման հայտարարություն չէր անի: Իսկ դա նշանակում է, որ ընտրվել է «լավագույն պաշտպանությունը հարձակումն է» տարբերակը: Դա էլ իր հերթին նշանակում է, որ Սանասարյանը կոռուպցիայի մեջ է մեղադրում արդեն Փաշինյանին: «Թավշյա» տղաներն, ըստ այդմ, պետք է կողմնորոշվեն, թե ով է կոռուպցիոներ՝ Սանասարյա՞նը, թե՞ Փաշինյանը: Մինչ այդ հպարտ քաղաքացիները կնշեն «քաղաքացու օրը», որը քաղաքացու վճարած հսկայական հարկերի հաշվին է կազմակերպվելու:

Հայկ Ուսունց

7or.am