Գեներալն ու Գոնսալեսը սուր են ճոճում ՀՀ իշխանությունների գլխին

ԴԱՀԿ ծառայության նախկին պետ, ԱԺ նախկին պատգամավոր Միհրան Պողոսյանը քաղաքական ապաստան է խնդրել: Այս մասին «Руна» պարբերականին տված հարցազրույցում հայտնել է Պողոսյանի փաստաբան Միխայիլ Յամչիտսկին, հավելելով, որ միջնորդությունն արդեն պաշտոնապես տրվել է։

«Պատշաճ կերպով ձեւակերպվել է: Որոշումը կայացնում է Ռուսաստանի Դաշնության նախագահին կից հանձնաժողովը: Իմ կարծիքով` դրա համար հիմքեր կան. Միհրան Պողոսյանին հայրենիքում հետապնդում են քաղաքական մոտիվներով»,- ասել է փաստաբան Միխայիլ Յամչիտսկին:

Նշենք, որ ՌԴ դատարանը որոշել է Ռուսաստանում Միհրան Պողոսյանին կալանավորել 40 օրով։ Քննարկվում է ԴԱՀԿ նախկին պետին՝ ՀՀ-ին հանձնելու հարցը: Միհրան Պողոսյանը ապրիլի 13-ին ՀՀ հատուկ քննչական ծառայությունում հարուցված քրեական գործով ներգրավվել էր որպես մեղադրյալ: Նրա նկատմամբ հայտարարվել էր հետախուզում, իսկ Երեւանի ընդհանուր իրավասության դատարանի կողմից խափանման միջոց էր ընտրվել կալանավորումը։ՀՀ ոստիկանության քրեական հետախուզության գլխավոր վարչության եւ ՌԴ ներքին գործերի նախարարության աշխատակիցների սերտ համագործակցության շնորհիվ Միհրան Պողոսյանը հայտնաբերվել էր Կարելիայի Հանրապետության Պետրոզավոդսկ քաղաքում եւ ձերբակալվել:

Ըստ ՀՔԾ-ի, Պանամայի օֆշորային սկանդալային գործից հայտնի նախկին բարձրաստիճան պաշտոնյան 2011 թվականին օտարերկրյա քաղաքացիների միջոցով Պանամայում հիմնադրել է երկու ընկերություններ, որոնց ղեկավարներ է նշանակել իր մտերիմ անձանց: Պողոսյանը վստահված անձանց միջոցով մասնակցել է Պանամայի օֆշորային գոտում գրանցված կազմակերպությունների կառավարմանը, ինչի արդյունքում վերջիններս Հայաստանում հիմնադրել են այլ ընկերություններ, այդ թվում՝ «Բեսթ ռեալթի» ՍՊԸ-ն: Այնուհետև 2014-ին Պողոսյանը փաստացի իր կողմից կառավարվող «Բեսթ ռեալթիի» կնքել է պայմանագիր, որի հիման վրա ընկերությունը ծառայություններ է մատուցել ԴԱՀԿ-ին: Արդյունքում բյուջեից հարկադիր կատարման ծառայությանը հատկացված միջոցներից կազմակերպությանը վճարվել է ավելի քան 43 միլիոն դրամ:ՀՔԾ-ն նաև հայտարարում է, որ Պողոսյանը իր վարորդին ու անվտանգության աշխատակցին ԴԱՀԿ-ում աշխատանքի է ընդունել, վերջիններս փաստացի չեն հաճախել աշխատանքի, բայց աշխատավարձ են ստացել: Բացի այդ, Պողոսյանը ԴԱՀԿ-ի համար գնումներ է իրականացրել իր կողմից կառավարվող «Քեթրին գրուպից»:

Իհարկե, աբսուրդ է, որ Պողոսյանը հայտարարում է քաղաքական հետապնդման մասին, քանի որ նախկին իշխանության ժամանակ էլ նրա ապօրինությունները բոլորին էին հայտնի, միայն թե Սերժ Սարգսյանի բարձր հովանավորչության շնորհիվ նա մնում էր անպատիժ: Սակայն փաստն այն է, որ գեներալ Պողոսյանը ռուսաստանյան իշխանություններից քաղաքական ապաստան է խնդրել: Հիշեցնենք, որ Սերժ Սարգսյանի եղբորորդի Նարեկ Սարգսյանն էլ Չեխիայի իշխանություններից է քաղաքական ապաստան խնդրել, չնայած Հայաստանի իրավապահ մարմինները տեղեկություններ չունեն այդ մասին, սակայն փաստն այն է, որ մի քանի ամիս է նա գտնվում է Չեխիայում եւ Հայաստան չեն արտահանձնում:
Հայաստանյան կողմը ներկայացրել է Նարեկ Սարգսյանի արտահանձնման համար բոլոր անհրաժեշտ հիմքերն ու այժմ սպասում է չեխական կողմի որոշմանը։
Հիշեցնենք` միջազգային հետախուզման մեջ գտնվող Նարեկ Սարգսյանը, ով ՀՀ երրորդ նախագահ Սերժ Սարգսյանի եղբոր` Ալեքսանդր Սարգսյանի որդին է, հայտնաբերվել և ձերբակալվել էր 2018թ.–ի դեկտեմբերի 6-ին, Պրահայում։ Հայտնաբերման պահին նա ներկայացրել է Գվատեմալայի քաղաքացու կեղծ անձնագիր՝ Ֆրանկլին Գոնսալեսի անհատական տվյալներով:
Նարեկ Սարգսյանի հայտնաբերման մասին տեղեկությունը փոխանցվել էր ՀՀ գլխավոր դատախազությանը՝ նրա Հայաստան տեղափոխման գործընթացը կազմակերպելու նպատակով: Այդ պահից սկսած Գլխավոր դատախազությունը հայտարարում է, որ ներկայացրել է անհրաժեշտ փաստաթղթերն ու սպասում է չեխական կողմի պատասխանին, որը մինչ այսօր, փաստորեն, չի ստացվում: 2018թ.–ի հունիսի 26-ին հարուցվել էր քրեական գործ՝ քրեական օրենսգրքի ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելու, իրացնելու, պահելու, փոխադրելու կամ կրելու և թմրամիջոցների, հոգեմետ (հոգեներգործուն) նյութերի և դրանց պրեկուրսորների ապօրինի շրջանառությունն իրացնելու կամ պատրաստելու նպատակով կամ դրանց ապօրինի իրացնելու հատկանիշներով:2018թ.–ի հուլիսի 6-ին Նարեկ Սարգսյանի նկատմամբ հայտարարվել էր հետախուզում, հուլիսի 24-ին՝ միջազգային հետախուզում: Այսպիսով՝ Հայաստանի իշխանությունների տակ ռումբ է դրվում, թե Ռուսաստանում, թե Արեւմուտքում ՀՀ քաղացիները քաղաքական ապաստան են խնդրում եւ այն էլ նախկին իշխանության ներկայացուցիչներ: Եթե հանկարծ բավարարի այս մարդկանց խնդրանքը , Նիկոլ Փաշինյանի իշխանության գլխին մեծ սուր է կախվելու եւ աշխարհն այլեւս անվստահություն է հայտնելու ՀՀ իշխանություններին իր երկրի քաղաքացիների նկատմամբ քաղաքական հետապնդում իրականացնելու համար:

Անի Սահակյան