Խաղաղասիրական ժեստ Ալիևից՝ Փաշինյանին. Որն է հաջորդ քայլը
Ադրբեջանի Միլի մեջլիսի խոսնակ Օքթայ Ասադովը կոչ է արել խորհրդարանականներին զերծ մնալ Լեռնային Ղարաբաղի հակամարտությունը ռազմական ճանապարհով լուծելու կոչերից, հաղորդում են ադրբեջանական լրատվամիջոցները:
«Ինչի՞ կարող ենք հասնել միայն պատերազմի էմոցիոնալ կոչերով: Եթե հակամարտությունը հնարավոր է լուծել խաղաղ ճանապարհով, ապա ինչու՞ դեմ գնալ դրան»,- ասել է Ասադովը խորհրդարանի լիագումար նիստում: Նրա խոսքով՝ խորհրդարանի պատգամավորները պետք է շատ «զգույշ մոտենան այդ թեմային»:
«Ադրբեջանի նախագահ Իլհամ Ալիևը միշտ հայտարարում է, որ մեր տարածքային ամբողջականությունը քննարկման առարկա չէ: Ուստի պատգամավորները պետք է զգույշ լինեն պատերազմի մասին իրենց կոչերում»,- հավելել է Ասադովը:
Սա կարելի է բավական անսպասելի հայտարարություն համարել Ադրբեջանի իշխանության ներկայացուցչի կողմից:
Վերջին ամիսներին Փաշինյանի, այսպես ասած՝ հիմնական խաղաթուղթն այն էր, որ նա մեղադրում էր Ադրբեջանին այն բանում, որ այդ երկրում իշխանությունների կողմից չեն հնչում խաղաղ կարգավորման, հասարակությանը խաղաղության նախապատրաստելու մասի հայտարարություններ:
Ավելին, Փաշինյանը նույնիսկ նշեց, որ պատրաստ է անգամ դիմել ադրբեջանցի հասարակությանը, սակայն նույնը երբեք չի լսել ադրբեջանական իշխանությունների կողմից:
Այսպես, կարելի է ասել, որ Փաշինյանի հորդորները Բաքուն որոշակիորեն պատասխանած է ներկայացնում: Առաջիկայում ևս, հնարավոր է ադրբեջանական կողմից լսենք նմանօրինակ հայտարարություններ՝ իշխանություններից, փորձագետներից, մամուլի ներկայացուցիչներից և այլն:
Սա իր հերթին նշանակում է, որ Բաքվում լրջորեն Փաշինյանի իշխանություններից ակնկալիքներ ունեն այն առումով, որ համարում են, որ հնարավոր է ճեղքում մտցնել բանակցային գործընթացի միջոցով, բնականաբար՝ ադրբեջանական կողմի պատկերացումների շրջանակներում:
Ադրբեջանում, իհարկե, հեշտ է մի քանի օրում ապահովել քարոզչական կեղծ մթնոլորտ: Օրինակ՝ պարզվի որ ամբողջ հասարակությունը «երազում է» Հայաստանի հետ եղբայրական հարաբերություններ ունենալ: Սա, ինչպես ասում են, գրչի թեթև մի հարվածով կիջնի հրահանգ, և քարոզչական ֆոնն ապահովված կլինի ողջ Ադրբեջանում:
Բայց դա չի լինի իրական պատկերը, որովհետև 2 տասնամյակ շարունակ ադրբեջանական կողմը հայատյացության ու ատելության քարոզով է զբաղված եղել, ավելին՝ ապրիլյան պատերազմ է սանձազերծել:
Թամար Բագրատունի
Հետևեք մեզ Viber-ում
