Հայաստանը ձախողումը պաշտոնապես արձանագրեց
Հայաստանի ԱԳՆ մամլո խոսնակի կողմից երեկ տարածվել է մի հայտարարություն, որն ըստ էության փաստել է, որ Ադրբեջան-ԵՄ բանակցությունները կարող են ավարտվել հայկական կողմի համար ոչ ցանկալի արդյունքներով:
Ադրբեջանի ԱԺ խոսնակը հայտարարել է, որ ԵՄ-Ադրբեջան փաստաթղթում ընդգրկված է Ադրբեջանի տարածքային ամբողջականությունը: Ինչպես կմեկնաբանեք դա, հարցրել են ՀՀ ԱԳՆ մամլո խոսնակ Աննա Նաղդալյանին:
«Նախ նշեմ, որ գործընկեր երկրների հետ ԵՄ բանակցվող տեքստերը հրապարակային չեն՝ հասանելի լինելով միայն գործընթացին անմիջական ներգրավվածություն ունեցող կողմերին: Ինչ վերաբերում է ԼՂ կարգավորման գործընթացի վերաբերյալ Եվրոպական միության դիրքորոշմանը, ապա այն հստակ արտահայտված է Հայաստան-Եվրամիություն Համապարփակ և ընդլայնված գործընկերության համաձայնագրում, որտեղ ԼՂ հակամարտության կարգավորման սկզբունքների շարքում առկա է նաև ինքնորոշման իրավունքը։ Ավելին, այդ դիրքորոշումը նաև բազմիցս վերահաստատվել է ԵՄ բարձրաստիճան պաշտոնյաների հայտարարություններում, որտեղ աջակցություն է հայտնվել ԵԱՀԿ Մինսկի խմբի համանախագահների ջանքերին: Հայաստանը բազմիցս ամենատարբեր մակարդակներով և հարթակներում շեշտել և ևս մեկ անգամ ընդգծում է, որ անընդունելի է համարում այս հարցում որևէ երկակի դիրքորոշման որդեգրումը, որը կարող է հակասել ԼՂ հիմնահարցի կարգավորման միջազգային մանդատ ունեցող ձևաչափի` Մինսկի խմբի համանախագահության մոտեցումներին և խաթարել խաղաղության գործընթացը», պատասխանել է ԱԳՆ մամլո խոսնակը:
Կարելի է արդյոք եզրակացնել, որ պաշտոնական Երևանի համար արդեն իսկ պարզ է, որ ԵՄ-Ադրբեջան համաձայնագրում իսկապես ամրագրվելու է Ադրբեջանի տարածքային ամբողջականության պահպանման խնդիրը՝ առանց ազգերի ինքնորոշման սկզբունքի մասին հիշատակման:
Սա իսկապես լրջագույն խնդիր է. ԵՄ-ն իրոք երկակի ստանդարտներ է կիրառելու, եթե փաստաթուղթն այդ տեսքը ստանա: Դա կնշանակի ԵՄ-ն դեմ է գնում նաև ԵԱՀԿ Մինսկի խմբի համանախագահությանը և այլ դիրքորոշում է արտահայտում:
Իսկ ինչ է մնում հիմա պաշտոնական Երևանին անել, բացի արձանագրելուց՝ անընդունելի է երկակի դիրքորոշման որդեգրումը, որը կարող է հակասել ԼՂ հիմնահարցի կարգավորման միջազգային մանդատ ունեցող ձևաչափի` Մինսկի խմբի համանախագահության մոտեցումներին...
Եվ ի՞նչ է արել պաշտոնական Երևանը, որպեսզի ԵՄ-ում չմոռանան, որ գոյություն ունի ԵԱՀԿ Մինսկի խմբի միասնական դիրքորոշում... Այստեղ է գլխավոր խնդիրը: Հիմա հրապարակային դժգոհում ենք, որովհետև այլևս ոչինչ փրկել հնարավոր չէ՞...
Ի դեպ, Ադրբեջանի և Եվրամիության միջև ռազմավարական գործընկերության մասին նոր համաձայնագրի ստորագրում 2019 թվականի մայիսի 13-ին չի լինի, քանի որ այս փաստաթղթի շուրջ Բաքվի և Բրյուսելի միջև բանակցությունները չեն ավարտվել, նախօրեին հայտարարել է Ադրբեջանի ԱԳՆ մամուլի քարտուղար Լեյլա Աբդուլլաևան. «Ադրբեջանի և Եվրամիության միջև համաձայնագրի ստորագրումն անմիջականորեն մայիսի 13-ին չի նախատեսվում, քանի որ փաստաթղթի շուրջ բանակցությունները, որոնք կստեղծեն գործընկերային հարաբերությունների իրավական հիմքը՝ շարունակվում են»:
Թերևս, Հայաստանը ունի ժամանակ՝ շտկելու իրավիճակը...
Մետաքսյա Շալունց
Հետևեք մեզ Viber-ում
