Նոր Հայաստանի մոնոպոլիստների պահապան հրեշտակը

Ներկայիս իշխանությունը նախորդների ամենավատ սովորույթներն է ժառանգել, Սերժ Սարգսյանի իշխանությունությունում պետության գլուխ դարձող մարդը կարող էր օրենքի պահանջին ոչ համապատասխան փաստաթղթեր ներկայացնել, հիմա էլ համարում են, որ ՏՄՊՊՀ նախագահի պաշտոնում դա լրիվ թույլատրելի է:

ՀՀ վարչապետ Նիկոլ Փաշինյանի կողմից ՀՀ Տնտեսական մրցակցության պաշտպանության հանձնաժողովի նախագահի պաշտոնում առաջադրված թեկնածուն՝ գյուղատնտեսության նախարարի պաշտոնակատար Գեղամ Գեւորգյանը թերի կենսագրություն ունի տվյալ պաշտոնի համար: Նա չունի, մասնավորապես, ղեկավար պաշտոնում երեք տարվա պահանջող ստաժը, սակայն, հիշեցնենք, որ աշխատել է նախկին վարչապետերի կառավարությունում: Օրերս ԼՀԿ ղեկավար Էդմոն Մարուքյանն այդ հարցով նաեւ գրություն ուղարկեց Փաշինյանին՝ առաջարկելով հետ կանչել թեկնածուին: Սակայն արձագանք չկա, իսկ դրա փոխարեն խորհրդարանը երեկ քննեց Գեւորգյանի՝ այդ պաշտոնում նշանակվելու հարցը եւ առաջիկայում տեղի կունենա ընտրություն: Պատգամավորների եւ թեկնածուի հարցուպատասխաններից կարող ենք հետեւություն անել, որ ի դեմս Գեւորգյանի նոր Հայաստանում նոր շաբոյանական էջ է բացվելու,եւ Գեւորգյանն էլ, դառնալու է այս իշխանության մենաշնորհների պահապան հրեշտակը:

Մարուքյանը ԱԺ-ում քննարկման ժամանակ «Իմ քայլը» խմբակցության ուշադրությունը հրավիրեց այն հանգամանքի վրա, որ Գեղամ Գեւորգյանն օրենքով չի կարող լինել այդ հանձնաժողովի նախագահի թեկնածու. «Սրանով հանձնաժողովի տակ ռումբ ենք դնում: Դատարանում կարող է հանգիստ ասվել, որ հանձնաժողովը չի կազմավորվել օրենքի հիման վրա, ուստի հանձնաժողովի ցանկացած որոշում կարող է վիճարկվել: Ավելի լավ էր այլ թեկնածու ներկայացվեր: Ես տիկին Մակունցին կարող եմ փաստաթղթերով ապացուցել ասածս, սա լուրջ խնդիր է դառնալու: ՏՄՊՊՀ նախագահ չի կարող ընտրվել օրենքին չհամապատասխանող անձը»: Գեղամ Գեւորգյանը բացատրեց, որ ԱԺ աշխատակազմին է ուղարկել բոլոր իրավական ակտերը եւ պայմանագրերը, համաձայն որոնց՝ ինքը զբաղեցրել է այս կամ այն պաշտոնը:Անի Սամսոնյանը Գեւորգյանին հիշեցրեց. «Մինչեւ այս ամբիոնի մոտ գալը դուք ունեցել եք որոշակի պատասխանատվություն եւ անցած ճանապարհ, ըստ որի են գնահատում ձեր թեկնածությունը: 2016-18թթ. դուք եղել եք գյուղատնտեսական ծրագրերի իրականացման հիմնադրամի տնօրենը: Ըստ Վերահսկիչ պալատի հաշվետվության՝ այդ ԾԻԳ-ը գործել է ոչ արդյունավետ եւ չի ապահովել 2017թ.-ի ծրագրերի իրականացումը: Այստեղ խոսում եք անբարեխիղճ մրցակցության վերացման մասին, մինչդեռ ինքներդ չեք անդրադարձել այդ խնդրին ձեր պաշտոնավարման ընթացքում»:

Թեկնածուն փորձեց հերքել, ասելով, սակայն իրականությունը նրա հերքումներից դուրս է:
Փաստն այն է, որ շատ տնտեսվարողներ նախկին համակարգի պայմաններում կարողացել են թղթերով մրցակցության հնարավորություն ստեղծել՝ իրականում շուկայում մնալով գերիշխող. «Ահա այս հարցերը պետք է կարողանա լուծել ՏՄՊՊՀ-ն՝ նոր Հայաստանում: Իսկ ինչպե՞ս է պատրաստվում պայքարել 4 վարչապետների շրջանում տարբեր պաշտոններ զբաղեցրած Գեղամ Գևորգյանը այն մենաշնորհների դեմ, որոնք առկա են դե ֆակտո, սակայն գոյություն չունեն դե յուրե» հետաքրքրվեց պատգամավոր Արման Բաբաջանյանը:

Նա հարց բարձրացրեց՝ ինչպե՞ս ենք մենք պոտենցիալ ներդրողներին դրական ուղերձ հղելու, թե փակվել է շաբոյանական կամ հանրապետական էջը, հետաքրքրվեց նաեւ փոխվարչապետ Տիգրան Ավինյանին՝ Գգեւորգյանի ձեռամբ հատկացված գրանտի մասին.«Փոխվարչապետ Տիգրան Ավինյանին պատկանող «Իրիգեյթ» ՍՊԸ–ն 2018 թվականի մարտի 15-ին դիմել է ձեր գլխավորած Գյուղատնտեսության զարգացման հիմնադրամին՝ դրամաշնորհ ստանալու հայտով, արդեն մայիսի 25-ին, երբ Ավինյանը փոխվարչապետ էր, ձեր գլխավորած հիմնադրամը որոշում է կայացրել «Իրիգեյթ» ընկերության 37 մլն դրամ գումար հատկացնել , որից 16 մլն դրամը՝ անհատույց։ Ձեր գլխավորած Գյուղատնտեսության զարգացման հիմնադրամի եւ «Իրիգեյթ» ՍՊԸ–ի միջեւ 2018 թվականի օգոստոսի 1-ին վերջնական համաձայնագիր է կնքել, որից մի քանի ամիս անց՝ հոկտեմբերին, դուք նշանակվել եք գյուղատնտեսության նախարար։ Սրա միջեւ պատճառահետեւանքային կապ կա՞»։Գեղամ Գեւորգյանը պատասխանեց, որ դրամաշնորհի բոլոր փուլերն ավարտված են եղել մինչեւ Տիգրան Ավինյանի՝ փոխվարչապետ նշանակվելը, Բաբաջանյանն էլ ուղղեց, որ այնուամենայնիվ հատկացման որոշումը կայացրել է ինքը: Մի խոսքով՝ բոլոր հարցերում թեկնածուն խոցելի էր, ինչպես որ Արտակ Շաբոյանը, երբ խոսում էր Լֆիկի եւ այլոց մենաշնորհների եւ գերիշխող դիրքը չչարաշահելու մասին:

Անի Սահակյան