Процесс пошел!

Պետական վերահսկողական ծառայության ղեկավար Դավիթ Սանասարյանի շուրջ օղակը սեղմվում է։ ԱԱԾ-ն նրա դեմ մեղադրանք է առաջադրել․ որոշում է կայացվել՝ կասեցնել նրա պաշտոնավարումը․ 

«Հաշվի առնելով ՀՀ պետական վերահսկողական ծառայության աշխատակիցների կողմից թույլ տրված ենթադրյալ չարաշահումների փաստի առթիվ հարուցված քրեական գործի նկատմամբ առկա հանրային հետաքրքրությունը` ՀՀ ազգային անվտանգության ծառայությունը հայտնում է, որ ՀՀ ՊՎԾ պաշտոնատար անձանց կողմից պաշտոնեական լիազորությունները չարաշահելու և ծանր հետևանքներ առաջացնելու, մի խումբ անձանց կողմից նախնական համաձայնությամբ փաստաթղթեր կեղծելու, իրացնելու և օգտագործելու դեպքերի առթիվ 2019 թվականի փետրվարի 20-ին ՀՀ ԱԱԾ քննչական դեպարտամենտում ՀՀ քրեական օրենսգրքի 308-րդ հոդվածի 2-րդ մասով և 325-րդ հոդվածի 2-րդ մասով հարուցված քրեական գործի նախաքննությամբ ձեռք բերված բավարար ապացույցների համակցության հիման վրա 2019 թվականի ապրիլի 18-ին Դավիթ Սանասարյանին մեղադրանք է առաջադրվել ՀՀ քրեական օրենսգրքի 308-րդ հոդվածի 1-ին մասով: Քրեական գործով բավարար ապացույցներ են ձեռք բերվել, որոնք առերևույթ վկայում են այն մասին, որ վերջինս, հանդիսանալով ՀՀ պետական վերահսկողական ծառայության ղեկավար, ունենալով ծառայության անմիջական ղեկավարումն իրականացնելու, ծառայության աշխատակիցներին նշանակելու և ազատելու, վերահսկվող օբյեկտներում ուսումնասիրություններ իրականացնելու հանձնարարագրեր տալու, վերահսկվող օբյեկտներից ծառայության գործառույթներին առնչվող տեղեկություններ և փաստաթղթեր պահանջելու լիազորություններ, խմբային շահերից ելնելով` իր աշխատակիցների կողմից փաստացի կառավարվող ընկերության ձեռնարկատիրական գործունեությանը նպաստելու նպատակով իր պաշտոնեական դիրքն առերևույթ օգտագործել է ծառայության շահերին հակառակ, ինչպես նաև չի կատարել իր ծառայողական պարտականությունները:
Վերջինիս նկատմամբ որպես խափանման միջոց է կիրառվել չհեռանալու մասին ստորագրությունը:
Նախաքննության օրինականության նկատմամբ հսկողություն իրականացնող դատախազի համաձայնությամբ քննիչի կողմից 18.04.2019թ. որոշում է կայացվել ՀՀ պետական վերահսկողական ծառայության ղեկավար Դավիթ Սանասարյանի պաշտոնավարությունը ժամանակավոր դադարեցնելու մասին, որն ուղարկվել է ՀՀ վարչապետին:
Նախաքննությունը շարունակվում է, միջոցներ են ձեռնարկվում գործի հանգամանքների բազմակողմանի, լրիվ և օբյեկտիվ հետազոտումն ապահովելու նպատակով»,- նշված է ԱԱԾ տարածած հաղորդագրության մեջ։
Պետք է խոստովանել, որ անկախ Հայաստանի պատմության մեջ աննախադեպ վիճակ է, երբ նման մեղադրանք է առաջադրվում երկրի ղեկավարի վերահսոկաղական ծառայությանը։ Պետք է արձանագրել, որ այս մեղադրանքն առաջին հերթին հարվածում է Նիկոլ Փաշինյանի քաղաքական իմիջին։ Ըստ ամենայնի, Նիկոլ Փաշինյանը չի կամեցել հանձնել իր հավատարիմ հեղափոխական ընկերոջը, հակառակ պարագայում մինչ քննիչի որոշումը Փաշինյանը կարող էր պաշտոնակ անել Դավիթ Սանասարյանին։ Պետական կառավարման համակարգում նման իրավիճակներում այդ քայլին դիմելն ընդունված պրակտիկա է, բայց Փաշինյնաը գերադասել է հրաժարվել այդ ստանդարտ ճանապարհից։ Մյուս կողմից՝ տեղի ունեցածը փաստում է, որ իշխանության ներսում ներքին պառակտում է սկսվում, և Նիկոլ Փաշինյանի համար, իբրև պետության լիդերի, փորձության ծանր փուլ է սկսվում։ Դավիթ Սանասարյանը իշխանության արևմտամետ կամ սորոսական թևի ներկայացուցիչներից է և հայտնի է որպես հակառուսական դիրքորոշման կրող։ Թերևս նաև այս պատճառով է, որ նրա դեմ հարուցված գործը գտնվում է ԱԱԾ-ն և ոչ թե, օրինակ, Հատուկ քննչական ծառայության վարույթում։ Հայաստանի ԱԱԾ-ի գործողությունները, ինչպես նախկինում, այնպես էլ այժմ որոշ իմաստով դիտարկվում են ռուսասատանյան քաղաքական շահերի համատեքստում։ Դժվար է միանշանակ ասել, թե ինչ ճակատագիր կունենա Սանասարյանի գործը։ Ի դեպ, նա, ԱԱԾ հաղորդագրությանն ի պատասխան, ՖԲ իր էջում գրառում է կատարել՝ իր դեմ հարուցված գործը որակելով շինծու։
«Միշտ պետք է հիշենք, որ պայքարի ճանփաները փշոտ ու քարքարոտ են, իսկ վերջնական հաղթանակը երբեք հեշտ չի տրվում։
Իմ դեմ իրականացվողը շինծու է, դա անգամ ապացուցման կարիք չունի։
Մանրամասներրի մասին կխոսեմ հետագայում»,- գրել է Սանասարյանը։
Անկախ գործի ընթացքից, սակայն, իշխանության պառակտման գործընթացը, ինչն ի դեպ կանխատասելի էր, արդեն սկսված է։
ПРОЦЕСС ПОШЕЛ! կասեր պերեստրոյկայի տեսության հիմնադիր, ԽՍՀՄ վերջին նախագահ Գորբաչովը։ Իսկ առջևում հեղափոխության մեկ ամյակն է։

Հայկ Դավթյան