Հայաստանը Լավրովին ստի մեջ է մեղադրո՞ւմ, թե՞ նրան չի հավատում

Համաձայնեցված ձևակերպումներից դուրս, դրանց հակասող հայտարարությունները չեն նպաստում փոխվստահության ամրապնդմանը, առավել ևս եթե դրանք մտացածին են և չեն համապատասխանում իրականությանը։ Այդ մասին ասաց Հայաստանի արտգործնախարարության մամուլի խոսնակ Աննա Նաղդալյանը՝ «Ազատությանը» մեկնաբանելով մոսկովյան հանդիպումից հետո Ադրբեջանի արտգործնախարար Էլմար Մամեդյարովի հայտարարությունները:

Ապրիլի 15-ին Մոսկվայում Հայաստանի արտգործնախարար Զոհրաբ Մնացականյանի հետ հանդիպումից հետո, որին մասնակցել է նաև Ռուսաստանի արտգործնախարար Սերգեյ Լավրովը, իսկ ավելի ուշ միացել են ԵԱՀԿ Մինսկի խմբի համանախագահները, Մամեդյարովն ասել է, թե քննարկում է եղել 2016-ին Ռուսաստանի կողմից ներկայացված ծրագրի հիման վրա։

Հարցին, թե ի՞նչ ծրագրի մասին է խոսքը, Աննա Նաղդալյանը պատասխանեց․ - «Նախ, նշեմ, որ հանդիպման արդյունքներով հրապարակվել է դրան մասնակցող կողմերի համատեղ հայտարարությունը, որտեղ արդեն իսկ նշված են քննարկված թեմաները։ Համատեղ հայտարարությունները հենց այն նպատակով են արվում, որ դրանցում ամփոփվեն հանդիպման բոլոր մասնակիցների միջև համաձայնեցված ձևակերպումները։ Համաձայնեցված ձևակերպումներից դուրս, դրանց հակասող հայտարարությունները չեն նպաստում փոխվստահության ամրապնդմանը, առավել ևս եթե դրանք մտացածին են և չեն համապատասխանում իրականությանը»։

Այնուհետև ՀՀ ԱԳՆ-ի մամլո խոսնակը շարունակել է. «Ներկայումս որևէ ծրագրի հիման վրա բանակցություններ չեն ընթանում։ Ավելին, քննարկումների բովանդակային մասը շարունակում է ընթանալ միմյանց դիրքորոշումներին ծանոթանալու, պարզաբանելու ու հստակեցնելու տիրույթում»:

Ադրբեջանի ԱԳ նախարարը հայտարարել է առաջիկայում Վաշինգտոնում հանդիպում անցկացնելու ամերիկյան կողմի առաջարկի մասին: Արդյոք հաստատո՞ւմ եք այդ տեղեկությունը: Այս հարցին ի պատասխան էլ Աննա Նաղդալյանը նշել է, Լեռնային Ղարաբաղի հիմնախնդրի վերաբերյալ յուրաքանչյուր հանդիպման հաստատումից հետո դրա մասին հայտարարվում է համաձայնեցված կարգով: «Քանի որ այս հարցը դեռևս քննարկման փուլում է, պետք է ձեռնպահ մնալ միակողմանի ազդարարումներից և հրապարակային բանակցությունների գործելաոճից։ Ավելին՝ համանախագահ երկրներից մեկում կայանալիք հանդիպման մասին նախապես հայտարարելն անհարգալից վերաբերմունքի է գործընթացի մասնակիցների, բայց առաջին հերթին՝ տվյալ համանախագահի նկատմամբ»: «Դեռևս չկայացած պայմանավորվածությունների ազդարար դառնալու ձգտումը չի նպաստում փոխվստահության հիման վրա նորմալ աշխատանքային մթնոլորտի ձևավորմանը», ասել է ՀՀ ԱԳՆ խոսնակը:

Եթե վերլուծենք պաշտոնական Երևանի հայտարարությունը, ստացվում է, որ Հայաստանը Լավրովի հաստատածը՝ Մամեդյարովի՝ 2016թ. ռուսական առաջարկությունները քննարկելու մասին, ՀՀ ԱԳՆ-ն սուտ է որակում:

Դեռ Մամեդյարովին կարելի էր մեղադրել ինչ-ինչ նպատակներով իրականությունից հեռու մեկնաբանություններ անելու մեջ, ինչը ի դեպ, ադրբեջանական կողմը մշտապես անում է: Սակայն արդյոք դա կարելի է անել նաև Լավրովի դեպքո՞ւմ, երբ նա, ըստ էության, հաստատեց Մամեդյարովի մեկնաբանությունները, ընդ որում, շեշտելով, որ Մամեդյարովի արած հայտարարություններին «ավելացնելու բան չունի»: Այսինքն, ասվածից կարելի էր հասկանալ, որ Լավրովը «ստորագրում» է Մամեդյարովի ամեն բառի տակ:

Թամար Բագրատունի